Kwamamaza

Nyaruguru: Abagore baracyavunwa n’imirimo itishyurwa ntinahabwe agaciro

Yanditswe kuya 3-11-2016 saa 20:49' na Prudence Kwizera


Nubwo Leta y’u Rwanda n’abafatanyabikorwa bayo, yashyizeho gahunda zitandukanye zigamije gufasha abagore kuva mu bwigunge no kuyoboka ibikorwa bibyara amafaranga, hari bamwe bagiheranwe n’imirimo yo mu rugo ivunanye kandi idahabwa agaciro n’abagabo kuko itinjiza amafaranga.

Bamwe mu bagore bo mu murenge wa Nyabimata bavuga ko bakivunwa n’imirimo yo mu rugo kuko batabona ikindi bakora kibateza imbere.

Ubwo Umunyamakuru wa IGIHE yahuraga n’umugore witwa Rose Uzamushaka, utuye mu kagari ka Ruhinda, yikoreye umutwaro w’ibyatsi uremereye, akuruye ihene ebyiri mu ntoki, ahetse n’umwana mu mugongo, yamubwiye ko ari uko babaho mu buzima bwabo bwa buri munsi.

Yagize ati “None naba ntakoze abana banjye bakarya iki? Ni uko nyine twiberaho nibwo buzima nta kundi byagenda”.

Uzamushaka yari avuye guhinga kuko hari ku isaha ya saa saba irenzeho iminota micye, ari kumwe n’abana be babiri umwe uri mu kigero cy’imyaka icyenda wikoreye inkwi n’undi ufite imyaka nka 12 wikoreye umutwaro w’ibyatsi bigaragara ko bananiwe cyane.

Uzamushaka uri mu kigero cy’imyaka 40 avuga ko afite abana umunani kandi ko ari we ukora imirimo yo mu rugo wenyine, rimwe na rimwe agafashwa n’abana be, kuko umugabo we akenshi aba yagiye gushakisha amafaranga hirya no hino.

Usibye Uzamushaka, na bamwe mu bagore batuye mu murenge wa Ruheru, mu Karere ka Nyaruguru, bavuga ko guhugira mu mirimo yo mu rugo gusa bibavunisha bagasaza imburagihe.

Mathilde Mukankaka utuye mu kagari ka Uwumusebeya ati “Jyewe mbana n’umugabo ufite undi mugore ku buryo nigeze gutwita inda ingwa nabi ndetse no mu kubyara ntiyanyitaho, ubu se ntubona ko nashaje nkiri muto? Kwa muganga bambwiye ko ikibazo cy’inda nagize cyatewe n’imirimo myinshi ivunanye nkora, bangira inama ko ngomba kuyigabanya”.

Ubushakashatsi bwakozwe na ActionAid mu 2015, bwagaragaje ko abagore 91% bo mu Rwanda bakora imirimo idahabwa agaciro, itanahemberwa nk’akazi ka buri munsi.

Ubu bushakashatsi bwerekanye ko 41% by’igihe cya buri munsi cy’abagore bakimarira mu mirimo irimo gutora inkwi no kuvoma amazi, ibintu bigaragaza ko hakiri umubare munini w’abanyarwandakazi bakora imirimo idahabwa agaciro kandi nyamara itwara umwanya wagakozwemo indi ibyara inyungu rusange mu iterambere ry’igihugu.

Umuhuzabikorwa w’uyu mushinga, Anathole Uwiragiye, avuga ko batangiye ibikorwa birimo guha abagore amatungo, ibigega bifata amazi, amarerero y’abana, amahugurwa, kubahuza n’inzego zifata ibyemezo n’ibindi.

Ibi ngo bizafasha umugore kuva mu bukene ndetse n’inzego zifata ibyemezo zibe zakomeza gushyiraho uburyo n’amategeko birengera umugore, binamuha amahirwe yo kwiteza imbere.

Depite Athanasie Gahondogo, ubwo yifatanyaga n’abaturage bo mu Karere ka Gisagara kwizihiza Umunsi Mpuzamahanga w’Umugore wo mu Cyaro, kuwa 15 Ukwakira 2016, yavuze ko Leta iri kugenda ishyiraho gahunda zigamije kubateza imbere no kuborohereza imirimo ibavunisha, ariko na bo abasaba kwitinyuka bakayoboka ibikorwa bibyara amafaranga, bahereye mu matsinda mato yo mu midugudu.

Yagize ati “Abagore bari mu matsinda mwababonye ukuntu bacyeye, umuntu utagira itsinda rwose akwiye kwihutira kurijyamo kuko ni inzira nziza yo kugira ngo twese dushobore gutera imbere”.

Uzamushaka ari kumwe n'umwana we bavuye guhinga

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved