Kwamamaza

Nyuma yo kwakira ‘Umurage’, RwandAir igiye gufungura ingendo muri Amerika na Aziya

Yanditswe kuya 2-12-2016 saa 09:08' na Rabbi Malo Umucunguzi


Ikigo cy’indege cy’u Rwanda, RwandAir, cyakiriye indege Airbus 330-300 ifite agaciro kagera muri miliyoni $280, igiye gutuma yagura ingendo ikorera mu bice bitandukanye by’Isi, guhera mu 2017 ikazatangira ingendo nshya muri Leta Zunze Ubumwe za Amerika, Aziya n’u Burayi, hadasigaye n’ibindi bihugu bya Afurika.

Iyi ndege yahawe izina ‘Umurage’, ni iya 11 RwandAir iguze, ndetse mu mezi atanu ari imbere izaba yagize iya 12, ari nako ikomeza kwagura ibikorwa. Iyi Airbus 330-300 nshya, iruta izindi mu bunini kuko itwara abagenzi 274, ikagira imyanya 30 yiyubashye, 21 iringaniye na 223 isanzwe.

Umuyobozi wa RwandAir, John Mirenge, yavuze ko Umurage hamwe n’izindi ndege zitegerejwe, zitanga ubushobozi n’amahirwe yo kwagura ingendo muri Afurika no hanze yayo.

Ati “Mu mwaka utaha wa 2017 turashaka kujya muri Amerika, New York, i Londres mu Bwongereza, Mumbai mu Buhinde, ariko muri Afurika ubwaho tuzajya Harare muri Zimbabwe, Lilongwe muri Malawi, Conakry, Bamako muri Afurika y’Uburengerazuba, tuzajya nk’ahantu hatandatu cyangwa harindwi muri Afurika.”

Mirenge kandi yavuze ko iyi Airbus 330-300 yatumye RwandAir ihita ikuba kabiri ubushobozi yari isanganwe, aho izatuma u Rwanda rubasha kohereza ibicuruzwa mu mahanga cyangwa kubitumizayo.

John Mirenge uyobora RwandAir, Francis Gatare wa RDB na James Musoni wa Mininfra

Kinwe na Kalisimbi iheruka, Umurage nayo irimo murandasi nziramugozi, WiFi, ikaba itatse Kinyarwanda, ku buryo umuntu uyinjiyemo ari umunyamahanga ahita atangira kumva no kubona ibijyanye n’u Rwanda.

Mirenge yakomeje agira ati “Ifite amashusho, imiziki, ibishimisha byose umuntu akenera ari mu kirere, kandi noneho ushobora gukoresha indimi zirenze eshatu, harimo Igishinwa, Igifaransa, Icyongereza, Igiswayile, twashyizemo kugira ngo abagenzi bacu bazajye banogerwa n’ingendo zabo.’’

“Mu mitako harimo imigongo ya Kinyarwanda, ikerekana imisozi y’u Rwanda, ikaba ifite indirimbo za Kinyarwanda, mbese iyo uyigezemo nk’umuntu uturuka hanze y’u Rwanda, uhita wumva umuco w’u Rwanda.’’

Minisitiri w’Ibikorwa remezo James Musoni, yavuze ko uko u Rwanda rukomeza kugira indege nyinshi, bizajyana no kubaka ikibuga cy’indege gishya kuko igihari kiri kugenda kigira ubushobozi buke.

Ati “Iyo urebye aho indege zihagarara, ukareba na hano abagenzi banyura, ntabwo bijyanye n’uyu muvuduko RwandAir iriho ndetse n’izindi ndege ziguma ziza mu Rwanda.’’

‘‘Niyo mpamvu twafashe icyemezo cyo kubaka ikindi kibuga cy’indege gishya cya Bugesera, aho navuga ko abagomba kucyubaka bageze mu Bugesera barimo bitunganya, ku buryo mu kwa Mbere imirimo izaba yatangiye kandi gahunda ni uko imirimo izarangira 2018, ku buryo mu 2019 tuzatangira gukoresha ikibuga cy’indege gishya.’’

Uko indege ziyongera, niko n’Abanyarwanda bahabwa amahirwe yo kumenya kuzitwara, kuko ubu u Rwanda rumaze kugira umukapiteni umwe n’abafasha batatu, muri rusange rukaba rufite abapilote 31, ndetse RwandAir yatanze itangazo ku bifuza kwiga gutwara indege no kuzikanika.

RwandAir ivuga ko ubu ikiri mu cyiciro cyo gushora imari igamije kongera ibyerekezo n’umubare w’abagenzi itwara, aho mu 2015 yatwaye hafi 600 000, uyu mwaka igateganya kuwusoza na 780 000, ndetse mu myaka itanu iri imbere iteganya kuzaba itwara miliyoni 1.5 z’abagenzi mu mwaka.

RwandAir kandi iri mu biganiro na Airbus byo kugura izindi ngede ebyiri zigezweho bitarenze 2019, hagamijwe kongera umubare w’ingendo zikava kuri 19 zihari uyu munsi.

Iyi ndege niyo nini RwandAir itunze kuko itwara abantu 274
Ingede nshya ya RwandAir ifite imyanya 30 yiyubashye
Izafasha mu ngendo zo ku mugabane w'u Burayi, Amerika na Aziya
Ikoranye ikoranabuhanga rihambaye
Ishobora gukora ingendo ndende idahagaze
Marino Modena ushinzwe ubucuruzi muri Airbus mu gice cya Afurika yo munsi y'ubutayu bwa Sahara
Abantu batandukanye bafataga amafoto y'urwibutso kuri iyi ndege yari igeze bwa mbere mu Rwanda
Umurage yakiranywe ibyishimo byinshi

Amafoto: Faustin Nkurunziza / Rwanda Gov


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved