Perezida Kagame mu bakuru b’ibihugu na za Guverinoma 18 bitabiriye irahira rya Macky Sall (Amafoto)

Yanditswe na Rabbi Malo Umucunguzi
Kuya 2 Mata 2019 saa 07:20
Yasuwe :
0 0

Perezida Paul Kagame, kuri uyu wa Kabiri yitabiriye irahira rya Perezida Macky Sall wa Sénégal, uheruka gutorerwa kuyobora manda ya kabiri y’imyaka itanu.

Kagame yageze i Dakar kuri uyu wa Mbere aho yakiriwe na Perezida Sall ku kibuga cy’indege cya gisirikare cyitiriwe Léopold Sédar Senghor, mbere y’umunsi umwe w’irahira ryabereye mu nyubako izwi nka Centre des Expositions de Diamniadio.

Diamniadio ni umujyi uri kubakwa byihuse kandi ugizwe n’ibikorwa remezo bigezweho, uherereye mu bilometero hafi 40 uvuye i Dakar.

Perezida Sall w’imyaka 57 yijeje abaturage guharanira kurinda ibyagezweho, abizeza gushyira imbaraga zose mu “kwimakaza inzego zigendera ku itegeko nshinga, ubusugire bw’igihugu n’ubwigenge bwacyo.”

Uyu muyobozi yavuze ko ibyagezweho mu myaka irindwi ishize byigaragaza, yizeza gukomerezaho mu iterambere ry’igihugu n’iry’abaturage ubwabo.

Mu matora yabaye ku wa 24 Gashyantare 2019, Perezida Sall yatowe n’amajwi 58% atsinze abakandida bane barimo Idrissa Seck wigeze kuba Minisitiri w’Intebe, wabonye amajwi 21%.

Irahira rye ryitabiriwe n’abagera ku 3000 barimo n’abakuru b’ibihugu nka Alpha Condé (Guinée), Georges Weah (Liberie), Sahle-Work Zewde (Ethiopie), Denis Sassou-Nguesso (Congo), Félix Tshisekedi (RDC), Ibrahim Boubacar Keïta (Mali), Mohammed Ould Abdel Aziz (Mauritanie), Muhammadu Buhari (Nigeria), Alassane Ouattara (Côte d’Ivoire), Andry Rajoelina (Madagascar) na Adama Barrow (Gambie).

Iyi manda ya kabiri ya Perezida Sall izaba ari ngufi ho imyaka ibiri ugereranyije n’iyo yayoboye bwa mbere agitorwa mu 2012, nyuma ya kamarampaka yabaye mu 2016 yemeje ko imyaka ya manda ya perezida igabanywa ikava kuri irindwi ikaba itanu.

Macky Sall ni umwe mu bayobozi muri Afurika bakunze kugaragaza ko bashyigikiye gahunda za Perezida Kagame haba ku rwego rw’igihugu no ku rwego rwa Afurika. Yanitabiriye irahira rye ku wa 18 Kanama 2017, muri Stade Amahoro i Remera.

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza