Kwamamaza

Perezida Kagame yagize icyo avuga ku ruzinduko rw’Umwami Mohammed VI mu Rwanda

Yanditswe kuya 24-10-2016 saa 14:40' na Rabbi Malo Umucunguzi


Umwami Mohammed VI wa Maroc kuri iki Cyumweru nibwo yasoje uruzinduko rw’iminsi itanu yari amaze mu Rwanda, rwaranzwe no gusinya amasezerano mu nzego zinyuranye hagati ya Guverinoma y’u Rwanda n’Ubwami bwa Maroc, kuva yagera mu Rwanda kuwa 18 Ukwakira 2016.

Mu masezerano yasinywe harimo arebana n’ishoramari mu mabanki, ubutwererane n’imikoranire isesuye, koroshya ingendo ku bafite pasiporo z’abadipolomate, kubaka amacumbi, n’andi n’ayasinywe hagati ya Imbuto Foundation n’Umuryango w’Umwami Mohammed VI wa Maroc ugamije iterambere rirambye, azareba ubuzima, uburezi, ubukungu n’iterambere by’urubyiruko n’abagore.

Mu kiganiro cyihariye Perezida Kagame yagiranye n’ikinyamakuru Observateur du Maroc & d’Afrique, yagarutse ku ngingo zinyuranye zirimo icyerekezo cy’umubano w’ibihugu byombi n’ubusabe bwa Maroc yifuza kugaruka mu Muryango wa Afurika Yunze Ubumwe, AU.

Ku mubano w’u Rwanda na Maroc

Perezida Kagame yavuze ko uruzinduko rw’umwami wa Maroc mu Rwanda ari ingenzi ku Rwanda, ahanini ashingiye ku musaruro rwatanze.

Ati ‘‘Kubera uru ruzinduko, twazamuye cyane umubano wacu na Maroc kandi turashaka kugera kure. Hari n’ibindi bihugu mu Muryango wa Afurika Yunze Ubumwe byifuza kunyura muri iyi nzira. Umubano wacu tugomba kuwongerera imbaraga ariko bikajyana n’icyo ubyara haba mu ishoramari, ibikorwaremezo, umuco, amacumbi na serivisi z’imari.’’

Perezida Kagame yavuze ko ari na byo byibanzweho cyane mu ruzinduko rw’umwami wa Maroc kuko n’amasezerano yasinywe ari muri izo nzego.

Ukugaruka kwa Maroc muri AU

Mu nama ya 27 y’abakuru b’ibihugu bigize AU yateraniye i Kigali muri Nyakanga, Maroc ntiyasabye kugaruka muri uyu muryango byeruye, ariko ibaruwa yoherejwe n’Umwami Mohammed VI yavugaga neza ko Maroc ‘‘ikeneye gusubirana umwanya yahoranye.’’

Maroc ishaka kuba umunyamuryango wa 55 wa AU nyuma y’imyaka 32 yivanyemo, icyemezo yafashe ubwo wari umaze kwakira Repubulika ya Sahara kandi Maroc ikiyifata nk’intara yayo ndetse itaranabona ubwigenge busesuye.

Hagati muri Nzeri nibwo icyo gihugu, mu buryo bwemewe n’amategeko Maroc cyatanze ubusabe bwayo, Perezida Kagame akavuga ko ‘Maroc igomba kugaruka muri AU igatanga umusanzu wayo’.

Ati ‘‘Ntekereza ko iyo abantu bongeye kwishyira hamwe, buri umwe aba afite umusanzu agomba kuzanira abandi. Ariko tugomba guhura, tugakemura ibidutandukanya tukagera ku buryo bwo gukorera hamwe.’’

‘‘Dutekereza ku baturage bacu, ni ingenzi cyane, ni na byo dukora hagati ya Maroc n’u Rwanda. Nta bundi buryo buruta kwishyira hamwe ubundi tugakora ibitanga umusaruro.’’

Ku butwererane bw’ibihugu mu bukungu

Perezida Kagame kandi yabajijwe niba ahamya ko imiryango nka Afurika Yunze Ubumwe ikwiye kwita cyane ku butwererane mu by’ubukungu n’iterambere ry’abaturage, agaruka ku myanzuro inama ya AU yabereye i Kigali muri Nyakanga.

Ati ‘‘Hafatiwemo imyanzuro ibibiri ikomeye. Uwa mbere wari ugutera inkunga ibikorwa bya AU. Ariko se ni ugutera inkunga iki ? Ni naho havuye umwanzuro ku mavugurura agomba guhita akorwa. Hagombaga no kugenwa ibikwiye kwibandwaho kurusha ibindi kandi byari ingenzi. Ni ngombwa gutanga umusaruro, kugira inzego zuzuza inshingano no gucunga neza ubukungu.’’

‘‘U Rwanda kimwe n’ibindi bihugu rwagiye rugira imiyoborere yaranzwe n’intege nke, twakemuye ikibazo tuzana impinduka kandi zakozwe n’Abanyarwanda ubwabo.

Twakemuye ikibazo cy’imiyoborere kugira ngo tubashe kugera ku ntego zacu kandi tubashe kwigenga. Twitaye cyane ku mutekano, umudendezo n’agaciro k’abaturage.’’

Mu nama iheruka ya AU, ibihugu byemeje ko Perezida Kagame ari we urangaza imbere amavugurura muri AU, ndetse aheruka gutangaza abanyabwenge icyenda bazamufasha iyo mirimo izatuma AU yigira ku ngengo y’imari, ikagera ku nteko kandi mu buryo budahenze cyane.

Ni gahunda izatuma AU yibeshaho aho gukomeza gufashwa n’amahanga kuri 76%, buri gihugu kizajya gikata 0.2% by’imisoro y’ibyinjira mu gihugu. Muri iyo gahunda Afurika izajya isarura nibura miliyari 1.2 z’amadolari buri mwaka.

Inkuru bisa : Umwami Mohammed VI wa Maroc yasoje uruzinduko rwe mu Rwanda (Video)

Perezida Kagame aherekeje Umwami wa Maroc, Mohammed VI ubwo yari asoje uruzinduko rwe rw'akazi yagiriraga mu Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved