Nyuma ya Bishop Rwagasana, Sibomana wayoboraga ADEPR yafunguwe by’agateganyo

Yanditswe na IGIHE
Kuya 22 Nzeri 2017 saa 03:21
Yasuwe :
0 1

Urukiko Rukuru ruherereye ku Kimihurura ku gicamunsi cyo kuri uyu wa Gatanu rwategetse ko Bishop Sibomana Jean wahoze ari Umuvugizi w’Itorero rya ADEPR afungurwa by’agateganyo kubera impamvu z’uburwayi.

Muri Gicurasi uyu mwaka nibwo Sibomana yatawe muri yombi nyuma ya bagenzi be barimo uwari Umuvugizi wungirije, Bishop Tom Rwagasana; uwari ushinzwe ubuzima bw’itorero rya ADEPR; Mutuyemariya Christine wari ushinzwe ubutegetsi n’imari; Sebagabo Bernard; Sindayigaya Théophile; Niyitanga Straton na Gasana Valens.

Aba bose bashinjwe kunyereza miliyari zisaga ebyiri z’amafaranga y’u Rwanda ubwo hagati ya 2015 na 2016 bayoboraga iri torero.

Ku wa Gatatu tariki 19 Nzeli Sibomana Jean w’imyaka 64 yabwiye Urukiko Rukuru ko afite uburwayi bw’umuvuduko ukabije w’amaraso, bityo ko iyo uburwayi buzamutse muri gereza atabona ubufasha bwihuse.

Sibomana yajuririraga umwanzuro wafashwe n’Urukiko Rwisumbuye rwa Gasabo wo gufungwa iminsi 30 y’agateganyo mu gihe Ubushinjacyaha bugikusanya ibimenyetso.

Sibomana ajurira yabwiye urukiko ko ikindi ashingiraho asaba kurekurwa ari icyemezo rwafashe kuri Bishop Tom Rwagasana baregwa hamwe, rwemereye gufungurwa by’agateganyo kubera uburwayi.

Muri Kanama uyu mwaka nibwo Urukiko Rukuru rwemereye Rwagasana ko afungurwa by’agateganyo ariko rugira ibyo rumutegeka agomba kubahirirza nko kujya yitaba Ubushinjacyaha buri cyumweru, gutanga pasiporo ye n’ibindi.

Aba bahoze bayoboye ADEPR baregwa kuba hagati ya 205 na 2016 baranyereje miliyari 2 530 395 614 Frw, akomoka ku misanzu abakirisitu batanze ngo hishyurwe umwenda wa BRD urenga miliyari eshatu watanzwe ngo hubakwe Dove Hotel ya ADEPR.

Abaregwa bose baburanye bahakana ibyo bashinjwa.

Aba bayobozi b’iri torero batawe muri yombi, baza gusimbuzwa ku myanya bariho mu itora ryabaye ku wa 30 Gicurasi 2017.

Uwari Umuvugizi w’Itorero rya Pentekote mu Rwanda(ADEPR), Bishop Sibomana Jean

Indi nkuru wasoma: Bishop Tom Rwagasana wo muri ADEPR yarekuwe by’agateganyo


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza