Kwamamaza

Gen Nyamvumba yibukije abayobozi ba gisirikare uburyo bwo gutsinda ibibazo by’umutekano

Yanditswe kuya 2-11-2016 saa 13:07' na IGIHE


Umugaba w’Ingabo z’u Rwanda, Gen Patrick Nyamvumba, yagaragaje ko imiterere y’ibibazo by’umutekano Afurika ifite muri iki gihe ikeneye ko hahuzwa imbaraga mu guhangana nabyo, kurusha uko igihugu cyareba gusa ku kuzamura ubushobozi bwacyo.

Ubwo yatangizaga inama ngarukamwaka y’abayobozi b’amashuri makuru ya gisirikare muri Afurika, kuri uyu wa Gatatu, Gen Nyamvumba yavuze ko igamije gushaka uburyo amashuri ya gisirikare yatanga umusanzu mu kubaka ubunyamwuga bw’ingabo, binyuze mu masomo atanga ubumenyi buhagije n’amahugurwa.

Yavuze ko izafasha mu igerwaho ry’intego z’Umuryango w’Abayobozi b’Amashuri Makuru ya Gisirikare (ACoC, African Conference of Commandants of Staff Colleges), zirimo guhuza imikorere n’ubufatanye bw’amashuri makuru ya gisirikare muri Afurika no kugira uruhare mu mutekano wa Afurika binyuze mu burezi butanga ubumenyi bukenewe n’amahugurwa.

Ati “Nizera ko imyanzuro yafatiwe mu nama zabanje yagize uruhare rukomeye mu gushaka ibisubizo ku bibazo by’umutekano ingabo zacu zihura nabyo mu kugarura amahoro kuri uyu mugabane. Imiterere n’ingaruka z’ibi bibazo by’umutekano bisaba imbaraga zihurijwe hamwe ngo dushake igisubizo gishoboka no gutera intambwe yo kubishyira mu bikorwa,’’

“Ni ngombwa ko dukomeza guteza imbere ibiganiro hagati y’ibihugu bya Afurika n’abafatanyabikorwa babyo, hagamijwe gushyiraho uburyo bwafasha mu guteza imbere gahunda zishyirwaho n’uturere cyangwa umugabane, aho kwita gusa ku bushobozi bw’ibihugu byacu.’’

Gen Nyamvumba yavuze ko aba bayobozi barushaho guhanahana ubumenyi buzafasha abasirikare bazajya mu butumwa bw’amahoro mu bihe biri imbere kumva ibibazo umugabane ufite n’uburyobwo kubyitaho.

Ati “Ibi ndabivuga nshingiye ku bunararibonye mfite mu Muryango w’Abibumbye, aho twari dufite umubare munini w’ibihugu byatanze ingabo, ariko imwe mu mbogamizi nabonye muri ubwo butumwa ni ukubura uguhuza ibikorwa byacu, kandi nk’Abanyafurika iyo turi kugerageza gukemura ibibazo bya Afurika, umuntu yatekereza ko byakoroha cyane ariko siko biri.’’

Umuvugizi w’Ingabo z’u Rwanda Lt Col Rene Ngendahimana yavuze ko ari ubwa mbere inama nk’iyi ibereye mu Rwanda, aho buri mwaka bahura bakareba uko bahuza imikorere n’ubundi bunararibonye mu bikorwa bya gisirikare.

Ati “Ni ukugira ngo barusheho guhuza amasomo batanga n’integanyanyigisho bakoresha mu mashuri yabo atandukanye, bifasha kugira ngo aho duhurira mu bikorwa rusange bitworohereze, kuba ingabo ziturutse mu bihugu bitandukanye zishobore kuba zakorana. Ibyo bigafasha ngo habe hakemurwa ibibazo bitandukanye by’umutekano ku Isi no muri Afurika by’umwihariko.’’

Iyi nama y’iminsi ibiri yitabiriwe n’abayobozi b’amashuri makuru ya gisirikare bagera kuri 40 baturutse mu bihugu bitandukanye muri Afurika.

Abayobozi b'amashuri ya gisirikare atandukanye muri Afurika bari bitabiriye iyi nama y'iminsi ibiri
Iyi nama igamije kwiga uburyo hahuzwa ubumenyi butangwa n'amashuri ya gisirikare mu kubaka ubunyamwuga
Maj Gen Jean Bosco Kazura uyobora Ishuri rikuru rya Gisirikare
Umugaba Mukuru w'Ingabo z'u Rwanda, Gen Patrick Nyamvumba yavuze ko ibihugu bikwiye gufatanya aho kwita ku bushobozi bw'igihugu ukwacyo
Nyuma yo gutangiza iyi nama, abayitabiriye bafashe ifoto y'urwibutso
Gen Nyamvumba aganira na bamwe mu bitabiriye iyi nama barimo na Maj Gen Kazura

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved