Nyange: Hashyinguwe imibiri 242 y’abazize Jenoside yakorewe Abatutsi

Yanditswe na Cyprien Niyomwungeri
Kuya 19 Mata 2017 saa 03:52
Yasuwe :
0 0

Abanyarwanda bakomeje ibikorwa byo kwibuka ku nshuro ya 23 Jenoside yakorewe abatutsi, aho kuri uyu wa Gatatu tariki 19 Mata 2017 mu rwibutso rwa Nyange mu karere ka Ngororero hashyinguwe mu cyubahiro imibiri 242 y’abazize Jenoside.

Urwibutso rwa Nyange rushyinguyemo imibiri 2478 yiganjemo abari bahungiye muri Kiliziya ya Paruwasi ya Nyange, Padiri Athanase Seromba wayiyoboraga agatanga itegeko ryo kubica bayibasenyeyeho.

Abatanze ubuhamya n’ibiganiro muri uyu muhango bagarutse ku bugome bwa Padiri Seromba watanze uburenganzira bwo gusenya Kiliziya kugira ngo abatutsi bari bayihungiyemo bose bapfiremo.

Perezida wa Sena, Bernard Makuza, yavuze ko kwibuka ari umwanya wihariye Abanyarwanda biyemeje ngo basubize icyubahiro abazize Jenoside yakorewe Abatutsi muri 1994.

Yagize ati “Twateraniye hano rero uyu munsi kugira ngo twunamire, duhe icyubahiro gikwiye Abazize jenoside yakorewe Abatutsi bakorewe ibidakwiye icyiremwa muntu, bicwa mu buryo bwuzuye ubugome ndengakamere. Turabibuka kandi turabunamiye mu cyubahiro bakwiye.”

Yasabye abanyarwanda kuzirikana ko hakiri abagerageza kumvikanisha ko Jenoside yakorewe Abatutsi itateguwe bakabikora mu mugambi wa Jenoside, bagateganya kuyihakana no kuyipfobya, ari nako bagerageza gusibanganya ibimenyetso.

Makuza yakomoje ku mateka ya Nyange by’umwihariko ay’abana banze amacakubiri, bagahamya ko ari Abanyarwanda, kugera n’aho guhara ubuzima bwabo bakinangira ku bacengezi babategekaga kwireba mu moko.

I Nyange hafite amateka akomeye kuko Padiri Athanase Seromba yatanze itegeko ryo kwica Abatutsi bari bamuhungiyeho muri Kiliziya, bayibasenyeraho. Abasaga ibihumbi bibiri bayibasenyeyeho hifashishijwe imashini zisenya.

Muri 2008, Seromba yahanishijwe igifungo cya burundu n’urukiko mpuzamahanga mpanabyaha rwashyiriweho u Rwanda (TPIR). Guhera 2009, afungiye muri gereza ya Akpro-Missérété, i Porto Novo mu murwa mukuru wa Benin.

Urwibutso rwa Nyange ruherutse gushyirwa ku rwego rw’igihugu, imwe mu mpamvu yashingiweho ni ukuba umuyobozi wa kiliziya ku rwego rwa Padiri ategeka ko bayisenyera ku batutsi bari bayihungiyemo.

Perezida wa Sena, Bernard Makuza ashyira indabo ku mva zishyinguyemo abazize Jenoside i Nyange
Perezida wa Sena, Bernard Makuza yunamiye abazize Jenoside i Nyange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244