Perezida Kagame yageze i Rome yitabiriye ubutumire bwa Papa Francis

Yanditswe na Philbert Girinema
Kuya 19 Werurwe 2017 saa 05:07
Yasuwe :
1 1

Perezida Kagame yageze i Rome mu Butaliyani yitabiriye ubutumire bw’Umushumba wa Kiliziya Gatolika ku Isi, Papa Francis, kugirango baganire ku mubano wa Vatican n’u Rwanda.

Amakuru y’uruzinduko rwa Perezida Kagame i Rome yatangajwe kuri uyu wa Gatandatu; ku gicamunsi cyo kuri iki Cyumweru nibwo Umukuru w’Igihugu yageze muri uyu Murwa Mukuru urimo icyicaro gikuru cya Kiliziya Gatolika ku Isi.

Ibiro by’Umukuru w’Igihugu byatangaje ko ‘Perezida Kagame yageze i Rome ku butumire bwa Nyirubutungane Papa Francis mu biganiro by’umubano hagati y’u Rwanda na Vatican’.

Biteganyijwe ko kuri uyu wa Mbere aribwo Papa Francis ari bwakire Perezida Kagame.

Kiliziya Gatolika isanzwe igira uruhare muri gahunda z’iterambere mu Rwanda, ibintu ishimirwa by’umwihariko ndetse no muri Nyakanga 2015, Perezida Kagame yayishimye ku bw’umubano mwiza umaze igihe kirekire anayizeza ko ubufasha bwa Guverinoma buzakomeza.

Ibi yabivuze ubwo yahuraga n’Abepisikopi Gatolika mu Rwanda bari bayobowe na Musenyeri Smaradge Mbonyintege, Umushumba wa Diyosezi ya Kabgayi.

Kiliziya Gatolika igira uruhare runini mu mibereho y’Abanyarwanda n’iterambere ry’igihugu muri rusange mu nzego zitandukanye yaba iz’uburezi, ubuzima n’izindi.

Mu gihugu ifite ibigo by’amashuri 131, ibigo nderabuzima 105 n’ibitaro icyenda mu bice bitandukanye by’igihugu.

Perezida Kagame agiye guhura na Papa mu gihe hashize amezi make Kiliziya Gatolika mu Rwanda isabiye imbabazi abayoboke bayo bagize uruhare muri Jenoside yakorewe Abatutsi mu 1994.

Mu nama y’Igihugu y’Umushyikirano yabaye mu Ukuboza umwaka ushize, Perezida Kagame yavuze ko atumva impamvu Umushumba wa Kiliziya Gatolika ku Isi adasabira imbabazi abakirisitu ayoboye bagize uruhare muri Jenoside yakorewe abatutsi mu 1994, mu gihe hari aho bigaragara ko byagiye bikorwa mu bihugu byakozwemo icyaha gifite ubukana budafite aho buhuriye n’ubwa Jenoside.

Inkuru bifitanye isano: Perezida Kagame arakirwa na Papa Francis i Vatican

Ubwo Perezida Kagame yahuraga n'abepisikopi Gatolika muri Village Urugwiro kuwa 19 Nyakanga 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza