Perezida Kagame mu Bufaransa: Uruzinduko rwa gatanu mu myaka 16

Yanditswe na Philbert Girinema
Kuya 22 Gicurasi 2018 saa 05:35
Yasuwe :
1 0

Perezida Kagame ategerejwe mu Bufaransa ku wa 23 Gicurasi 2018, mu rugendo rwa mbere azaba agiriye muri iki gihugu kuva mu myaka itatu ishize.

Mu Bufaransa, Umukuru w’Igihugu azaba yitabiriye Inama Mpuzamahanga yiga ku Ikoranabuhanga by’umwihariko ku Iterambere ry’Ibigo bito izwi nka VivaTech.

Mu bihe bitandukanye, Perezida Kagame yagiriye ingendo muri iki gihugu cyo mu Burengerazuba bw’Isi; inshuro iheruka ni tariki ya 27 Gashyantare 2015 ubwo yari yitabiriye inama y’Ishami ry’Umuryango w’Abibumbye ryita ku Bumenyi n’Umuco (UNESCO) yigaga ku ikoranabuhanga rigezweho.

Kuri iyi nshuro mu ruzinduko rwe i Paris, Perezida Kagame azakirwa na mugenzi we w’u Bufaransa muri Élysée, ahantu yaherukaga mu 2011 ubwo iki gihugu cyayoborwaga na Nicolas Sarkozy.

Ni inshuro ya gatanu mu myaka 16 mu Bufaransa

Uruzinduko rwa Perezida Kagame mu Bufaransa, rugiye kuba ku nshuro ya gatanu mu myaka igera kuri 16, bigaragaza uburyo umubano w’ibihugu byombi hashize igihe warajemo agatotsi.

Bwa mbere mu 2002, Perezida Kagame yagiye mu Bufaransa yitabiriye inama yiga ku mikoranire hagati ya Afurika n’u Bufaransa yabereye i Paris. Yaje kongera gusubirayo mu 2010 muri iyi nama yabaga ku nshuro ya 25 mu Mujyi wa Nice.

Ni nyuma y’ubutumire bwa Nicolas Sarkozy wayoboraga iki gihugu wari umaze amezi atatu avuye mu Rwanda (muri Gashyantare 2010), maze akiyemeza kuzahura umubano wari urimo agatotsi kuva nyuma ya Jenoside.

Mu 2011, Perezida Kagame yasubiye i Paris yakirirwa mu Biro by’Umukuru w’Igihugu na Sarkozy. Ubwo yaherukagayo rero ni mu 2015 mu nama ya UNESCO.

Umubano na bane bayoboye u Bufaransa mu gihe Kagame yari ku ruhembe mu Rwanda

Kuva Kagame Paul yaba Perezida w’u Rwanda, u Bufaransa bumaze kuyoborwa n’Abakuru b’ibihugu bane barimo Jacques Chirac (1995-2007), Nicolas Sarkozy (2007-2012), François Hollande (2012-2017) na Emmanuel Macron (2017-).

Muri abo bose, umwe rukumbi niwe wabashije gutera intambwe isa n’ijya mbere mu kuzahura umubano w’ibihugu byombi wajemo agatotsi, biturutse ku kwinangira kw’iki gihugu ku ruhare gishinjwa muri Jenoside yakorewe Abatutsi.

Dusubiye inyuma gato, mu 2007, ku ngoma ya Perezida Jacques Chirac, umucamanza Jean Louis Bruguière, yasohoye raporo n’impapuro zita muri yombi abayobozi icyenda bakuru b’u Rwanda.

Ajya gukora iyo raporo, ‘yari yagaragarije icyemezo cye abayobozi b’u Bufaransa barimo na Perezida Chirac, nk’umwanzuro w’ubucamanza bwigenga, ariko ahitamo kubagisha inama kuko yashakaga guhuza ingengabihe ye na Guverinoma’.

Wikileaks yamenyekanye mu gutamaza abayobozi n’inzego zikomeye ku Isi, mu 2010 yashyize hanze uko Bruguière yakoranaga bya hafi na Leta ya Chirac, ndetse ko ibyo yakoze byose birimo no gushyiraho impapuro zifata abayobozi b’u Rwanda byari mu mugambi wayo.

Iyi raporo yashyize igitotsi gikomeye mu mubano w’ibihugu byombi, u Rwanda ruyamaganira kure rugaragaza ko yakozwe mu buryo bufutamye bugamije amaramuko no gushaka gusiga icyasha abagize uruhare mu guhagarika Jenoside yakorewe Abatutsi.

Nicolas Sarkozy wayoboye u Bufaransa hagati ya 2007 na 2012 yakira Perezida Paul Kagame muri iki gihugu

Sarkozy yateye intambwe isumba izindi

Nyuma yo gusimbura Chirac, muri Gicurasi 2007 kugeza muri Gicurasi 2012, Nicolas Sarkozy yakoze ibishoboka mu kuzahura umubano w’ibihugu byombi, usubira ku murongo mu Ugushyingo 2009, nyuma y’amezi make mu Rwanda hoherezwa Ambasaderi Laurent Contini.

Muri Gashyantare 2010, yasuye u Rwanda ndetse anemera ko ntacyo igihugu cye cyakoze ngo Jenoside yakorewe abatutsi ihagarare ariko ntiyasaba imbabazi ku ruhare rw’u Bufaransa.

Ubwo yari i Kigali ku wa 25 Gashyantare 2010, yagize ati “Turemera amakosa yakozwe n’abanyapolitiki b’u Bufaransa, hari amakosa yakozwe muri Opération Turquoise, hari uruhare rw’Umuryango Mpuzamahanga, Ababiligi na Loni”.

Uyu mugabo yatumiye Perezida Kagame mu Bufaransa, undi nawe yitabira ubugira kabiri. Byari ikimenyetso cy’uko umubano ushobora kuba mwiza ariko yarinze ava ku butegetsi nta kiragerwaho mu buryo bwa nyabwo.

Perezida Kagame yakiriye Laurent Contini wabaye Ambasaderi w'u Bufaransa mu Rwanda i Kigali, ku wa 22 Mutarama 2010

Hollande yatangiye acecetse!

Hollande yagiye ku butegetsi yitezweho kubakira ku bya Sarkozy yari asimbuye agakomeza inzira y’ukuri mu mubano w’ibihugu.

Akigera ku buyobozi, yaranzwe no guceceka benshi bakanabimunengera ko atagaragaza aho ahagaze mu kibazo cy’u Rwanda. Nta kintu na kimwe yigeze avuga ku Rwanda kugeza muri Nyakanga 2015 ubwo yandikiraga Perezida Kagame ibaruwa yanenzwe cyane, yifurizaga Abanyarwanda umunsi mwiza w’ubwigenge rwabonye ku wa 1 Nyakanga 1962.

Iyi baruwa yibutsaga u Rwanda gushyira imbaraga mu kwita ku burenganzira bw’ibanze bwa muntu, aho Perezida Kagame yayinenze avuga ati “Uko nayisubiza kwa mbere, mu magambo make namubwira ngo ubundi se, ubundi byagenda gute? Ariko icya kabiri nasubiza ni ukuvuga ngo ariko se ari ubwo bwigenge, ari uko kwibohora, ababikoze nibo batazi icyo bagomba kubikoresha? Ubu ndi umuntu wibutswa? Ubu hari umuntu undeba akansangamo ko nkwiye kwibutswa ibyo nkwiriye gukorera abaturage b’u Rwanda nk’Umuyobozi wabo bijyanye no kwibohora?”

Nyuma yaho kandi uyu muyobozi yaje gutangaza ko agiye gusohora inyandiko zose zigaragaza uruhare rw’igihugu cye muri Jenoside yakorewe Abatutsi, ariko byaje kurangira nta gikozwe ari nko gufungura ibikarito birimo ubusa kuko byinshi byakomeje kugirwa ubwiru bituma ibintu bikomeza kudogera.

Macron w’imyitwarire mishya

Umwaka umwe ugiye gushira Emmanuel Macron atorewe kuyobora u Bufaransa, nta byinshi aragaragaza ku mibanire ye n’ u Rwanda ariko ibimenyetso birerekana ko ashobora kugera ikirenge mu cya Sarkozy.

Kagame na Macron, bagiranye ibiganiro muri Nzeri 2017, ubwo bari bitabiriye Inama y’Umuryango w’Abibumbye ndetse umuhuro wabo kuri iyi nshuro uzaba ari uwa kane mu gihe cy’amezi umunani.

Ni umuyobozi mu mbwirwaruhame ze mu bihe bitandukanye, wagaragaje ko anyotewe no kwandika amateka mashya mu buryo Afurika ibanyemo n’u Bufaransa, hakaba ubufatanye aho kuba igihugu kimwe cyafatwa nk’igisabiriza. Reka nawe twitege ibye!

Perezida Kagame yagiranye ibiganiro na Emmanuel Macron muri Nzeri 2017

U Rwanda rwifuza iki ku Bufaransa?

U Rwanda rumaze igihe kinini rusaba u Bufaransa kwemera uruhare rwabwo muri Jenoside yakorewe Abatutsi, nk’igihugu cyateye inkunga Leta yayiteguye ndetse ikayishyira mu bikorwa.

Gusa mu gihe hashize imyaka 24 Jenoside ibaye, iki gihugu cyarinangiye n’ubu ntikiremera uruhare rwacyo ngo kibe cyasaba imbabazi. Ibi binakubitana n’uko ari kimwe mu bicumbikiye abakekwaho ibyaha bya Jenoside benshi, kikanagenda biguru ntege mu kubaburanisha cyangwa se kubohereza mu Rwanda kugira ngo baryozwe ibyo bakoze.

Minisitiri w’Ububanyi n’Amahanga w’u Rwanda, Mushikiwabo Louise, aherutse gutangaza ko u Rwanda kuva na kera rwagaragaje ko rwifuza gukorana n’u Bufaransa ariko mu buryo bwa nyabwo, ubwumvikane buke bukaba buturuka ku kuba hari abayobozi batandukanye mu Bufaransa barimo abahoze muri Guverinoma yateye inkunga umugambi wa Jenoside, bashaka ko imikoranire ibaho ari uko u Rwanda rucecetse ku ruhare rw’iki gihugu mu mateka ya 1994.

Yashimangiye ko ibihugu bidashobora kubana mu gihe amateka nk’ayo u Rwanda rwanyuzemo atavuzwe. Ati “Biragoye gutwikira ukuri.”

Nta Ambasaderi u Bufaransa bugira mu Rwanda

Imyaka hafi itatu irirenze Michel Flesch wari Ambasaderi w’u Bufaransa mu Rwanda avuye ku butaka bwarwo agiye mu kiruhuko cy’izabukuru, gusa n’ubu ku bategereje isimbuzwa rye amaso yaheze mu kirere.

Mbere y’uko agenda, Leta y’u Bufaransa yari yarahaye u Rwanda izina rishya ry’uwo yifuza ko yayihagararira, Fred Constant, wari usanzwe ari Ambasaderi w’icyo gihugu mu Birwa bya Antilles na Guyane, hashira igihe kirenga umwaka ataremezwa n’u Rwanda, kugeza ubwo yoherejwe muri Guinée Équatoriale.

Chargé d’Affaires w’u Bufaransa mu Rwanda, Etienne de Souza, ari nawe uri guhuza ibikorwa bya Ambasade y’u Bufaransa mu Rwanda, aherutse kubwira IGIHE ko nubwo intambwe ziterwa ari nke mu kuzahura umubano w’ibihugu byombi hakiri icyizere.

Yagize ati “Tugerageza kubyaza umusaruro amahirwe yose aboneka, mubona ko igihugu cyacu n’icyanyu mu minsi ishize, hari amahirwe yagiye abaho kandi ndatekereza ko mu buryo bw’igihe kirekire, nta cyabuza ibihugu byombi gushyikirana, kandi mfite icyizere ko turi mu nzira nziza yo kugira igihinduka.”

Hagati aho mu mpera z’umwaka ushize, u Rwanda rwari rwahamagaje Jacques Kabale, Ambasaderi warwo mu Bufaransa, nyuma y’ubuhamya ubutabera bw’iki gihugu bwari buherutse guhabwa n’abarimo abirukanwe mu gisirikare n’abakatiwe n’inkiko kubera amakosa atandukanye bakoze mu Rwanda, bagahitamo guhunga igihugu ndetse n’ubu bakaba badahisha ko barwanya ubutegetsi bw’u Rwanda.

Icyo gihe kandi u Bufaransa bwari bumaze iminsi butangije iperereza rya kabiri ku ihanurwa ry’indege ya Habyarimana, nk’iturufu nshya yo guhishira uruhare rwabwo muri Jenoside yakorewe Abatutsi.

Ukwiyunga k’u Rwanda n’u Bufaransa gutegerejwe na benshi

Umwanditsi w’Umufaransa, Jean-François Dupaquier, aherutse kwandikira Perezida Macron, ko igihe kigeze ngo yihutishe ukugorora umubano n’u Rwanda haba mu bya politiki na dipolomasi, kandi akabikora bitarenze mu mezi atanu ari imbere.

Ati “Ni gute Paris yakongera kunga ubumwe na Kigali? Icya mbere, ni ugushyira imbere ukuri: Ugushungura kweruye inyandiko zose u Bufaransa bufite zigaragaza uruhare rwa Élysée mu Rwanda hagati ya 1994 na 1994.”

“Ni ikimenyetso cyoroshye cyaba icy’amateka. Ikindi ni ukuvugurura imibanire yacu n’amahanga n’ibintu bitari ngombwa muri dipolomasi yacu. Ukwiyunga kwa Paris na Kigali kizaba ikintu gikomeye mu kugaragaza ubushobozi bwa Emmanuel Macron mu gushyira mu bikorwa impinduka yasezeranyije mu nyungu z’u Bufaransa. Mu gukora ibyo, hasigaye amezi atageze kuri atanu.”

Sira Sylla, Umudepite mu Nteko Ishinga Amategeko y’u Bufaransa ariko ufite inkomoko muri Sénégal, uyobora itsinda rigamije ubucuti hagati y’ibihugu by’u Bufaransa, u Rwanda n’u Burundi; aherutse gutangaza ko ashaka kuzahura umubano w’ibihugu byombi akoresheje Inteko.

Uyu mudepite w’imyaka 38 yinjiye mu Nteko Ishinga Amategeko y’u Bufaransa umwaka ushize ku itike y’Ishyaka rya En Marche! ribarizwamo Perezida Emmanuel Macron.

Umwaka utaha ubwo u Rwanda ruzaba rwibuka ku nshuro ya 25 Jenoside yakorewe Abatutsi, Sylla arifuza ko itsinda ry’abadepite b’Abafaransa bazitabira uwo muhango.

Kuri we ngo nta kabuza Minisiteri y’Ububanyi n’Amahanga y’u Bufaransa izakira neza igitekerezo cyo kugabanya intera mu mibanire yari iri hagati y’ibihugu byombi.

Perezida Kagame ubwo yagiriraga uruzinduko mu Bufaransa mu 2011 yatwawe mu modoka yo mu bwoko bwa Peugeot
Nicolas Sarkozy yakoze ibishoboka mu kuzahura umubano w’u Bufaransa n'u Rwanda
Perezida Kagame yakiriwe na Nicolas Sarkozy mu Ngoro ya Élysée mu 2011
Perezida Kagame yahuriye na Emmanuel Macron w'u Bufaransa i New York muri Leta Zunze Ubumwe za Amerika mu Nama y'Umuryango w'Abibumbye yabaye muri Nzeri 2017
Perezida Kagame yemeza ko Macron yazanye imikorere mishya mu Politiki y'u Bufaransa n'u Rwanda

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza