Nyamagabe: Umwana yitabye Imana aho bikekwa ko yazize imyumbati

Yanditswe na Prudence Kwizera
Kuya 9 Kanama 2017 saa 08:47
Yasuwe :
0 0

Abana babiri bo mu murenge wa Kitabi mu Karere ka Nyamagabe baraye bafashwe n’uburwayi butunguranye bajyanwa kwa muganga, bagezeyo umwe yitaba Imana, naho undi arembeye mu bitaro bya Kigeme.

Abo bana babiri umwe afite imyaka ine undi itanu y’amavuko, basanzwe batuye mu mudugudu wa Karambi, akagari ka Mukungu, aho bari baraye kwa nyirakuru kuko ababyeyi babo bari baraye mu wundi murenge wa Tare bihana imbibi aho bari kubaka kuko ngo benda kuhimukira, nk’uko bamwe mu baturanyi babo babivuga.

Bavuga ko abo bana barembye mu masaha ya saa munani z’ijoro ryo ku wa Kabiri bikekwa ko byatewe n’imyumbati itetse baraye bariye.

Bakimara kuremba bahise babajyana kwa muganga ku kigo nderabuzima cya Mbuga, bagezeyo ahagana saa cyenda z’urukerera umwe w’imyaka ine yitaba Imana naho undi w’imyaka itanu y’amavuko yari arembye ari gukurikiranwa n’abaganga mu bitaro bya Kigeme.

Umunyamabanga Nshingwabikorwa w’umurenge wa Kitabi, Eliezer Nyandwi, yabwiye IGIHE ko hataramenyekana neza icyo abo bana bazize, ariko bikekwa ko ari imyumbati itetse baraye bariye kuko basangiye, bityo bakaba bategereje icyo kwa muganga baza kuvuga.

Nyandwi ati “Amakuru uko agenda atangwa avuga ko bariye imyumbati cyane ko nta kindi kibazo bari bafite, twe turabivuga nk’amakuru twahawe ariko kwa muganga ho baraza kwemeza neza icyo bazize”.

Mu gihe umwe muri abo bana akiri gukurikiranwa n’abaganga ku bitaro bya Kigeme ngo barebe ko ubuzima bwe baburamira, uwitabye Imana yajyanwe mu buruhukiro bw’ibyo bitaro kugira ngo akorewe isuzuma.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza