Kwamamaza

Paul Barrill, ari gukorwaho iperereza icya rimwe n’ubucamanza bw’u Rwanda n’u Bufaransa

Yanditswe kuya 1-12-2016 saa 10:06' na IGIHE


Umufaransa Paul Barril umaze igihe akurikiranwa n’ubucamanza bw’u Bufaransa ku ruhare yagize muri jenoside yakorewe Abatutsi, kuri ubu ari no muri 20 bakurikiranwe n’u Rwanda, bari gukorwaho iperereza byarimba bakazanagezwa imbere y’ubutabera.

Barril wahoze ari Umujandarume w’Umufaransa wari mu Rwanda mu gihe cya Jenoside, akekwaho kuba yaragize uruhare muri Jenoside mu yahoze ari Gisenyi, nyamara uyu mukambwe abantu benshi ntibahwema kumwitsaho ko anahakana kandi agapfobya amateka yiboneye n’amaso ye.

Ku nshuro ya mbere mu myaka 22 ishize Jenoside ihagaritswe, hashize iminsi ibiri Ubushinjacyaha bw’u Rwanda butangije iperereza ku ruhare rwa guverinoma n’abayobozi bakuru 20 b’u Bufaransa, bakekwaho uruhare muri Jenoside yakorewe Abatutsi muri Mata 1994.

Ni igikorwa cyahise kiba uruhurirane kuri Paul Barril, umaze igihe yigwaho n’abacamanza b’Abafaransa, bari no kwibaza ku ruhare rw’Abafaransa batandukanye muri Jenoside yakorewe Abatutsi ndetse banamukoraho iperereza.

Capitaine Paul Barril, aheruka gusohoka no ku rutonde rw’abasirikare 22 b’u Bufaransa bashinjwa uruhare muri Jenoside yakorewe Abatutsi, haba mu kuyitegura, kuyikora cyangwa mu, rwakozwe na Komisiyo y’Igihugu ishinzwe kurwanya Jenoside, CNLG, kuwa 31 Ukwakira 2016.

Iyo igeze kuri Barril, CNLG ivuga ko mu mu 1990, mbere y’uko FPR itangira urugamba rwo kubohora igihugu, yakoze igenzura ry’Ingabo z’u Rwanda ndetse yivugiraga ubwe ko ari umujyanama wa Perezida Habyarimana.

Iti “Muri jenoside, yishyuwe na Guverinoma yakoraga ubwicanyi ngo atoze abasirikare kabuhariwe ngo hakorwe igikorwa cyiswe “Insecticide” (Umuti wica udukoko), cyari kigamije kurimbura Abatutsi. We ubwe yiyemerera ko yari mu Rwanda tariki ya 07 Mata 1994 ndetse muri Kamena 1994 yaneretse TV France 2, icyuma yavugaga ko ari agasanduku kirabura cy’indege Falcon 50 ya Habyarimana. Ni umwe mu bahakana Jenoside yakorewe Abatutsi. Ni nawe ufatwa nk’intandaro y’ingirwa perereza ryakozwe n’umucamanza Bruguière.’’

Barril avugwaho uruhare rukomeye ku bwicanyi bwakorewe Abagogwe cyane ko mu 1993 yafashije mu gutoza itsinda ryihariye rya EX-FAR ryari rishinzwe ubushakashatsi bwimbitse, ndetse n’interahamwe zitwaga “Turihose”, ubufasha buzwi nka “Insecticide”, rigahuzwa no kuba Abatutsi baritwaga “Inyenzi” icyo gihe.

Nubwo urutonde rw’Abafaransa Ubushinjacyaha bw’u Rwanda buri gukoraho iperereza rutatangajwe, nta gushidikanya ko abaherukaga gutungwa agatoki bazarebwaho, barimo na Paul Barril ubwe.

Uyu wari umusirikare w’Umufaransa, kuva mu 2013 ari gukorwaho iperereza n’urukiko rw’i Paris ku ruhare yaba yaragize muri Jenoside yahitanye abasaga miliyoni.

‘‘Abacamanza mu Bufaransa baribaza ku ruhare rw’abafaransa batandukanye muri Jenoside mu Rwanda. Ikibazo gihari ni ukumenya niba Paul Baril yarakoraga nk’umuntu ku giti cye, cyangwa niba yari mu butumwa bw’abamukuriye,’’ nk’uko ikinyamamkuru La Liberation cyabyanditse.

Mu mpera za Kamena 1994, Barril yerekanye icyuma yavugaga ko ari agasanduku kirabura k’indege Falcon 50 ya Habyarimana, bikomeza gutuma yibazwaho byinshi, ndetse nyuma iperereza yakozweho mu 2012, ryatumye hemezwa ko mu 1994 yasinye ku masezerano yo gutanga intwaro n’ubufasha bw’amaboko bifite agaciro ka miliyoni eshatu z’amadolari, hagati y’u Bufaransa na guverinoma y’u Rwanda yakoze Jenoside.

Ni amasezerano yabayeho kuwa 28 Gicurasi 1994, Barril yasinyanye na Guverinoma y’abatabazi yari ihagarariwe na Jean Kambanda.

Gusa Barril yahakanye ko ayo masezerano yaba yarakurikijwe, ariko inyandiko nyinshi zigenda zishyirwa hanze zerekana ko guverinoma y’u Bufaransa yari izi neza ibikorwa bye ndetse yari mu Rwanda ubwo indege ya Habyarimana yahanurwaga kimwe n’imikoranire ye na guverinoma yakoze Jenoside, hakibazwa impamvu nta wigeze amuhagarika muri ibyo bikorwa, n’impamvu Barril yaje gushimirwa akagirwa Capitaine w’icyubahiro muri Kamena 1994.

Ibyo bibazo byose n’ubwo u Rwanda rwabihagurukiye, biranibazwa n’ubucamanza bw’u Bufaransa buri gukurikirana idosiye ya rutura y’abari abayobozi b’u Bufaransa muri Repubulika ya Gatanu, ku buryo ukuri kwabyo gushobora kujya ahabona.

Imiryango myinshi itegamiye kuri Leta yagiye isaba ko Paul Barril yagezwa imbere y’ubutabera, ariko binavugwa ko Polisi y’u Bufaransa imukingira ikibaba ngo adakurikiranwa, kuko ukuri abitse kuziritse ku murunga uhuriyeho abantu benshi bakomeye, bayoboraga u Bufaransa mu gihe cya Jenoside yakorewe abatutsi.

Mu 2014 nibwo Paul Barril yigeze gutabarizwa, polisi imusanga iwe mu nzu yifungiranye kandi afite imbunda bikekwa ko yaba yarashakaga kwiyahura, mu gihe ubutabera bwamukoragaho iperereza, ariko bikavugwa ko arwaye indwara idakira yitwa Parkinson, yangiza udutsi tw’ubwonko.

Uruhare rw’u Bufaransa muri Jenoside iki gihugu kitigeze gishaka kwemera kimwe n’amaperereza y’abacamanza b’Abafaransa ku ihanurwa y’Indege ya Habyarimana yanengwaga byinshi, byagiye bikongeza umwuka mubi hagati y’ibihugu byombi, kugeza ubwo Perezida w’u Rwanda Paul Kagame aheruka guca amarenga ko Ambasade y’u Bufaransa mu Rwanda ishobora kongera gufungwa, byiyongera ku kuba u Bufaransa kuva mu 2015 nta ambasaderi bufite mu Rwanda.

Paul Barrill, ari gukorwaho iperereza icya rimwe n'ubucamanza bw'u Rwanda n'u Bufaransa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved