Nyamagabe: Umusore yatawe muri yombi ashinjwa gukubita DASSO akamwica

Yanditswe na Prudence Kwizera
Kuya 9 Kanama 2017 saa 05:14
Yasuwe :
0 0

Umusore wo mu Murenge wa Cyanika mu karere ka Nyamagabe ari mu maboko ya Polisi akurikiranyweho icyaha cyo gukubita Dasso igiti mu mutwe akamwica.

Uyu musore usanzwe atuye mu Kagari ka Karama, umurenge Cyanika yatawe muri yombi kubera icyaha akurukiranyweho cyo gukubita umukozi w’urwego rushinzwe umutekano rwa Dasso witwa Jean Damascene Ntawuhigimana akamwica.

Icyo cyaha akurikiranyweho cyabaye ahagana saa tanu z’ijoro ryo kuri uyu wa Kabiri tariki ya 8 Kanama 2017, ubwo yamusangaga mu kabari aho yari ari kunywera.

Umunyamabanga Nshingwabikorwa w’Umurenge wa Cyanika, Jean Chrisostome Ndorimana, yavuze ko uyu musore yari asanzwe azwi nk’umuntu wananiranye kuko yari amaze igihe afunzwe, akaba yakoze icyo cyaha afunguwe.

Yagize ati “Asanzwe azwi nk’umuntu wanananiranye, amaze iminsi mike afunguwe. Yaje yinjira mu kabari asagararira umuturage noneho Dasso iravuga iti ‘ese uyu muntu uteza akavuyo hari n’inzego z’umutekano ninde?’ ubwo uwo muturage we yahise ahaguruka aritahira. Yagumye aho acunga Dasso asohotse ahita amukubita igiti cy’umuhembezo inshuro ebyiri mu mutwe”.

Ndorimana avuga ko abaturage n’ubuyobozi bihutiye kujyana Dasso kwa muganga ariko ku bw’ibyago agerayo yamaze kwitaba Imana.

Umuvugizi wa Polisi mu Ntara y’Amajyepfo, IP Emmanuel Kayigi na we yemeje ayo makuru, avuga ko ukekwaho kwica umu-DASSO yabanje kugirana na we amakimbirane mu kabari, noneho atashye aramukurikira amukubita igiti mu mutwe aramwica.

Yavuze ko kuri ubu afungiye kuri sitasiyo ya polisi ya Gasaka aho akurikiranyweho icyaha cy’urugomo rwateye urupfu. Ngo agiye gukorerwa dosiye ashyikirizwe ubushinjacyaha, aramutse ahamwe n’icyaha yahanishwa igifungo cya burundu nkuko amategeko abiteganya.
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza