Perezida Kagame yahaye ubutumwa El-Sisi ugiye kumusimbura ku buyobozi bwa AU

Yanditswe na HABIMANA James
Kuya 25 Mutarama 2019 saa 09:49
Yasuwe :
0 0

Perezida Paul Kagame uyobora Umuryango wa Afurika yunze Ubumwe, AU, guhera mu mwaka ushize, yabwiye mugenzi we wa Misiri, Abdel Fattah El-Sisi, ugiye kumusimbura ko ari akazi gasaba kwitanga no kureba mu buryo bwagutse.

Perezida Kagame yabigarutseho mu kiganiro kuri uyu wa Kane i Davos mu Busuwisi, ahamaze iminsi ine habera inama ya World Economic Forum.

Yagize ati “Kuri mugenzi wanjye n’inshuti El Sisi, ni akazi gafite inshingano ziremereye zisaba gutekereza tukarenza kureba gusa ibihugu byacu, ariko zihuriza hamwe umugabane wose ku ngingo z’ingenzi kandi z’ingirakamaro, byose bigamije kuzana impinduka.”

Abdel Fattah el-Sisi w’imyaka 64 uyobora Misiri kuva mu mwaka wa 2014, ni we uzayobora Umuryango wa Afurika Yunze Ubumwe guhera mu nama ya AU iteganyijwe ku wa 10 Gashyantare 2019, i Addis Ababa muri Ethiopia.

Tariki ya 29 Mutarama 2018 nibwo Perezida Paul Kagame yatangiye inshingano nk’Umuyobozi wa AU, iyi manda ihurirana n’Inteko Rusange ya 30 y’Abakuru b’Ibihugu bigize uyu muryango yabereye Addis Ababa.

Mu butumwa yatanze ubwo yahabwaga izi nshingano, Perezida Kagame yavuze ko ari icyubahiro gikomeye kuri izi nshingano.

Yagize ati “Mwarakoze ku cyizere cyanyu gikubye kabiri. Ubwa mbere nk’umuyobozi w’amavugurura nanone ubu nk’umuyobozi w’umuryango wacu. Ndabizeza kuzakora akazi uko nshoboye ariko nzanakenera ubufasha bwanyu.”

Yagereranyije Perezida Alpha Condé yasimbuye kuri uwo mwanya nk’umwarimu ukomeye yigiyeho byinshi, akaba yaranamubonyemo umutima ukomeye afitiye Afurika, asaba abandi bakuru b’ibihugu kumushimira.

Hakozwe byinshi ku buyobozi bwa Perezida Kagame

Kuva yahabwa izi nshingano, hari byinshi byakozwe kuri uyu mugabane bigamije kugira Afurika yibeshejeho, idategeye amaboko ibihugu by’i Burayi na Amerika.

Muri Werurwe 2018 i Kigali hasinyiwe amasezerano y’ibihugu bigize AU, agamije gushyiraho Isoko Rusange rya Afurika (AfCFTA). Ibihugu 44 byayasinye ku ikubitiro, ndetse ubu bigeze kure biyemeza burundu ngo atangire gushyirwa mu bikorwa.

Biteganywa ko aya masezerano azahuriza ku isoko rimwe miliyari 1.2 z’abatuye Afurika, rifite umusaruro mbumbe wa tiriyali 2.19$.

Perezida Kagame kandi yakaganguriye ibihugu bya Afurika kwishakamo ingengo y’imari bidategereje inkunga.

AU yatangaje ingengo y’imari izakoresha mu 2019 yagabanutseho 12% ugereranyije n’iy’umwaka ushize, ariko ikagaragaramo ukwigira kwa Afurika.

Mu 2019, ingengo y’imari ya AU ni miliyoni 408 z’amadolari. Ibihugu bya Afurika biyifitemo uruhare rwa 66%, bingana na miliyoni 269 z’amadolari naho abaterankunga bakagiramo uruhare rwa 34% bingana na miliyoni 139 z’amadolari.

Niyo nkeya mu zo AU yakoresheje mu myaka ine ishize, ikaba iya mbere igizwemo uruhare runini n’ibihugu bya Afurika.

Niyo ngengo y’imari ya mbere yemejwe yaratanzweho ibitekerezo n’ubugenzuzi bwa ba Minisitiri b’imari n’igenamigambi ba Afurika, hagamijwe ko ikoreshwa mu by’ibanze umugabane ukeneye hagendewe ku mavugurura ya AU.

Mu ngengo y’imari ya AU yakoreshejwe mu 2015, uruhare rw’ibihugu bya Afurika rwari 33.3% bingana na miliyoni 149 z’amadolari, mu gihe abaterankunga bari bafite uruhare rwa 66.6% bingana na miliyoni 298 z’amadolari.

Mu 2017 AU yakoresheje ingengo y’imari irimo uruhare rwa Afurika rungana na 43% ni ukuvuga miliyoni 222 z’amadolari, bivuze ko abaterankunga bari bafitemo 57% bingana na miliyoni 293 z’amadolari.

Perezida Kagame yakira El-Sisi i Kigali mu 2017
Perezida Kagame yakiriye ku meza El-Sisi muri Kanama 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza