Nyaruguru: Uruganda rw’icyayi rwa Mata rwibutse Jenoside yakorewe Abatutsi ruremera abarokotse batishoboye (Amafoto)

Yanditswe na Prudence Kwizera
Kuya 29 Mata 2019 saa 01:29
Yasuwe :
0 0

Uruganda rw’icyayi rwa Mata (Mata Tea Company) ruherereye mu Karere ka Nyaruguru, rwibutse ku nshuro ya 25 Jenoside yakorewe Abatutsi, ubuyobozi bwarwo bwizeza ko buzakomeza gufasha abaturage kubana neza no kwirinda amacakubiri.

Ni igikorwa cyabaye kuri iki Cyumweru tariki ya 28 Mata 2019 mu Murenge wa Mata aho rukorera, kibanzirizwa n’ijoro ryo kwibuka ryabaye ku wa Gatandatu.

Umuyobozi Mukuru Mata Tea Company, Kanyesigye Emmanuel, yavuze ko urwo ruganda rwigeze kugira abayobozi babi bigishije amacakubiri n’urwango, bigeza kuri Jenoside yakorewe Abatutsi muri Mata 1994.

Ati “Uru ruganda rwaranzwe n’amateka mabi ariko ndagira ngo mbamare impungenge ko ibyabaye bitazongera ukundi kuko ubuyobozi buriho buharanira icyateza imbere abakozi n’igihugu muri rusange, dusibanganya isura mbi abayobozi ba kera barwambitse.”

Kanyesigye yashimiye Leta y’u Rwanda yakuyeho ivangura ry’amoko, igatoza abaturage kunga ubumwe birinda amacakubiri.

Sebaganwa Guillaume warokokeye Jenoside mu Murenge wa Mata yatanze ubuhamya avuga uko gutoteza Abatutsi byatangiye mu 1959 mu kazi no mu mashuri kuko bahezwaga.

Ati “Muri uru ruganda ho byari bikomeye abakozi bigishwaga kwanga Abatutsi ku buryo wabonaga ko ari imyiteguro y’ikintu kibi kizakorwa. Byarangiye rero habaye Jenoside yakorewe Abatutsi.”

Umuyobozi w’Akarere ka Nyaruguru, Habitegeko François, yashimye uburyo buri mwaka ubuyobozi bwa Mata Tea Company butegura igikorwa cyo kwibuka jenoside yakorewe Abatutsi.

Ati “Ni igikorwa bakora buri mwaka kandi ukabona ko bagihaye agaciro, ukabona ko batandukanye n’ubuyobozi bwishe abakozi barwo n’abaturanyi. Ubuyobozi buhari ubu ni ubuyobozi bwifuriza ineza abantu bose.”

Senateri Mukakalisa Jeanne d’Arc yavuze ko kwibuka ari uguha agaciro abazize Jenoside ariko ari n’umwanya wo kwisuzuma.

Ati “Kwibuka biduha imbaraga zo kongera kubaka u Rwanda rushya ruzira urwango, ivangura n’amacakubiri.”

Muri icyo gikorwa cyo kwibuka haremewe abantu bane bacitse ku icumu rya Jenoside batishoboye, buri wese ahabwa inyana nziza.

Umwe mu bahawe inka witwa Mukamuzungu Ancille yavuze ko uruganda rwa Mata Tea Company rubafitiye akamaro kuko rwita ku iterambere ry’abaturage.

Ati “Ni uruganda rwiza cyane rumenya abapfakazi n’imfubyi naho urwa kera rwari urw’abicanyi”.

Mu rwibutso rwa Jenoside rwa Mata Tea Company haruhukiye imibiri y’abazize Jenoside irenga 386 harimo igera kuri 11 bashyinguwe ubwo bibukaga kuri iki Cyumweru.

Abayobozi batandukanye bitabiriye igikorwa cyo kwibuka Jenoside yakorewe Abatutsi muri Mata Tea Company
Bamwe mu bakozi ba Mata Tea Company n'abandi baje kwifatanya na bo kwibuka ku nshuro ya 25 Jenoside yakorewe Abatutsi
Benshi bakozwe ku mutima n'ubuhamya bwa Sebaganwa Guillaume
Hashinguwe mu cyubahiro imibiri 11 y'abazize Jenoside iherutse kuboneka
Hashyizwe indabo ku rwibutso nk'ikimenyetso cyo guha icyubahiro abazize Jenoside
Hasobanuwe ko Jenoside yakorewe Abatutsi muri Mata Tea Company no mu nkengero zaho yakoranywe ubugome n'ubukana
Mu rwibutso rwa Jenoside rwa Mata Tea Company haruhukiye imibiri y’abazize Jenoside irenga 386
Sebaganwa Guillaume warokokeye Jenoside mu Murenge wa Mata yatanze ubuhamya
Senateri Mukakalisa Jeanne d’Arc yavuze ko kwibuka ari uguha agaciro abazize Jenoside yakorewe Abatutsi
Umuhanzi Munyenshoza Dieudonne yifatanyije na Mata Tea Company kwibuka Jenoside yakorewe Abatutsi
Umuhanzi Uwingabire Jeanne yaririmbye indirimbo zifasha ababuriye ababo i Mata kwibuka
Umuyobozi Mukuru Mata Tea Company, Kanyesigye Emmanuel, yavuze ko Jenoside itazongera ukundi kuko baharanira icyateza imbere abaturage n’igihugu muri rusange
Umuyobozi Mukuru Mata Tea Company, Kanyesigye Emmanuel, yunamiye abazize Jenoside bashyinguye mu Rwibutso rwa Jenoside rwa Mata Tea Company
Umuyobozi Mukuru wa Mata Tea Company, Kanyesigye Emmanuel
Umuyobozi w’Akarere ka Nyaruguru, Habitegeko François, atanga ubutumwa
Umuyobozi w’Akarere ka Nyaruguru, Habitegeko François ashyira indabo ku rwibutso rwa Jenoside rwa Mata Tea Company
Umuyobozi w'Inama y'Ubutegetsi ya Mata Tea Company, Niyibizi Bonaventure
Urubyiruko rwafatanye urunana nk'ikimenyetso kigaragaza kunga ubumwe
Abaturage basabwe kubohoka bagatanga amakuru y'ahaba hakiri indi mibiri kugira ngo na yo ishyingurwe mu cyubahiro
Habaye n'igikorwa cyo koroza inka abarokotse Jenoside batishoboye
Abarojwe inka bavuze ko bagiye kuzifata neza zigahindura imibereho ya bo
Abayobozi batandukanye bitabiriye ijoro ryo kwibuka Jenoside yakorewe Abatutsi, ryabereye ku ruganda rw'Icyayi rwa Mata
Amwe mu mazina y'abazize Jenoside bashyinguwe mu Rwibutso rwa Jenoside rwa Mata Tea Company
Bamwe mu bakozi ba Mata Tea Company bitabiriye ijoro ryo kwibuka Jenoside yakorewe Abatutsi
Bamwe mu rubyiruko rw'abanyeshuri bitabiriye ijoro ryo Kwibuka
Hacanwe urumuri rw'icyizere mu kwibuka abazize Jenoside
Habitegeko ashyira indabyo ku Rwibutso rwa Jenoside yakorewe Abatutsi mu 1994 rwa Mata
Umuyobozi Mukuru Mata Tea Company, Kanyesigye Emmanuel, ashyira indabyo ku rwibutso
Umuyobozi Mukuru wa Mata Tea Company, Kanyesigye Emmanuel, ubwo yagezaga ijambo ku bitabiriye ijoro ryo kwibuka ku nshuro ya 25 Jenoside yakorewe Abatutsi
Umuyobozi w’Akarere ka Nyaruguru, Habitegeko François, yashimye Uruganda rw'Icyayi rwa Mata rwateguye iki gikorwa
Urubyiruko rwasabwe gukurana umuco wo gukundana rwirinda amacakubiri n'urwango
Urubyiruko rwasomye amazina ya bamwe mu bibukwa bazize Jenoside
Umuhanzi Uwingabire Jeanne yaririmbye mu ijoro ryo kwibuka abazize Jenoside muri Mata tea Company

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza