Nyamasheke: Abarobyi binjizaga isambaza mu buryo butemewe n’amategeko barahagaritswe

Yanditswe na Sitio Ndoli
Kuya 19 Kamena 2017 saa 11:23
Yasuwe :
0 0

Ubuyobozi bw’Akarere ka Nyamasheke bwahagaritse abarobyi b’isambaza mu Kiyaga cya Kivu barobera ku ruhande rwa Repebulika Iharanira Demokarasi ya Congo kongera kuzana isambaza muri aka karere.

Iki cyemezo cyafashwe bishingiye ku ngamba zo kubungabunga umutekano n’ubuzima bw’abaturage kuko ngo abo barobyi binjiza isambaza batubahiriza amabwiriza agenga abinjira n’abasohoka kandi izo bazana zikaba ari izo barobesha imitego y’uburozi.

Umuyobozi w’Akarere ka Nyamasheke, Kamali Aimé Fabien yavuze ko aba barobyi binjira nta byangombwa bafite ndetse isambaza zabo zikaba zikemangwa kubera ko zirobeshwa imitego itujuje ubuziranenge.

Yagize ati “Abo bantu bazana isambaza ntabwo banyura mu nzira zemewe n’amategeko, ubundi bakagombye kuzana isambaza banyuze ahantu hazwi bakajya gucuruza, bo ni ukwinjira no gusohoka ntacyo babajije, yaba Umunye-Congo cyangwa Umunyarwanda wagiye muri Congo kurangura nta cyangombwa na kimwe baba bafite.”

“Icya kabiri isambaza bazana ni izarobeshejwe kaningiri, ubwazo ziba zapfuye zifite amaraso nabyo ntabwo tubyemera kubera ko kaningiri ni uburozi. Ku bijyanye n’ubuhahirane byo nta kibazo gihari ariko nibukorwe mu buryo buzwi.”

Bamwe mu bacuruzi bibumbiye muri koperative ‘Turwanye Inzara’, icuruza isambaza zumye bavuga ko iki cyemezo cyatangiye kubakoma mu nkokora ku buryo ubu inyungu babonaga yagabanutse.

Murekatete Yvonne ati “Urabona mbere bajyaga batuzanira isambaza, bamwe tubishyura none barabahagaritse. Ubu umusaruro ni mukeye. Nibura ntabwo naburaga amafaranga 500 ku munsi ariko ubu abana bari no kubura isosi.”

Musanabera Josephine we yavuze ko hari Abanye-Congo bahagaze kwinjiza isambaza kandi bari barahawe amafaranga batarishyura.

Yagize ati “Twasabaga ko bakongera bakabareka bakaza kuko badufitiye amadeni y’amafaranga twari twarabahaye mbrere ngo batuzanire isambaza.”

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza