Nyayagatare: Babiri barakekwaho gutera icyuma umumotari, bakamwiba moto

Yanditswe na Bukuru JC
Kuya 20 Werurwe 2017 saa 06:24
Yasuwe :
0 0

Abagabo babiri bafungiwe kuri Sitasiyo ya Polisi ya Mimuri, Akarere ka Nyagatare bakekwaho kwiba moto y’umumotari witwa Kabeza nyuma kumuniga no kumutera icyuma mu gatuza.

Umuvugizi wa Polisi y’u Rwanda mu Ntara y’i Burasirazuba, IP Emmanuel Kayigi, yasobanuye ko abo batawe muri yombi umwe afite imyaka 29 y’amavuko, undi akagira 40, bahohoteye umumotari yibereye mu kazi.

Yagize ati,"Ahagana saa moya za nimugoroba wo ku itariki 18 z’uku kwezi, ubwo Kabeza yarimo ashaka abagenzi mu Kagali ka Mahoro, ho mu murenge wa Mimuri, umwe yamuteze nk’umugenzi. Amaze kwicara kuri moto, yamunigishije intoki. Mu gihe barimo bagundagurana, undi yavuye aho yari yihishe amutera icyuma mu gatuza, acika intege, hanyuma agwa hasi."

IP Kayigi yakomeje avuga ko abaturage babibonye babimenyesheje Polisi y’u Rwanda ibafatira mu cyuho.

Turashima cyane abatanze amakuru yatumye aba bombi bafatwa. Ibi bigaragaza akamaro ko gutangira amakuru ku gihe no kumva ko kurwanya no gukumira ibyaha bitareba gusa inzego z’umutekano; ahubwo ko ari inshingano ya buri wese."
Yongeyeho ko uwo mumotari arimo kuvurirwa ku Kigo nderabuzima cya Mimuri. Naho dosiye y’abashinjwa ubwo bugizi bwa nabi arashyikirizwa Ubushinjacyaha kuri uyu wa Mbere.

Ubujura bukoreshejwe intwaro buhanishwa igifungo kuva ku myaka itandatu (6) kugeza ku myaka umunani (8), nk’uko biteganywa n’ingingo ya 304 yo mu gitabo cy’amategeko ahana ibyaha mu Rwanda.

Iyi ngingo ivuga ko ubujura bukoreshejwe intwaro ari ubujura bukozwe n’umuntu witwaje igikoresho icyo ari cyo cyose, icyuma cyangwa ikindi kintu cyose gitema, gitobora cyangwa gisekura, gishobora kwica, gukomeretsa cyangwa gukubitishwa.

IP Kayigi yasabye abatwara abagenzi kuri moto kurangwa n’ubushishozi ati," Mu bagenzi hashobora kubamo abagizi ba nabi. Igihe cyose mugize uwo mukekaho ibyaha runaka, mujye mwihutira kubimenyesha Polisi y’u Rwanda n’izindi nzego zibishinzwe."


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza