Nyanza: Minisitiri Mukeshimana yijeje gukemura ibibazo by’abaturage bataka gukeneshwa

Yanditswe na Prudence Kwizera
Kuya 22 Gicurasi 2019 saa 11:56
Yasuwe :
0 0

Minisitiri w’Ubuhinzi n’Ubworozi, Dr Mukeshimana Gérardine, yijeje abaturage bo mu Karere ka Nyanza ko ibibazo bagaragaje birimo gukeneshwa bitewe n’umushinga bazaniwe ukorwa nabi ndetse no kubura ifumbire n’imbuto bigiye gukemuka.

Ni ibibazo bamwe mu batuye mu Murenge wa Rwabicuma bagaragaje birimo ko bafite inzara n’ubukene batewe no gukodesha amasambu ya bo rwiyemezamirimo babihatiriwe n’ubuyobozi ku nzego z’ibanze abandi bakabura ifumbire n’imbuto byo guhinga mu materasi y’indinganire bakorewe.

Muri Nzeri 2015 bakorewe amatarasi y’indinganire mu masambu ya bo ku buso bwa hegitari zigera kuri 300 ndetse batunganyirizwa n’urugomero ruri ku buso busaga hegitari 30 rufasha kuvomera imibande n’imusozi.

Bavuga ko ibyo bikorwa bari babyitezeho iterambere ariko kuri bamwe atari ko byagenze kuko hari abategetswe gukodesha amasambu ya bo rwiyemezamiromo ku ngufu babura aho bahinga.

Abafite amasambu ahagana mu kabande kari mu Kagari ka Gishike bavuga ko bategetswe n’ubuyobozi bw’inzego z’ibanze kuyakodesha rwiyemezamirimo batabishaka ngo ahingemo urusenda.

Nyiragwiza Angelique ati “Urebye kuhatanga ni nk’agahato kuko abayobozi barakubwira ngo uyu murima niba utawutanze ngo bawuhingemo urusenda ntabwo wemerewe kuwuhinga. Turababaye kuko niba barahatwambuye natwe twari kuhahinga nk’ibyo bigori abana bacu bakarya tugatera imbere.”

Nyiragwiza avuga ko isambu ya bo bayikodesha amafaranga ibihumbi 12 ku mwaka ariko ko hari igihe bayihingagamo ibigori bahasaruraga imifuka ine cyangwa itanu bakabona ibyo kurya bakanagurisha.

Bamwe mu bahafite amasambu bakodesheje bifuza ko bayasubizwa na bo bakayahinga kuko n’umushoramari uhafite yaje avuga ko azahahinga urusenda ariko igice kimwe ahingamo ibigori.

Mukarwego Ancille ati “Urabona ko na bo bahinga urusenda agace gato ubundi bakihingira indi myaka bashaka nk’uko natwe twari kujya tuyihinga. Hari n’igihe hose bahahinze ibigori bagasarura imodoka zigatunda kandi abana bacu bari kuburara kandi natwe twakagombye kubihahinga bakarya.”

Bavuga ko bababazwa no kuba amasambu ya bo batakiyahinga ahubwo bakaba batunzwe no guca inshuro bahingira rwiyemezamirimo wahafashe.

Bemeza ko bagerageje kubwira ikibazo cya bo abayobozi ku nzego z’ibanze bababwira ko ibyakozwe ari itegeko. Gusa bamwe bavuga ko umwaka n’urangira bazajyamo bagahinga aho kugira ngo abana babo bakomeze kwicwa n’inzara.

Uwitwa Ntizikwira Félix we yasabye ko ubuyobozi bwakwiga neza ikibazo bafite kuko umushinga babazaniye wabakenesheje kandi bari bawitezeho inyungu.
Muri uwo murenge wa Rwabicuma hari ikindi gice cyakozwemo amaterasi y’indinganire ariko akaba yarabaye ibihuru kuko ba nyiri imirima bavuga ko babuze imbuto n’ifumbire.

Minisitiri w’Ubuhinzi n’Ubworozi, Dr Mukeshimana Géradine, yabijeje ko ibibazo bya bo bigiye gushakirwa ibisubizo abafite amasambu bakayahinga abashaka gukodesha bakabikora ku bushake bwabo nta gahato.

Ati “Ntabwo ntekereza ko hari umuntu wakodesha ubutaka bwe ku gahato; wenda hari igihe abantu batangira ibintu bagera hagati bakumva babibavamo, turi hariya wumvise ko bavuze ngo uwakodesha ubutaka yatanga angahe? Tuzareba amasezerano bagiranye abe ari yo bubahiriza.”

Dr Mukeshimana yijeje n’abafite ikibazo cy’ifumbire n’imbuto ko kigiye gushakirwa igisubizo kirambye.

Ati “Twimvikanye ko tugiye kubashakira imbuto y’igishoro batangire. Bagaragaje ko ifumbire y’imborera na cyo ari ikibazo twumvikanye ko bishyira hamwe […] kugira ngo aya materasi abyazwe umusaruro tugiye kureba uko twakora igikumba noneho kibe cyajyamo inka babe babona ifumbire.”

Yongeyeho ko bazagirana amasezerano kugira ngo izo nka zigera kuri 50 zizashyirwa mu gikumba zifatwe neza zitange umusaruro.

Ubukungu bw’Akarere ka Nyanza bushingiye ahanini ku buhinzi n’ubworozi; hahingwa ibihingwa bitandukanye birimo, umuceri, ibigori, imyumbati, urusenda ndetse n’ibindi.

Minisitiri Mukeshimana yijeje abaturage bo mu Murenge wa Rwabicuma ko ibibazo bafite bigiye gushakirwa ibisubizo
Minisitiri w'Ubutegetsi bw'Igihugu, Prof Shyaka Anastase, yabwiye abaturage ko bakwiye gukorera hamwe no guhanira kugera ku iterambere
Igice kimwe cy'imirima yakodeshejwe gihinzemo urusenda naho ikindi gihinzemo ibigori
Mu Murenge wa Rwabicuma batunganyirijwe urugomero ruri ku buso busaga hegitari 30 rufasha kuvomera imibande n’imusozi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza