Nyaruguru: Abimuwe ahari guhingwa icyayi barasaba guhabwa ibyo basezeranyijwe kuko bafite inzara

Yanditswe na Prudence Kwizera
Kuya 23 Nzeri 2017 saa 07:41
Yasuwe :
0 0

Abaturage bo mu tugari twa Gorwe mu Murenge wa Mata, na Ngeri mu Murenge wa Munini ho mu karere ka Nyaruguru bari batuye ahari guhingwa icyayi barasaba ubuyobozi kubahiriza amasezerano bagiranye bagahabwa ingurane zose z’imitungo yabo kuko kutabihabwa biri gutuma babura ibyo kurya.

Abimuwe ni abagera kuri 228 naho ubutaka bwabo burimo ubungana na hegitari ibihumbi bibiri buzubakwaho uruganda rw’icyayi n’ahandi hazahingwamo icyayi, bakaba baragiranye amasezerano n’ubuyobozi bw’Akarere ku bufatanye n’ikigo cy’igihugu gishinzwe kohereza mu mahanga ibikomoka ku buhinzi (NAEB).

Ubwo umunyamakuru wa IGIHE yageraga aho batujwe mu mudugudu mushya, bamugaragarije ko bishimira kuba barahawe inzu nziza zo kubamo ndetse bari kugezwaho n’ibikorwaremezo by’amajyambere ariko bafite ikibazo bitandukanye harimo no kubona ibyo kurya.

Bimwe mu bibazo bagaragaza harimo kuba inzu bahawe nta byangombwa byazo bafite ngo byitwe ko ari izabo koko babe bazitangaho n’ingwate muri banki igihe bashaka gufata inguzanyo ngo biteze imbere, ikindi bavuga ni uko ubuyobozi bwabemereye kubaha inka zo korora ndetse n’imirima yo guhinga mu gishanga ariko bikaba bidakorwa.

Ikindi kibazo bavuga bafite ni uko ngo hari bamwe batarabona amafaranga bemerewe y’ingurane y’imitungo yabo irimo imirima bari basanzwe bahinga ndetse n’ibindi bikorwa byari biyirimo.

Bavuga ko kudahabwa ibyo basezeranyijwe biri kubagiraho ingaruka zitandukanye nko gutungwa no guca inshuro kandi mu buzima bwabo batari barabyigeze.

Umwe mu babyeyi yagize ati “Duca inshuro nayo ntituyibone bakatwima n’akazi nta kintu tubona dukora nta hantu dufite dukorera, kera nari ntunzwe n’ibyanjye nari mfite amatungo ngafumbira nkabona ibyo abana barya. None ahangaha n’inkoko ndayihazana bakambwira ngo nyisohore mbe mu nzu gusa kandi mfite abana”.
“Twifuza ko baduha amafaranga yacu tukigurira amasambu yo guhinga; none se uzaba mu nzu utarya?”

Undi mukecuru uri mu kigero cy’imyaka 70 y’amavuko avuga ko inzu bamuhaye agiye kwicirwamo n’inzara kuko isambu ye bayitwaye kandi akaba adashoboye kujya gusaba akazi ahari guhingwa icyayi. Yifuza ko yahabwa amafaranga y‘aho bamwimuye akigurira isambu yo guhinga.

Ati “Ikimbangamiye ni uko ntabona icyo ndya, twifuza ko baduha amasambu yo gukoreramo tukareka kwicwa n’inzara. Nkajye sinabasha kujya gukorera amafaranga muri icyo cyayi.”

Umuyobozi w’Akarere ka Nyaruguru, Francois Habitegeko, avuga ko abo baturage bimuwe bazajya batungwa no guhabwa akazi mu ruganda rw’icyayi kandi mu minsi iri imbere buri wese azahabwa isambu yo guhingamo mu gishanga ndetse n’inka yo korora.

Habitegeko ati “Buri muturage tugiye kumuha inka, twabahaye igishanga ngo batere ubwatsi, ariko abenshi bazaba bakora mu cyayi kuko burya mu cyayi haba akazi kenshi, ari mu ruganda ubwaho no mu mirima, tuzabubakira n’isoko ndetse n’ishuri bya kijyambere”.

Yakomeja avuga ko abaturage bakwiye gutekereza byagutse ntibibwire ko bazatungwa n’ubuhinzi gusa.

Ati “Dukwiye kwigisha abantu bakava mu myumvire yo kumva ko umurimo ari uguhinga gusa, ibyo ni ibintu twizeho cyane mu mushinga twize ntabwo umurimo ari uguhinga gusa hari n’ibindi byagutunga udahinze cyangwa se ugahinga n’ahandi atari mukwawe. Ruriya ruganda ruzakoresha abantu basaga ibihumbi bitandatu, abo ni abaturage ba hariya, mu mirima y’ibyayi ubwaho hazaba harimo abantu batarenze ibihumbi bitatu”.

Amafaranga bagomba guhabwa yaratanzwe yose

Ku kibazo bamwe muri abo baturage bagaragaza ko hari amafaranga y’amasambu yo guhinga n’indi mitungo batahawe, ubuyobozi bw’Ikigo cy’igihugu gishinzwe kohereza mu mahanga ibikomoka ku buhinzi (NAEB) buvuga ko amafaranga yose bagomba kubishyura bamaze kuyabaha muri Kamena 2017.

Umuhuzabikorwa wa NAEB mu Ntara y’Amajyepfo, Alexis Nkurunziza, avuga ko umuturage waba afite ikibazo cyihariye cyo kuba wenda atarabonye amafaranga ye yakwegera umukozi wabo ukorera mu karere ka Nyaruguru akamurebera aho byapfiriye kigahita gikemurwa.

Hamwe mu hagiye guhingwa icyayi himuwe abaturage

Ati “Abaturage twimuye hariya imitungo yabo twarayibaruye ndetse n’amasambu, amafaranga y’inzu tububakiramo izindi nziza mu mudugudu naho ay’amasambu n’indi mitungo turayabishyura, twarangije kuyabaha mu kwezi kwa gatandatu, ubwo uwaba afite ikibazo cyihariye yakwegera umukozi wacu ku karere akamurebera icyo ari cyo kigakemurwa”.

Nkurunziza avuga ko atunguwe no kumva ko hari abaturage bavuga ko ntaho guhinga bafite kuko bababumbiye mu matsinda babaha igice kimwe cyaho bataratera icyayi ngo babe bahabyaza umusaruro.

Ati “Muri hegitari zigera kuri 800 tuzahingaho icyayi tumaze gukoresha izirenga 100 gusa, ahandi hasigaye twabumbiye baturage mu matsinda kugira ngo bajye bahahinga ibyo bashaka bibatunga”.

Mu ntangiriro z’Ukwakira inka bemerewe bazazihabwa

NAEB ivuga ko inka zo korora abo baturage bemerewe bazatangira kuzihabwa mu ntangiriro z’ukwezi gutaha kuko banze guhita bazibaha mu gihe cy’izuba ubwatsi bateye butarakura.

Umuhuzabikorwa wa NAEB mu karere ka Nyaruguru, Jovith Ngarambe yagize ati “Inka z’icyiciro cya mbere zigera ku 100 tuzazibaha bitarenze mu ntangiriro z’ukwezi gutaha k’Ukwakira kuko gahunda yo kuzibagezaho igeze kure”.

Mu kwezi kumwe barahabwa ibyangombwa by’inzu

Ngarambe akomeza avuga ko n’ikijyanye n’ibyangombwa by’inzu bubakiwe nabyo babigeze kure bikaba bitazarenza mu gihe cy’ukwezi kumwe batabibonye.
Yibutsa ko mu masezerano bagiranye harimo ko nta wemerewe kugurisha iyo nzu cyangwa kuyitangaho ingwate mbere y’imyaka itanu, kugira ngo hatagira uhubuka akayipfusha ubusa bikamugiraho ingaruka zo gusembera.

Kukijyanye no guha abo baturage amasambu yo guhingamo, NAEB ivuga ko bamaze guhabwa aho guhinga ubwatsi bw’amatungo n’uturima tw’igikoni kandi bakaba bari gushakirwa ibyangombwa byaho kugira ngo hitwe mu kwabo.

Inzu zubakiwe abimuwe mu tugari twa Gorwe na Ngeri zigera kuri 228 harimo izigera ku 100 zubatswe mu cyiciro cya mbere zamaze no gutahwa, zikaba zubatse ku buryo imwe izatuzwamo imiryango ine, ibyo bita ‘four in one’, ndetse n’izizatuzwamo imiryango ibiri ‘two in one’.

Ubuyobozi bw’akarere ka Nyaruguru buvuga ko impinduka yose isaba umwanya kandi hari bamwe badahita bayisangamo, bityo bakomeje gushyira ingufu mu kwigisha abaturage kugira ngo bumve ko ikigamijwe ari ukubazanira amajyambere no guhindura imibereho yabo ikarushaho kuba myiza.

Zimwe mu nzu zubakiwe abaturage bimuwe ahagiye guhingwa icyayi
Bamwe mu batuye muri izi nzu bavuga ko bari kuzicirwamo n'inzara kuko batagira amasambu yo guhinga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza