Perezida Kagame yagaragaje ko guheza abafite virusi itera Sida biteza izindi ngaruka zikomeye

Yanditswe na Rabbi Malo Umucunguzi
Kuya 2 Ukuboza 2019 saa 10:36
Yasuwe :
0 0

Perezida Paul Kagame yavuze ko ihezwa n’ipfunwe ku banduye virusi itera Sida bitera ingaruka zikomeye zirimo kutagana serivisi z’ubuvuzi, bikaba indi mbogamizi mu rugamba rwo kurwanya iyi ndwara yibasira abantu benshi ku Isi.

Ni ubutumwa yatangiye muri Kigali Convention Centre kuri uyu wa Mbere, ubwo yatangizaga Inama Mpuzamahanga ya 20 kuri Sida n’izindi ndwara zandurira mu mibonano mpuzabitsina, ICASA. Ni inama yitabiriwe n’ibihugu hafi 20.

Yitabiriwe kandi na Perezida Filipe Jacinto Nyusi n’abadamu b’abakuru b’ibihugu barimo Jeannette Kagame, Madamu Antoinette Sassou Nguesso wa Congo Brazzaville, Madamu Hinda Déby Itno wa Chad, Madamu Aïssata Issoufo Mahamadou wa Niger, Madamu Rebecca Akufo-Addo wa Ghana na Madamu Neo Jane Masisi wa Botswana.

Yagize ati “Ibiganiro bifunguye bikiza ubuzima. Iyo bigeze ku ndwara zandurira mu mibonano mpuzabitsina, akato no guceceka birica, kimwe n’izindi virusi ziri hagati aho. Ipfunwe rica intege abantu bafite HIV ntibabashe kwiga no kwiyakira cyangwa kugera kuri serivisi z’ubuvuzi bakeneye ngo bakomeze kubaho. ICASA iriho kugira ngo ikureho imiziro ituma abantu batabasha kwirinda no kwisuzumisha hakiri kare.”

Yavuze ko Sida ari indwara itagira umupaka, ku buryo ari ngombwa gushyigikira ibikorwa by’imiryango nka Global Fund, Gavi na PEPFAR, ikomeje gutanga umusanzu muri uru rugendo. Yanavuze ko Guverinoma muri Afurika zigomba gushyira imbere kongera ishoramari mu buvuzi, ari nabyo bitanga umusingi urambye w’ubufatanye n’izindi nzego.

Perezida Kagame kandi yashimiye abafatanyabikorwa bagize uruhare mu gufasha u Rwanda mu bikorwa bigamije guhangana n’icyorezo cya Sida mu myaka ishize, ndetse ko rwiteguye gukomeza gukorana nabo mu kugera ku ntego rwihaye.

Yakomeje ati “Inzego zikomeye z’igihugu mu bijyanye n’ubuvuzi, nibwo buryo buhamye bwo guhangana n’ibibazo by’ubuzima by’uyu munsi n’iby’ahazaza. Inzego z’ubuvuzi zikora neza zifite ibice bitatu bikeneye ishoramari rihoraho. Icya mbere, ni ibikorwaremezo n’ikoranabuhanga. Dukeneye ibikorwa remezo bigezweho mu ntera itari ndende uturutse aho abantu batuye.”

“Icya kabiri, abantu. Ni ukuvuga abaganga bafite ubushobozi buhanitse n’abayobozi muri izo nzego. Icya gatatu, icyizere. Icyizere gituma abaturage bibona mu nzego ndetse bagakurikiza amabwiriza y’ubuzima zibagezaho, bakabasha guhindura imyitwarire. Niyo mpamvu abajyanama b’ubuzima bagize uruhare mu guteza imbere ibijyanye n’ubuzima mu bihugu bitandukanye, birimo n’u Rwanda.”

Perezida Kagame yanavuze ko imiyoborere ifite uruhare rukomeye mu kubaka urwego rw’ubuzima abaturage bose bibonamo, abato n’abakuru.

Yakomeje ati “Mu yandi magambo, imyumvire mizima niyo itanga icyizere cy’igihe kirekire. Ni nabyo Nibyo bizadufasha gutsinda uru rugamba rwa VIH na Sida, no kubaka ubudahangarwa bukenewe mu kurwanya izindi mbogamizi tuzagenda duhura nazo.”

U Rwanda rwatanze umwitangiririzwa mu kurwanya Sida

Umuyobozi w’Ishami ry’Umuryango w’Abibumbye ryita ku Buzima, Dr Tedros Adhanom Ghebreyesus, yavuze ko u Rwanda ari urugero rwiza mu bikorwa byo kurwanya Sida, ashingiye ku kuba nibura hejuru ya 90% by’Abanyarwanda babana na HIV bazi uko bahagaze, 98 ku ijana bafata imiti igabanya ubukana kandi nibura 90% bafite virusi nke cyane mu maraso.

Yakomeje ati “Ibyo biduha icyizere kandi bikagira u Rwanda kimwe mu bihugu bike byabashije kugera ku ntego ya 90, 90, 90 yari yihawe mu 2020. Ubwandu bushya bwa HIV n’impfu zishingiye kuri Sida byagabanyutse hejuru ya kimwe cya kabiri mu myaka icumi ishize. Intambwe yatewe mu Rwanda ntabwo isanzwe, gusa ntabwo ari ho honyine.”

Yavuze ko ku Isi hose muri miliyoni 37.9 z’abaturage bari bafite HIV mu mpera z’umwaka ushize, nibura 80% bazi uko bahagaze, abasaga 60% bafata imiti naho abarenga kimwe cya kabiri bageze ku rwego virusi itagitembera mu maraso.

Dr Tedros yavuze ko kugeza ubu abashakashatsi bakomeje imirimo iganisha ku muti wa Sida, mu gihe hanakomeje ibikorwa byo gukuraho imbogamizi mu rugamba rwo kurwanya Sida.

Yashimangiye ko intambwe u Rwanda rwateye itari gushoboka iyo rutagira imiyoborere ya Perezida Kagame ureba kure, atari kuri HIV gusa ahubwo no kugeza kuri bose serivisi z’ubuvuzi.

Minisitiri w’Ubuzima, Dr Diane Gashumba, yavuze ko ICASA 2019 ari amahirwe akomeye yo kwigiranaho no guhuza ibitekerezo ku bantu bakora mu rwego rwo kurwanya Sida hirya no hino.

Yagaragaje ko hari intambwe ikomeye uRwanda rumaze gutera, harimo kuba gusuzumwa virusi itera Sida ari imwe muri serivisi zamaze kongerwa mu rwunge rw’izihabwa umwana n’umubyeyi, kandi bimaze gutanga umusaruro ufatika.

Yakomeje ati “Abanyarwanda 91% bafite ubwishingizi bw’ubuzima. 99% by’abagore batwite basuzumwa virusi itera Sida, 95% by’abana bacu bose barakingirwa kandi gusuzumwa hakiri kare biri muri izi serivisi. Nk’uko Raporo iheruka ya UNAIDS ibigaragaza, 97 % by’Abanyarwanda bafite virusi itera Sida bari ku miti igabanya ubukana, ndetse 90 % barimo kugabanya virusi mu maraso.”

Ni imibare yatumye ibihumbi by’abari bakoraniye mur Kigali Convention Centre bakoma amashyi y’urufaya, kuko ibihugu byiyemeje ko nibura kugeza mu mwaka wa 2020, 90% by’abaturage bagomba kuba bazi uko bahagaze kuri virusi ya Sida, 90% banduye bakaba bafata imiti naho 90% bakaba bafite virusi itagitembera mu maraso.

Ni ibipimo ariko Prof. John Idoko uyobora Umuryango ‘AIDS in Africa’ ari na we Perezida wa ICASA 2019, yavuze ko bigaragara ko mu bihugu byinshi bitazagerwaho, agasaba ko ibihugu byiyemeza kurwana uru rugamba bundi bushya.

Perezida wa Mozambique Filipe Nyusi yavuze ko niba ibihugu bishaka kurangiza ikibazo cya Sida, bigomba guhanga udushya kandi bikumva ko ari ikibazo cyihutirwa, bikanaharanira gukuraho imbogamizi zose zituma haboneka ubwandu bushya, zirimo n’izishingiye ku buringanire, ihohoterwa n’ibindi.

Minisitiri w’Ubuzima, Dr Diane Gashumba, yavuze ko ICASA 2019 ari amahirwe akomeye yo kwigiranaho no guhuza ibitekerezo bigamije kurwanya SIDA
Umuyobozi w’Ishami ry’Umuryango w’Abibumbye ryita ku Buzima, Dr Tedros Adhanom Ghebreyesus, yavuze ko u Rwanda ari urugero rwiza mu bikorwa byo kurwanya Sida
Perezida wa Mozambique Filipe Nyusi yavuze ko niba ibihugu bishaka kurangiza ikibazo cya Sida, bigomba guhanga udushya
Perezida Paul Kagame yavuze ko ihezwa n’ipfunwe ku banduye virusi itera Sida bitera ingaruka zikomeye
Perezida wa ICASA 2019, Prof. John Idoko, unayobora Umuryango ‘AIDS in Africa’ yasabye ibihugu kwihutisha gahunda byiyemeje mu kurwanya SIDA
Inama ya ICASA yitabiriwe n'abasaga ibihumbi umunani baturutse mu bihugu hafi 20
Inama ya ICASA yatangijwe ku mugaragaro mu birori byaranzwe n'imbyino gakondo
Minisitiri w'Imari n'igenamigambi, Dr Uzziel Ndagijimana, yatanze ikiganiro mu itangizwa rya ICASA
Umuyobozi w’Ishami ry’Umuryango w’Abibumbye Rishinzwe kurwanya Sida, Winnie Byanyima, yagaragaje ko mu 2018 abantu miliyoni 38 bari bafite HIV ku Isi hose, muri bo miliyoni 24.5 bafataga imiti, umubare yise ko ari munini
Umuyobozi w’Inama y’Ubutegetsi ya Global Fund, Donald Kaberuka, yagarutse ku buryo uyu muryango uheruka gukusanya miliyari $14.02 zizifashishwa mu kurwanya Sida
Abitabiriye itangizwa ry'Inama ya ICASA bafashe ifoto y'urwibutso

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza