Kwamamaza

Nyuma y’imyaka 5 ishinzwe, RBC yahawe Umuyobozi w’Inama y’Ubutegetsi

Yanditswe kuya 12-11-2016 saa 16:37' na Philbert Hagengimana


Nyuma y’imyaka yari ishize Ikigo cy’Igihugu gishinzwe ubuzima (RBC) kitagira Umuyobozi w’Inama y’Ubutegetsi, inama y’Abaminisitiri yo kuri uyu wa 11 Ugushyingo yashyize kuri uwo mwanya Prof. Philip Cotton, usanzwe ari Umuyobozi Mukuru Wungirije wa Kaminuza y’u Rwanda.

Iteka uko ubuyobozi bwa RBC bwitabaga Komisiyo y’Abadepite ishinzwe gukurikirana imikoreshereze y’imari n’umutungo wa Leta (PAC) ngo bisobanure ku makosa agenda agaragazwa muri raporo y’Umugenzuzi Mukuru w’Imari ya Leta, hagaragazwa ko muri icyo kigo harimo ibibazo by’imiyoborere bishamikiye ku kuba ku miterere y’Inama y’Ubuyobozi.

Ubwo kuwa 15 Nyakanga 2015 PAC yatumizaga icyo kigo ngo cyisobanure ku makosa yagaragaye muri raporo y’Umugenzuzi Mukuru w’Imari ya Leta mu 2013/2014, Umuyobozi wungirije w’inama y’Ubuyobozi ya RBC, Usta Kaitesi, yemereye abo Badepite ko icyo kigo kiyobowe ariko mu buryo budashimishije, anongeraho ati “Mbese isa (RBC) n’iyubatse ku musenyi.”

Mu gusobanura, Kaitesi yavuze ko ubuke bw’abakozi, guhinduranya abayobozi, ndetse n’inzego z’ubuyobozi zidakwije abayobozi kubera ko harimo benshi bakora ku buryo bw’agateganyo, bituma akazi katagenda neza.

Icyo gihe hasobanuwe ko inama y’ubuyobozi ifite abayobozi barindwi, ariko na bwo umwe muri bo akaba akorera hanze y’igihugu, ku buryo byatumaga gukora inama zigamije gufatirwamo imyanzuro bigorana kuko barindaga kuzikora mu buryo bw’amashusho (Tele-conference), ugasanga habamo ubukererwe bukabije mu gufata ibyemezo.

Icyo gihe abayobozi ba RBC basabye inzego zibishinzwe kugerageza zikabongerera umubare w’abakozi kugira ngo huzuzwe imyanya iburamo abantu, bityo n’akazi kagende neza, Abadepite bagize PAC bakaba barabijeje kubakorera ubuvugizi kugira ngo imyanya itarimo abakozi baboneke, n’indi itarimo abayobozi babahabwe.

Icyakora n’ubwo ibyo byakozwe, ibyo bibazo byongeye kugarukwaho kuwa 26 Nzeri 2016, ubwo RBC yongeraga kwitaba PAC ngo icyo kigo cyisobanure ku makosa yagaragajwe muri raporo y’Umugenzuzi mukuru w’Imari ya Leta mu 2014/2015, aho Usta Kaitesi, yasobanuye ko icyo kigo cyashinzwe hagati mu mwaka w’ingengo y’imari.

Mu gusobanura ikibazo cy’imikoranire, James Kamanzi, Umuyobozi wungirije wa RBC yagaragaje ko byaturutse ahanini ku kuba Inama y’Ubutegetsi yarashyizweho nyuma y’ikomatanywa ry’ibyo bigo, aho yashyizweho ku wa 8 Ugushyingo 2011, hakaba hari hasigaye amezi atageze kuri ane ngo inzibacyuho y’umwaka umwe yari yahawe irangire.

Ibyo kandi byabaye mu gihe RBC nta n’umuyobozi yari yabona kuko uwo ifite yamuhawe muri Gashyantare 2016, ariko kuva ibyo byose byaba, icyo kigo kikaba nta muyobozi w’Inama y’Ubutegetsi cyari gifite.

Iki kigo cyahawe abagize Inama y’Ubutegetsi, iyobowe na Prof. Philip Cotton, wungirijwe na Dr. Etienne Karita, usimbuye Uster Kaitesi.

Inama y’Ubutegetsi ya RBC igizwe na Prof. Philip Cotton (Umuyobozi), Dr. Etienne Karita (Umuyobozi wungirije), Dr. Charlotte Bavuma, Danny Mutembe, Hadija Murangwa, Uwamwiza Claudine na Kayisire Marie Solange.

Uretse abagize inama y’Ubutegetsi, RBC yanahawe Umuyobozi Mukuru ushinzwe Imirimo Rusange (Corporate Services Division Manager), akaba ari Mutegaraba Nathalie.

RBC yashinzwe ku itariki 7 Werurwe 2011, ubwo hakomatanywaga ibigo 14 by’ubuzima, hatangira kuvuka ibibazo by’ubuyobozi, imikorere n’imikoranire bitewe ahanini no kuba ibyo bigo byarahujwe ariko ugasanga biteye mu buryo butandukanye cyane, bityo ntibyorohe guhita bihuzwa mu gihe gito.

Prof. Philip Cotton ni muntu ki?

Prof. Philip Cotton ni Umuyobozi wungirije wa Kaminuza y’u Rwanda, umwanya yahawe nyuma y’igihe yari amaze ari umuyobozi wa Koleji y’ubuvuzi n’ubumenyi mu by’ubuzima yahoze ari KHI.

Yaje kuyobora KHI aturutse mu ishuri ry’ubuvuzi ry’i Glasgow muri Scotland, aho yanakomeje kubibangikanya no kwigisha muri iryo shuri, akaba ari na ho yakoreye imirimo nk’umuganga igihe kirekire, akaba ari no mu Kanama k’umuryango mpuzamahanga w’Abaganga (Royal College of General Practitioners).

Iyo mirimo y’Ubwarimu yayitangiye nyuma yo gusoza amasomo muri iyo Kaminuza ya Glasgow, aho yakuye impamyabumenyi y’icyiciro cya gatatu n’iy’Ikirenga mu by’Ubuvuzi.

Prof. Philip Cotton ni Umuvugabutumwa mu Itorero Methodiste.

Prof. Philip Cotton, usanzwe ari Umuyobozi Mukuru Wungirije wa Kaminuza y’u Rwanda yagizwe Umuyobozi w'Inama y'Ubutegetsi ya RBC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved