Perezida Kagame yabajije impamvu nta muyobozi urazira amakosa bahora basabira imbabazi mu Nteko

Yanditswe na Philbert Girinema
Kuya 26 Gashyantare 2018 saa 01:24
Yasuwe :
0 0

Perezida Kagame yabajije abayobozi b’Inteko Ishinga Amategeko imitwe yombi impamvu nta muyobozi n’umwe mu bo baba bahamagaje uragerwaho n’ingaruka zo kuba hari amakosa yamugaragayeho imbere y’inteko; asaba ko bidakwiye ko umuntu yisobanura inshuro zose hanyuma bikarangirira aho.

Ibi Umukuru w’Igihugu yabigarutseho ubwo yatangizaga Umwiherero wa 15 w’abayobozi bakuru b’igihugu ugiye kumara iminsi ine ubera i Gabiro mu Kigo cya Gisirikare.

Ni umwiherero uzarebera hamwe aho igihugu kigeze mu kwesa imihigo y’iterambere rirambye cyiyemeje; inkingi z’ibanze zizubakirwaho iterambere ryihuse; uruhare rw’iterambere ry’inganda n’imijyi no kunoza ubukungu; uburezi nk’umusingi w’ubukungu bushingiye ku bumenyi; guteza imbere serivisi z’ubuzima no kureba umwanya u Rwanda rukwiye kubamo muri Afurika no mu ruhando mpuzamahanga.

Ubwo yawutangizaga, Perezida Kagame yikije ku myitwarire iranga abayobozi bamwe aho usanga mu nzego zimwe hari abadakorana uko bikwiye, akibaza niba byaba biterwa no kutiyumvanamo cyangwa se izindi mpamvu.

Yanagarutse ku mikorere y’Inteko Ishinga Amategeko, abaza igikorwa mu gukurikirana abayobozi mu ngeri zitandukanye.

Perezida w’Inteko Ishinga Amategeko umutwe wa Sena, Bernard Makuza, yabwiye Umukuru w’Igihugu ko mu gukurikirana ishyirwa mu bikorwa rya gahunda za leta, inteko itumiza abayobozi hagamijwe gutanga ibisobanuro no kujya inama ku bitagenda.

Gusa Makuza yavuze ko hari abayobozi cyane abo mu nzego z’ibanze bagira umuco wo kubeshya muri raporo batanga, bakavuga ko ibintu bimeze neza kandi ataribyo.

Ati “Twanabibonye tugiye mu giturage n’ubushize twabiganiriyeho hano tubijyaho inama […] twahanduye amavunja, twahaye abana amata ariko byagera aho abantu ntibabyiteho. […] Hari ikintu cyo kutavugisha ukuri, mu nzego z’ibanze ujya gutanga raporo ariko ugasanga mu mibare babeshye.”

Yatanze urugero kuri Nyakatsi, avuga ko yarwanyijwe bigizwemo uruhare n’inzego zose ariko ko hari abo abayobozi bagiye babeshya bigatuma hari aho ikigaragara.

Ati “Yararwanyijwe ariko hari abantu [abayobozi] bahishe basa n’aho bagumye muri Nyakatsi mu bundi buryo bakagenda bakabacumbikira mu miryango […] nyuma ba bantu bakigumira muri nyakatsi. Ya mavunja abantu barayahanduye ariko habura ijisho ryo kubikurikirana.”

Perezida Kagame yavuze ko ibintu bikwiye guhinduka, kuko hari abo bigaragara ko hari abatinywe ntibabazwe ibyo batashyize mu ngiro kandi babifite mu nshingano.

Ati “Nta gukurikiranwa, nta kubaza, nta gusubiza ibyo umuntu ashinzwe. Hakwiye kugira indi ntambwe, njye ni ko nibwira. Icyo kintu cyo kubaza abantu gikwiye kuzamuka, ni cyo kibuze.”

Yakomeje abaza Makuza impamvu nta muyobozi n’umwe uragirwaho ingaruka n’amakosa yamugaragayeho ari mu nteko, undi asubiza ko icyari cyabanje ari ibiganiro ariko hagiye guhindurwa uburyo byakorwagamo.

Perezida w’Inteko Ishinga Amategeko Umutwe w’Abadepite, Mukabalisa Donatille, yavuze ko abadepite babaza abaminisitiri, bakemera ko ibibazo bihari, bakagaragaza icyo bakora ariko nyuma ugasanga ntibyakemutse.

Perezida Kagame yashimiye inteko avuga ko ikibazo ari uko abo baminisitiri babazwa, bakavuga ingamba bikamara imyaka itanu, ati “ntiwibwira ko hari ikintu gikwiye gukorwa?”

Mukabalisa yavuze ko hagiye guhinduka uburyo bw’imikorere maze Umukuru w’Igihugu amusubiza agira ati “mwakererewe ahubwo.”

Mu Ukwakira umwaka ushize, Komisiyo Ishinzwe gukurikirana umutungo wa Leta mu Nteko Ishinga Amategeko (PAC), yasabye ko ihabwa ububasha bwo kujya itegeka ko abayobozi bayitabye ikabakekaho ibyaha bikomeye bajya bahita batabwa muri yombi bagisohoka mu Nteko.

Visi Perezida wa PAC, Karenzi Théoneste, yavuze ko iyo komisiyo yahabwa ububasha ikajya itegeka ko umuyobozi waketsweho ibyaha atabwa muri yombi agisohoka mu cyumba cya PAC.

Ngo ibi bizafasha mu kwirinda ko hasibanganywa ibimenyetso kandi bitume n’umutungo wa Leta ucungwa neza.

Gusa Umushinjacyaha Mukuru, Mutangana Jean Bosco, aherutse gutangaza ko icyifuzo cy’abadepite kitashyirwa mu bikorwa kuko kinyuranye n’amategeko ariho ubu.

Mutangana yavuze ko ubusanzwe raporo y’Umugenzuzi Mukuru w’Imari ya Leta itagamije iperereza ku byaha, icyakora ngo bayifashisha bacukumbura ibimenyetso byisumbuye.

Ati “Ntabwo iyo ari raporo yo gukurikirana ibyaha, ni raporo y’igenzura. Kwemeza ko iperereza ritangira bikorwa n’umugenzacyaha n’umushinjacyaha. Hari ubwo ibintu bigaragara muri raporo y’umugenzuzi w’imari ya Leta byerekana ko imari y’igihugu itakoreshejwe neza, ariko ntabwo yerekana ijana ku ijana ibigomba kuba bigize icyaha. Ibigaragara ko ari ibyaha nibyo tureba.”

Uyu Mwiherero wa 15 witabiriwe n’abayobozi barenga 300 bahagarariye inzego zitandukanye za Leta, ibigo biyishamikiyeho ndetse n’ibigo byigenga n’iby’ubucuruzi.

Madamu Jeannette Kagame akikijwe na Minisitiri wa Siporo n’Umuco, Uwacu Julienne (ibumoso) n'uw’Ubutaka n’Amashyamba, Tumushime Francine (iburyo)
Umwiherero witabirwa n'abayobozi bakuru mu nzego zose z'igihugu
Madamu Jeannette Kagame yari yicaranye na Minisitiri w'Umuco na Siporo, Uwacu Julienne (ibumoso) na Minisitiri w’Ubutaka n’Amashyamba, Tumushime Francine (iburyo)
Perezida Kagame yasabye abayobozi gufata iya mbere mu ishyirwa mu bikorwa rya gahunda ziba zaremejwe
Umukuru w'Igihugu yongeye gusaba ko umuntu wese utuzuza inshingano ze yajya abiryozwa
Perezida Kagame yavuze ko Umwiherero ari igihe cyo kwisuzuma ngo ibikorwa bijyane n‘ibyo igihugu cyifuza n’ibyo abaturage bategereje ku bayobozi
Uhereye ibumoso: Minisitiri w’Ibikorwaremezo, Musoni James; Perezida w’Inteko Ishinga Amategeko Umutwe w’Abadepite, Mukabalisa Donatille; uwa Sena, Makuza Bernard na Minisitiri wa Siporo n'Umuco, Uwacu Julienne
Perezida Kagame yavuze ko hari abayobozi bakuru b’igihugu badakorana
Perezida Kagame yabajije impamvu nta muyobozi urazira amakosa bahora basabira imbabazi mu Nteko
Umunyamabanga wa Leta muri Minisiteri y’Uburezi ushinzwe Amashuri Abanza n’Ayisumbuye, Munyakazi Isaac na Dr. Mukabaramba Alivera, Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho Myiza y’Abaturage
Perezida wa Komisiyo y'Inteko Ishinga Amategeko ishinzwe gukurikirana ikoreshwa ry'umutungo wa Leta (PAC), Nkusi Juvénal mu bayobozi bitabiriye Umwiherero
Perezida Paul Kagame aganira na Minisitiri w'Intebe, Dr Ngirente Edouard mu muhango wo gutangiza umwiherero w'abayobozi bakuru b’igihugu i Gabiro
Umwiherero witabiriwe n'abayobozi basaga 300 bahagarariye inzego zitandukanye za Leta, ibigo biyishamikiyeho ndetse n’ibigo byigenga n’iby’ubucuruzi
Perezida Kagame yanenze abayobozi badakorana, ababaza niba bakeneye kwihitiramo ababungiriza
Uhereye ibumoso: Perezida w'Urukiko rw'Ikirenga, Prof. Sam Rugege; Umunyamabanga wa Leta muri Minisiteri y’Ibikorwaremezo ushinzwe Gutwara Abantu n’Ibintu, Uwihanganye Jean de Dieu na Minisitiri w'Uburezi, Dr Eugène Mutimura mu mwiherero

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza