Kwamamaza

Perezida Kagame ategerejwe muri Maroc

Yanditswe kuya 2-11-2016 saa 07:26' na Rabbi Malo Umucunguzi


Perezida Paul Kagame ategerejwe i Marrakech muri Maroc mu nama ya 22 y’Ibihugu byashyize umukono ku masezerano mpuzamahanga yerekeranye n’imihindagurikire y’ibihe (COP22), iheruka ikaba yarabereye i Paris mu Ukuboza 2015.

Ni inama izabera ahitwa Bab-Ighli itegerejwemo ibihugu 195 byasinye kuri ayo masezerano y’Umuryango w’Abibumbye, bizaba biganira ku ishyirwa mu bikorwa ry’amasezerano ya Paris.

Ni amasezerano agena uburyo bwo gushyira mu bikorwa ingamba zo gukumira izamuka ry’igipimo mpuzandengo cy’ubushyuhe bw’Isi muri iki kinyejana, kikaguma hasi ya dogere 2°C ariko intego ikaba ko kigera hasi ya dogere 1.5°C.

Icyo gihe ibihugu byiyemeje kuzajya bisuzuma intambwe imaze guterwa buri myaka itanu, ndetse hagakusanywa miliyari $100 buri mwaka yo gutera inkunga imishinga igamije kurengera ibidukikije, ashobora no kwiyongera mu myaka iri imbere.

Itsinda riri gutegura iyi nama izwi nka COP22 binyuze kuri Twitter ryatangaje ko Perezida w’u Rwanda Paul Kagame “yemeje ko azitabira iyi nama ku butumire bw’Umwami Mohammed VI.’’

Byatangajwe ko Perezida Kagame yemeye ubutumire bwo kwitabira iyi nama

Yakiriye ubu butumirwe bw’Umwami Mohammed VI wasoje uruzinduko mu Rwanda kuwa 23 Ukwakira, nyuma yo kugera mu gihugu kuwa 18 Ukwakira 2016. Ni urugendo rwakurikiraga urwa Perezida Kagame muri icyo gihugu cyo mu majyaruguru ya Afurika hagati y’itariki 20 na 21 Kamena, anahabwa umudali uruta iyindi muri Maroc.

Iyi nama izaba kuva kuwa 7 kugeza kuwa 18 Ugushyingo, irakurikira indi iheruka kubera i Kigali igamije kuvugurura amasezerano ya Montreal ku ishyuha ry’isi, yemeje ikumirwa ry’imyuka ihumanya ikirere yoherezwa mu kirere n’ibyuma bikonjesha yitwa Hydrofluorocarbons (HFCs) bitarenze 2029, nk’uko yavuguruwe kuwa 15 Ukwakira.

Kubera iri vugururwa, Isi izabasha kugabanya dogere 0.5°C ku gipimo mpuzandengo cy’izamuka ry’ubushyuhe bw’isi mbere y’uko iki kinyejana kirangira, uyu ukaba umusanzu ukomeye mu ishoboka ry’amasezerano ya Paris.

Iyi nama y’i Marrakech igiye kuba nyuma y’iminsi mike u Rwanda rutangaje ko rwinjiye mu mubare w’ibihugu bisaga 80 ku Isi byamaze kwemeza burundu amasezerano y’i Paris yerekeye imihindagurikire y’ibihe.

Amasezerano y’i Paris azatangira gukurikizwa tariki 4 Ugushyingo 2016, ni ukuvuga iminsi 30 nyuma y’aho mu bihugu byayemeje ibigera kuri 55 byihariye 55% by’imyuka yose yangiza ikirere bitangiye inyandiko zigena iyemezwa n’iyubahirizwa ryayo.

Perezida Kagame aherekeje Umwami Mohammed VI kuwa 23 Ukwakira
Perezida Kagame niwe ubwe witwariye Umwami wa Maroc amugeza ku Kibuga cy'indege i Kanombe

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved