Nyagatare: Banki ya Kigali yahaye amashanyarazi imiryango itishoboye 500

Yanditswe na Jean Pierre Tuyisenge
Kuya 22 Nzeri 2017 saa 09:28
Yasuwe :
0 0

Imiryango itishoboye 500 yo mu mirenge itandukanye yo mu Karere ka Nyagatare basezereye umwijima nyuma y’uko Banki ya Kigali ibahaye umuriro ukomoka ku mirasire y’izuba.

Abacaniwe ni abo mu Mirenge ya Matimba, Karagangazi na Rukomo. Iyo miryango igizwe n’abantu babarirwa mu 2000.

Abo BK yafashije babarirwa mu cyiciro cya mbere cy’ubudehe, banavuga ko bagorwaga no kubona amafaranga yo kugura petelori yo gushyira mu gatadowa, abana babo bikabagora gusubira mu masomo neza.

Uwitwa Sekamana Silas utuye mu Murenge wa Rukomo yavuze ko ubuzima bw’umuryango we bugiye guhinduka.

Yagize ati “Ubu sinabona uko nshimira iyi banki kuko ingiriye neza, najyaga ninjira mu nzu hatabona, iyo nabonaga udufaranga nabaga nagura ka petelori naba ntayabonye ubwo ninjiriragamo uko, gusa ubu ndabashimiye cyane barakoze ubu n’umwana asigaye asoma habona neza.”

Undi muturage witwa Kabagira Devota yashimiye Banki ya Kigali yatekereje kumanuka ikajya mu cyaro kureba abababaye, ikabagenera umuriro.

Yagize ati “ Mu by’ukuri aba bantu boherejwe n’Imana kubona bamanuka kakagera ahantu nk’aha bakaza kumpa umuriro, ndabashimiye rwose kuko narindi ahantu habi cyane.”

Umuyobozi ushinzwe ibikorwa by’Ubucuruzi muri Banki ya Kigali, Gatete Vincent, yavuze ko bifuje kwegera abaturage ndetse babijeje ko usibye kubaha umuriro bazakora n’ibindi bikorwa bitandukanye.

Yagize ati “ Murabizi ko Banki ya Kigaki uyu mwaka twizihize imyaka 50 tumaze dukorera mu Rwanda, twahisemo kugira ngo tugire uruhare mu iterambere ry’abaturage, mu mibereho myiza yabo duhitamo rero ko twatangira tubaha urumuri. Twahisemo urumuri kuko iyo urufite abana babasha kwiga, ushobora gushyira umuriro muri telefoni, urumuri nirwo dutangiriyeho ariko n’ibindi bikorwa bizagenda bigerwaho.”

Yaboneyeho kubasaba kuzafata neza ibyo bikorwa kugira ngo batabangamira iterambere BK yabifurizaga.

N’Umuyobozi w’Akarere ka Nyagatare wungirije ushinzwe ubukungu, Kayitare Didas, yasabye abo baturage gukoresha umuriro bahawe kandi bakawubungabunga.

Yagize ati “Icyo dusaba abaturage ni uko bakoresha umuriro bahawe, ejo umwana ntazabe ari kwiga ngo yongere gukoresha agatadowa kandi yahawe urumuri ariko kugira ngo bishoboke ni uko arushaho kurufata neza, barubungabunge, barurinde igishobora gutuma ziriya nsinga zangirika. Barugire urwabo ntirwitwe urwa Banki ya Kigali.”

Banki ya Kigali yizihije imyaka 50 imaze iha abaturage serivisi, usibye ibikorwa by’ubucuruzi inafasha mu bikorwa by’iterambere ry’abaturage birimo kubishyurira ubwisungane mu kwivuza, kubakira inzu abatishoboye, kubaha umuriro n’ibindi byinshi.

Imiryango itishoboye 500 yo muri Nyagatare yashimiye BK yabahaye amashanyarazi
BK yahaye amashanyarazi abatishoboye
Sekamana Silas wo mu Murenge wa Rukomo yashimiye BK yabacaniye
Umuyobozi ushinzwe ibikorwa by’Ubucuruzi muri Banki ya Kigali, Gatete Vincent
Umuyobozi w’Akarere ka Nyagatare wungirije ushinzwe ubukungu, Kayitare Didas, yashimiye BK yacaniye abatishoboye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza