Nyanza: Ibyumba by’amashuri 251 bikeneye gusimbuzwa, 220 bikavugururwa

Yanditswe na Prudence Kwizera
Kuya 16 Mutarama 2018 saa 07:08
Yasuwe :
0 0

Ubuyobozi bw’Akarere ka Nyanza butangaza ko hakenewe gusimbuzwa ibyumba by’amashuri 251 kuko bishaje cyane hakavugururwa ibigera kuri 220 kugira ngo kagire ibikorwaremezo by’uburezi bihagije.

Byagaragajwe kuri uyu wa 15 Mutarama 2018, ubwo hafungurwaga ibyumba by’amashuri bishya 31 n’ubwihereo 36 biherutse kubakwa mu bigo by’amashuri biri mu mirenge itandukanye y’Akarere ka Nyanza.

Umuyobozi w’Akarere ka Nyanza, Erasme Ntazinda, yavuze ko bateganya ko byose bizaba byarangiye muri 2020, ariko uko ubushobozi buzajya buboneka bazajya bahera ahihutirwa mu rwego rwo guteza imbere uburezi.

Yagize ati “Muri rusange ibyumba by’amashuri bikeneye gusimbuzwa bigera kuri 251 hakaba n’ibindi 220 bikeneye gusanwa. Gahunda ni uko bizakorwa mu myaka itatu iri imbere bikaba birangiye ariko byose biraturuka ku bushobozi bw’igihugu kuko ni ku bufayanye bwa REB kuko ni yo idufasha cyane cyane mu bikoresho abaturage na bo bagashyiraho umuganda wabo”.

Bamwe mu baturage bo mu Karere ka Nyanza bavuga ko bishimira ko amashuri ari kuvugururwa kugira ngo abana babo bigire ahantu heza hadateye impungenge, kandi na bo biteguye gukomeza gutanga umuganda wabo muri ibyo bikorwa.

Guverineri w’Intara y’Amajyepfo, Marie Rose Mureshyankwano, yasabye abanyeshuri, ababyeyi n’abarezi gufata neza ibyumba by’amashuri kandi yibutsa ababyeyi ko nta mwana n’umwe ukwiye kuvutswa amahirwe yo kwiga.

Ati “Turashimira ababyeyi uruhare runini bagize kugira ngo aya mashuri tumaze gutaha aboneke, icyo nabasaba ni ukuyafata neza, aya mashuri kugira ngo yubakwe hakoreshwa imbaraga nyinshi; kuyafata neza ni inshingano ya buri wese.”

Muri icyo gikorwa ababyeyi bibukijwe ko itangira ry’amashuri ryegereje bityo ko bagomba gutegura abana babo bakagera ku ishuri ku gihe kandi bakabashakira ibyangombwa byose bikenewe kugira ngo bige neza.

Guverineri w'Intara y'Amajyepfo, Mureshyankwano Marie Rose hamwe n'abandi bayobozi mu gikorwa cyo gufungura ibyumba by'amashuri bishya
Ababyeyi, abarezi n'abanyeshuri basabwe gufata neza ibyumba by'amashuri bubakiwe
Bimwe mu byumba by'amashuri biherutse kubakwa mu Karere ka Nyanza
Ibyumba by'amashuri bishya byatashywe birimo intebe nshya

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza