Nyaruguru: Abaturage basabwe kubuza amahwemo inshoreke zisenyera bagenzi babo

Yanditswe na
Kuya 10 Mutarama 2017 saa 11:02
Yasuwe : XX
0

Ubuyobozi bw’akarere ka Nyaruguru buvuga ko butewe impungenge n’ikibazo cy’ubuharike, aho hari abagabo bakomeje gushaka abagore benshi bigakurura amakimbirane n’ubukene mu miryango, bityo bukaba busaba abaturage gushyira hamwe bakajya birukana umugore wese uje gusenyera mugenzi we.

Umuyobozi w’Akarere ka Nyaruguru, François Habitegeko akunze gutanga ubutumwa nk’ubu iyo yahuye n’abaturage mu nama cyangwa mu muganda, akaba aherutse kubiganiraho n’abatuye mu murenge wa Ruheru.

Imibare itangwa n’ubuyobozi bw’umurenge wa Ruheru, yerekana ko mu ibarura baherutse gukora, basanze abagabo barenga 215 bafite abagore barenze umwe, hari n’aho usanga umugabo afite abagore batatu kandi nta n’umwe basezeranye imbere y’amategeko.

Umuyobozi w’Akarere ka Nyaruguru, yasabye abatuye muri uyu murenge yabasabye guhagarika ubuharike bushya, avuga ko abaturage bajya babiganiraho mu mugoroba w’ababyeyi, hagira umugabo uzana umugore wa kabiri bagahita bajya kumwirukana agasubira iwabo, akareka gusenyera mugenzi we.

Yagize ati “Rwose ndagira ngo mbabwire, mu mugoroba w’ababyeyi mujye mwicara, umuntu nazana umugore wa kabiri mubyuke mumutumura asubire iyo yavuye. Amategeko y’igihugu cyacu yemera umugabo umwe n’umugore umwe, ibindi byo ku ruhande ntabwo byemewe. N’inzego z’ibanze ndazikangurira ko umuntu najya azana inshoreke mujye mubyuka mumuhambiriza asubire iyo yavuye”.

Gusa Habitegeko asaba ko ibi byajya bikorwa ku bagore b’inshoreke bashya, naho abafite uburambe bakabihorera kuko byateza ibindi bibazo.

Ati “Ariko abaje kera ntimubiraremo, abo dufite uko tuzakemura ikibazo cyabo, ariko ubikora ubungubu tubahaye uburenganzira rwose kandi tuzabisobanura”.

Mu Karere ka Nyaruguru, ubuyobozi butangaza ko nta barura rirakorwa ngo hamenyekane uko iki kibazo gihagaze, gusa ngo hakunze kwakirwa ibibazo bishingiye ku buharike n’ubushoreke ndetse n’iby’abana bakomoka ku miryango ibana itarasezeranye imbere y’amategeko.

Bamwe mu baturage bo mu murenge wa Ruheru, na bo bemeza ko ikibazo cy’ubuharike gihari kandi giteza umutekano muke mu ngo kikadindinza n’iterambere.
Mathilde Mukankaka utuye mu kagari ka Uwumusebeya yavuze ko abana n’umubago ufite abagore babiri, bikaba bimugiraho ingaruka mu mibereho ye n’abana.

Ati “Umugabo wanjye yashatse undi mugore, ku buryo hari ubwo mara nk’ukwezi kose ntamubona, (…) nigeze kugira ikibazo ntwita inda ingwa nabi, ntiyanyitaho kuko yiberaga ku nshoreke ye, ku buryo nagiye no kwa muganga mfashwa n’abandi bagore tubana mu itsinda, narinze mva kwa muganga umugabo atarangeraho na rimwe”.

Abaturage basanga ibyo basabwa n’ubuyobozi batabishobora

Bamwe mu batuye mu murenge wa Ruheru, babwiye IGIHE ko ibyo basabwa n’Umuyobozi w’Akarere byo kujya kwirukana abagore b’inshoreke batabibasha, ahubwo ubuyobozi aribwo bwajya bubikora.

Julienne Nyirabera ati “Twebwe koko nitwe twabirukana? Reka da! Ubu umugabo yazana umugore nkamwirukana? Twebwe uko tubibona keretse ubuyobozi budufashije bukabirwanya ubwabo kuko twebwe nta bushobozi dufite, naho ubundi ubuharike ino buracyahari cyane”.

Nubwo abatuye Nyaruguru bavuga ko kujya kwirukana umugore w’inshoreke bitaborohera, mu Karere ka Gisagara bihana imbibi, abagore bo mu murenge wa Gishubi bashyizeho itsinda rishinzwe kubikora kandi bemeza ko biri gutanga umusaruro kuko kuva babitangira hashize hafi umwaka nta mugabo wo muri uwo murenge urongera guharika umugore.

Umuyobozi w'Akarere ka Nyaruguru, Habitegeko asaba abatuye mu Murenge wa Ruheru kujya bitabira kwirukana abagore b'inshoreke
Bamwe muri aba baturage bavuze ko iyo nshingano batayishobora

prudence@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza