Nyamagabe: Imiryango 70 y’abarokotse Jenoside batishoboye yagenewe ubufasha

Yanditswe na Prudence Kwizera
Kuya 17 Kamena 2017 saa 03:41
Yasuwe :
0 0

Mu rwego rwo gufata mu mugongo abarokotse Jenoside yakorewe Abatutsi no kubaba hafi, imiryango 70 y’abatishoboye batuye mu Murenge wa Gasaka mu Karere ka Nyamagabe, yahawe inkunga y’ibiribwa n’ibikoresho by’isuku.

Ni igikorwa cyabaye kuri uyu wa Gatanu tariki ya 16 Kamena 2017, gikozwe n’abagize ihuriro ry’inganda zitunganya umuceri zikanawugeza ku isoko.

Bamwe mu bagize iryo huriro babanje gusura urwibutso rwa Jenoside rwa Murambi, mu Karere ka Nyamagabe basobanurirwa amateka yaho n’uko abatutsi bari bahahungiye bishwe, nyuma bakomereza mu Murenge wa Gasaka aho basuye imiryango y’abarokotse Jenoside bayigenera n’inkunga.

Visi perezida w’iryo huriro, Peter Uwamahoro, avuga ko ari igikorwa basanzwe bakora buri mwaka, mu rwego rwo kubaka igihugu no kurinda ko ibibi byabaye byazasubira.

Uwamahoro ati “Ni igikorwa ngarukamwaka, ntabwo ari ubwa mbere tubikoze kandi sibwo bwa nyuma, kuko abo twabuze muri Jenoside tubaha agaciro. Twaje hano kugira ngo dukomeze kwigira ku mateka yacu nubwo atari meza, kugira ngo ibyabaye byatumye tubura ababyeyi, abavandimwe n’inshuti bitazongera kub aukundi. Abarokotse Jenoside twabazaniye ibiribwa n’ibikoresho by’isuku, uyu munsi twaremeye imiryango 70”.

Mu bikoresho batanze, buri muryango wagenewe ibiro 25 by’umuceri, litilo eshanu z’amavuta yo guteka, imiti ibiri n’igice y’isanune n’ibiro 12 n’igice by’isukali.
Bamwe mu bahawe ubufasha bavuga ko bishimiye uko abagiraneza batandukanye babitaho bakabasura, abandi bakabazanira inkunga, ngo bibaha icyizere cy’ubuzima.

Umukozi uhagarariye Ibuka mu karere ka Nyamagabe, Elie Ndayisaba, yashimiye abaje gusura urwibutso no kuremera abatishoboye barokotse Jenoside, avuga ko ibyo bakoze ari bimwe mu bica intege abahakana n’abapfobya Jenoside.

Ndayisaba ati “Iki gikorwa ni cyiza kuko gusura inzibutso no kuzibungabunga ndetse no gufata mu mugongo abatishoboye barokotse Jenoside yakorewe abatutsi, ni gahunda nziza yo guhangana n’ingaruka za Jenoside, ndetse no guhangana n’abayihakana bakanayipfobya”.

Usibye ibiribwa n’ibikoresho by’isuku byatanzwe, abagize ihuriro ry’inganda zitunganya umuceri zikanawugeza ku isoko, batanze n’inkunga y’ibihumbi 500 ku rwibutso rwa Murambi.

Bavuga ko nyuma yo kubona amateka yaho biyemeje kongera imbaraga mu gutanga uburere bwiza ku bana babo no kubarinda amacakubiri ari na ko barwanya ingengabitekerezo ya Jenoside.

Abagize ihuriro ry'inganda zitunganya umuceri babanje gusura urwibutso rwa jenoside rwa Murambi
Ku rwibutso rwa Murambi bunamiye abazize jenoside yakorewe Abatutsi
Imiryango y'abarokotse Jenoside yagenewe inkunga irimo ibiribwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza