Kwamamaza

PAC yibajije impamvu abayobozi ba RTDA biga ubutarangiza

Yanditswe kuya 11-10-2016 saa 11:49' na Philbert Hagengimana


Abadepite bagize Komisiyo yo gukurikirana imikoreshereze y’Imari n’Umutungo wa Leta (PAC), bibajije impamvu abayobozi b’Ikigo cy’Igihugu gishinzwe ubwikorezi, RTDA, biga ubudasoza amasomo, nyuma y’amakosa yagaragajwe muri raporo y’umugenzuzi mukuru w’Imari ya Leta y’umwaka wa 2014-2015, bagasubiza ko bigira ku byabaye.

Kuri uyu wa 11 Ukwakira, PAC yakiriye abayobozi ba RTDA ngo basobanure amakosa yagaragaye muri raporo y’umugenzuzi mukuru w’imari ya Leta.

Nk’uko Abadepite babigaragaje, bimwe mu bigaragazwa muri iyo raporo harimo amakosa mu gukora inyigo z’imishinga ayo mu kuyishyira mu bikorwa, hakaba n’andi mu bugenzuzi, ibi bikiyongeraho idindira n’indi mikorere idahwitse.

Ibisobanuro, byatanzwe n’ubuyobozi bwa RTDA bwari burangajwe imbere na Guy Kalisa, Umuyobozi mukuru, byakunze kugaruka ku kuba amakosa yagaragajwe mbere yarabaye nk’amasomo yo guheraho mu buryo bwo kunoza imikorere no kwihutisha ibikorwa.

Ibyo byatumye Depite Nkusi Juvenal, Umuyobozi wa PAC agira ati “Mwambwiye ko mwigiye ku byabaye, none se ubu koko ni bwo bwa mbere mwari mubibonye ku isi? Mukurikije ubunararibonye mufite […], iyo muntu yize, ageza aho agasoza amasomo. Si ko bimera? Hari uwiga akaguma mu masomo, ntasoza bakamuha impamyabumenyi ye?”

Dr.Mbereyaho Leopold, Umuyobozi w’inama y’Ubuyobozi ya RTDA yahise abwira abadepite ko amasomo yabo yarangiye mu mwaka ushize wa 2015, ku buryo ubu ari igihe cyo kwihutisha ibikorwa.

Ati “Ni byo kwiga kwacu kwarangiye umwaka ushize kuko iyo urebye, ni ya mateka, erega buriya RTDA yatangiye ifite abakozi nka batatu b’aba ’Ingénieur’, abandi bari abakozi basanzwe ariko ubu bose ni aba Ingénieur, usibye abakora imirimo mito.”

Yakomeje yizeza Abanyarwanda ko amakosa y’idindira ry’imishinga atazongera kubaho, ati “Amateka yatumye dutangira ibikorwa bidindira ariko aho bigeze nta cyatuma ibikorwa bitinda.”

Umuhanda Pindu-Ntendezi uracyari ingorabahizi

Amwe mu makosa yagaragajwe muri iyo raporo, arimo ikibazo cy’umuhanda Pindura- Ntendezi wo mu karere ka Nyamasheke, yanatinzweho cyane n’Abadepite bitewe n’uko wubatswe ukarangira, ariko mu gihe kitarenze umwaka umwe ugatangira gucikagurika, aho abadepite bavugaga ko iyo urenze metero 200 usangamo ikiremo.

Uwo muhanda wari ufite agaciro ka Miliyoni 34 z’amafaranga y’u Rwanda, wagombaga kuba wararangiye mu Ukuboza umwaka ushize, ariko mu gihe hatarashira umwaka, wamaze kwangirika, ndetse ubu ngo ugizwe n’ibiremo gusa.

Abadepite bagaragaje ko ikibazo kiri mu gukora inyigo, mu kuyishyira mu bikorwa cyangwa se mu igenzura, bityo bagasaba ko hakwiye kumenyekana ugomba kuryozwa ayo makosa.

Aha Guy Kalisa yasobanuriye Abadepite ko koko uwo muhanda warangiye ariko nyuma ugacika maze bagasaba rwiyemezamirimo wawukoze kongera kuwusana ndetse ngo banashyizeho itsinda rigenzura.

Dr.Mbereyaho yatangarije Abanyamakuru ko uwo muhanda warangiye ndetse ukakirwa by’agateganyo, dore ko ubusanzwe iyo umuhanda urangiye gukorwa wakirwa by’agateganyo hagashira umwaka waba nta kibazo kiwubayemo ukabona kwakirwa bya burundu, maze na rwiyemezamirimo wawubatse akishyurwa icyiciro cya nyuma cy’amafaranga ye.

Kuri uwo muhanda wa Pindura-Ntendezi, wo wangiritse uwo mwaka utarashira, ariko ngo RTDA irateganya gutanga andi masezerano yo kuwusana, ariko ngo nta gihombo bizateza kuko umwaka ubanziriza iyakirwa rya burundu ryawo utararangira.

Ku gushaka kumenya ukwiye kuryozwa ibibazo byose byerekeye umuhanda wa Pindura-Ntendezi, RTDA yabwiye Abadepite ko hashyizweho itsinda rishinzwe ubugenzuzi, rikazagaragaza ikibazo aho kiri, niba uwo muhanda kwangirika kwawo bituruka ku nyigo idahwitse, cyangwa ku ishyirwa mu bikorwa (iyubakwa) risondetse, cyangwa se mu bugenzuzi.

Abayobozi b’icyo kigo babwiye PAC ko raporo y’iryo tsinda izagaragaza ukwiye kuryozwa ayo makosa, ikazaba yabonetse bitarenze impera z’ukwezi k’Ugushyingo, banizeza ko izashyikirizwa abadepite bitarenze itariki ya 15 Ukuboza.

Itangwa ry’amasoko ryari ririmo ibibazo iraguye…

Depite Karenzi Theoneste yasabye abayobozi ba RTDA gusobanura ibibazo by’itinda gukora isuzuma, ryanakorwa rigatinda cyane. Yanagaragaje ikibazo cyo gutinda kumenyesha abapiganiwe amasoko ibyavuye mu isuzuma, ndetse no gutinda guha amasezerano abayasinyiye, akabaza ukwiye kuryozwa amakosa nk’ayo.

Dr.Mbereyaho, yasobanuye ko ibyo bibazo bifite imizi mu mateka ya RTDA, aho yatangiranye abakozi bake cyane mu by’amasoko, abayiga kuva hafunguwe amabaruwa y’ipiganwa, kuyasuzuma no kumenyesha abatsinze n’abatsinzwe.

Ati “Kubera ubuke bwabo byatumaga amasoko atinda cyane. Ariko nk’uko raporo y’umugenzuzi mukuru w’imari ya Leta izabyerekana muri uyu mwaka byarahindutse, nyuma y’aho bigaragariye ko dufite abakozi bakeya, dufatanyije n’izindi nzego, twasabye ko batwongera abakozi, ahari batatu ubu dufite batandatu, ahari bane ubu hari barindwi.”

Yakomeje avuga ko hari indi mpamvu idakwiye kwirengagizwa, kuko hari igihe abafatanyabikorwa ba RTDA batuma amasoko atinda, aho baba bashyizeho amabwiriza y’uko buri cyiciro mu gutanga isoko baba bagomba kubanza gusuzuma niba byagenze nk’uko na bo babiteganya, hakaba n’ubwo raporo iboneka bibereye mu bindi.

Raporo y’umugenzuzi mukuru w’imari ya Leta mu 2014/2015 yagaragaje ko muri RTDA harimo ibibazo by’imishinga itaritaweho, aho hatanzwe ingero z’imihanda nk’uwa Rusumo-Ramiro wari waradindiye, amateme arimo n’irya Byimana n’ibindi nk’imicungire y’abakozi n’uburyo bashyirwa mu myanya, ariko hafi ya byose ubuyobozi bw’icyo kigo bwabagaragarije ko byarangiye, kandi ko ibisigaye na byo byafatiwe ingamba.

Nkusi Juvenal na Theoneste Karenzi, bamwe mu bagize PAC
Abakozi ba RTDA n'abashoramari bari bitabye PAC
Abakozi ba RTDA n'abashoramari bari bitabye PAC
Guy Kalisa, Umuyobozi mukuru wa RTDA atanga ibisobanuro imbere y'Abadepite

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved