Nyuma ya Arsenal FC, indi kipe y’i Burayi yasabye kwamamaza ’Visit Rwanda’

Yanditswe na Mukaneza M.Ange
Kuya 23 Mutarama 2019 saa 04:32
Yasuwe :
0 0

Ikigo cy’Igihugu cy’Iterambere, RDB, cyatangaje ko hari intambwe ikomeye yatewe mu kumenyekanisha u Rwanda binyuze mu masezerano n’Ikipe ya Arsenal FC, ndetse yafunguye imiryango ku buryo hari n’indi kipe yo ku mugabane w’u Burayi yifuze kwinjira mu bufatanye nk’ubu.

Muri Gicurasi 2018 nibwo u Rwanda rwinjiye mu bufatanye bw’imyaka itatu na Arsenal FC, bugamije kurumenyekanisha u Rwanda nk’icyerekezo gikomeye cy’ubukerarugendo n’ishoramari, binyuze mu gushyira ikirango ‘Visit Rwanda’ ku kuboko kw’imyenda yayo.

Ubwo abayobozi ba RDB bakirwaga na Komisiyo ya Sena ishinzwe Iterambere ry’Ubukungu n’Imari kugira ngo batange ibisobanuro ku bibazo birebana n’imicungire y’umutungo wa leta, ubufatanye n’ikipe ya Arsenal FC ni kimwe mu byagarutsweho aho bibajije umusaruro bimaze gutanga.

Senateri Bajyana Emmanuel yabajije aba bayobozi barimo Umuyobozi Mukuru wungirije wa RDB, Emmanuel Hategeka na Visi Perezida w’Inama y’Ubutegetsi, Kamagaju Evelyn, inyungu u Rwanda rumaze gukura muri ariya masezerano yavuzweho cyane.

Hategeka yasobanuye ko kugirana amasezerano na Arsenal FC byagize uruhare runini mu kumenyekanisha u Rwanda kandi bitagarukiye mu Bwongereza gusa nk’uko babiteganyaga, ndetse hari indi kipe yamaze gusaba kwinjira mu bufatanye n’u Rwanda.

Ati “Ni ubwa mbere igihugu cyari gisinyanye amasezerano n’ikipe y’umupira w’amagaru, bamwe babikuyemo kuduharabika bavuga ngo kuki twihandagaje tukajya gusinyana amasezerano na Arsenal.”

Yakomeje avuga ko mw’igenzura ryakozwe ubu bufatanye bugitangira, basanze mu byumweru bibiri gusa harakozwe inkuru zisaga 50 zivuga ku Rwanda na Arsenal, mu gihe inshuro ibikorwa byerekeye u Rwanda byashakishwa kuri Google zikubye inshuri zisaga 1000, kandi ba mukerarugendo baturuka mu Bwongereza biyongereyeho 5%.

Ati “Kuva aho dusinyiye amasezerano na Arsenal, byabaye nk’aho bitinyuye abandi bafatanyabikorwa, murabizi ko mu mpera z’umwaka ushize twasinyanye amasezerano na Alibaba ya Jack Ma. Ubu hari n’indi kipe y’i Burayi turi kuganira nayo bitararangira, ariko niyo yaje kutwishakira ishaka ko nayo yakora ‘Visit rwanda’”.

Gusa Hategeka ntiyatangaje iyi kipe iyo ari yo.

Uretse kuba binyuze muri aya masezerano amagambo ‘Visit Rwanda’ agaragara ku myambaro yose y’ikipe nkuru ya Arsenal FC, iy’abatarengeje imyaka 23 no ku myambaro y’ikipe y’abagore kugeza mu 2020/21 u Rwanda runateganya kwifashisha ubunararibonye bwa Arsenal mu guteza imbere umupira w’amaguru mu byiciro by’abagabo n’abagore.

Ibyo byiyongeraho ko Visit Rwanda igaragazwa ku byapa byo ku kibuga mu mikino Arsenal FC yakiriye muri Emirates Stadium ijyamo abantu 59,867 ku mukino umwe, ku byapa bitangirwaho ibiganiro n’abanyamakuru no ku basura Ikibuga cya Arsenal bagera ku bihumbi 250,000 buri mwaka.

Ubu impande zombi ziri gufatanya gutanga amahirwe ku bifuza gusura u Rwanda, ibyiza byarwo bikanamenyekanishwa ku mbuga nkoranyambaga za Arsenal.

Imikoranire na Arsenal iri mu bizatuma guverinoma igera ku mugambi yihaye wo kuba mu 2024 inyungu iva mu bukerarugendo izikube kabiri igere kuri miliyoni $800 ivuye kuri miliyoni $440 nk’intego yari yihawe mu mwaka ushize.

Umuyobozi Mukuru wungirije wa RDB, Hategeka Emmanuel, ubwo yari mu kiganiro n'abasenateri
Senateri Bajyana Emmanuel yabajije ubuyobozi bwa RDB inyungu u Rwanda rwavanye mu bufatanye na Arsenal FC
Umuyobozi ushinzwe imari muri RDB, Mark Nkurunziza, yitabiriye iki kiganiro
Kuri uyu wa Gatatu ubuyobozi bwa RDB bwitabye Komisiyo ya Sena ishinzwe Iterambere ry’Ubukungu n’Imari kugira ngo batange ibisobanuro ku bibazo birebana n’imicungire y’umutungo wa leta
Ubwo Hategeka yagezaga ibisobanuro ku basenateri
Senateri Prof Karangwa Chrysologue yungurana ibitekerezo na Senateri Bizimana Evariste

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza