Kwamamaza

Nyamasheke: Bahangayikishijwe n’umubare munini w’abangavu baterwa inda

Yanditswe kuya 28-11-2016 saa 12:56' na Sitio Ndoli


Bamwe mu babyeyi bo mirenge itandukanye mu karere ka Nyamasheke bahangayikishijwe n’abangavu baterwa inda bagasaba akarere ko kabafasha guhangana n’iki kibazo.

Aba babyeyi bavuga ko impamvu abana batwara inda bakiri bato bituruka ku bishuko bya bamwe mu basore biganjemo abarobyi babashukisha utuntu dutandukanye baba bataguriwe n’ababyeyi babo.

Mukanziza Immaculée ati “Abana bacu baraduhangayikishije, umwana aragera mu mashuri yisumbuye bagahita bamutera inda; akenshi biterwa n’abarobyi bashukisha abana bacu amandazi, amavuta n’ibindi badapfa kubona mu rugo.”

Ubushakashatsi bwakozwe n’Impuzamiryango y’amashyirahamwe yita ku burenganzira bwa muntu (CLADHO) muri 2015, bwagaragaje ko Nyamasheke iza ku mwanya wa 4 mu kugira umubare w’abana benshi baterwa inda bakiri bato nkuko bisobanurwa na Evariste Murwanashyaka, umukozi ushinzwe kurwanya ihohoterwa rikorerwa abana muri CLADHO.

Ati “Mu bushakashatsatsi twakoze akarere ka Nyamasheke kari ku mwanya wa kane ku rwego rw’igihugu mu turere dufite abana b’abangavu batwaye inda ari benshi, mu bana 818 twabonye, akarere ka Nyamasheke kihariye abasaga 88, bahwanye na 10,3%. Ni abana benshi ugereranyije n’uko twabikoreye mu mirenge ine."

Akarere kaje ku isonga mu kugira abangavu benshi batwara inda ni Huye yo mu Ntara y’Amajyepfo ikurikirwa na Kicukiro yo mu mujyi wa Kigali.

Umuyobozi ushinzwe uburezi mu murenge wa Kagano, Kwibuka Jean Damascene avuga ko mu murenge wabo byakunze kugaragara umwaka ushize mu kigo cy’ishuri cya Ishara.

Ati “Kimwe n’ahandi hose iki kibazo kirahari cyane cyane mu kagari ka Shara aho ishuri rituranye n’Ikivu, bigaterwa n’abarobyi.”

Police ikorera muri aka karere ivuga ko muri uku kwezi Ugushyingo 2016, bamaze kwakira Ibibazo by’abana batwaye inda bakiri bato bigera kuri bine.

Kabanda Joachim Ushinzwe uburinganire muri aka karere avuga ko bafite ingamba zo kurwanya iki kibazo zirimo gukumira, gutanga amakuru ku gihe, ubukangurambaga ku bigo by’amashuri n’ibindi.

Abana b’abakobwa baganiriye na IGIHE bavuga ko akenshi ababikora babiterwa n’uko hari ibyo basaba iwabo ntibabashe kubibaha kubera ubukene bigatuma iyo bahuye n’abasore babibaha.

Uwiduhaye Esther yagize ati “Urebye hari igihe tutihanganira ubuzima tubayemo mu rugo kuko benshi tuba dukennye maze wahura n’umusore akakugurira ikintu umubyeyi atabona maze akagiheraho agushuka.”

Abayobozi bafite aho bahuriye n'ibijyanye no kurwanya ihohoterwa ubwo bahuraga n'aba CLADHO harebwa uburyo iki kibazo cyahashywa

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved