Kwamamaza

Perezida Kagame yakiriye Wood, umuherwe wamwijeje kongera ishoramari mu cyayi cy’u Rwanda

Yanditswe kuya 10-11-2016 saa 14:47' na Cyprien Niyomwungeri


Perezida Kagame yakiriye umuherwe Sir Ian Wood washinze umuryango ‘The Wood Foundation’ umaze imyaka itanu ushora imari mu buhinzi bw’icyayi mu Rwanda, amwizeza ko agiye kwagura iryo shoramari ku buryo umusaruro w’icyayi wikuba kabiri mu myaka itanu iri imbere.

Mu 2007 nibwo umuherwe w’Umunya-Ecosse, Sir Ian Wood, ufite umutungo ubarirwa muri miliyari 1.6 z’amadolari yafatanyije n’umuryango we bashinga The Wood Foundation, wibanda ku guhanga ibikorwa by’ubukungu bifasha abaturage kwiteza imbere, binyuze mu guteza imbere ubucuruzi, kongera ubushobozi bw’abaturage no kubatera inkunga.

Perezida Kagame yakiriye uyu muherwe muri Village Urugwiro kuri uyu wa Kane tariki 10 Ugushyingo 2016.

Muri Afurika y’Iburasirazuba The Wood Foundation ukorana n’abahinzi b’icyayi mu Rwanda na Tanzania, aho ufasha abahinzi barenga 45 000 barimo abagera ku bihumbi 17 bo mu Rwanda. Wanashoye imari mu nganda ebyiri z’icyayi mu Rwanda arizo; Mulindi bafitemo imigabane ingana na 55% n’urwa Shagasha muri Rusizi bafitemo 60%.

Nyuma yo kuganira na Perezida Kagame, umuherwe Sir Ian Wood yabwiye itangazamakuru ko uru rugendo rwari rugamije kwagura umubano ubyara inyungu hagati ye na Guverinoma y’u Rwanda, kandi ko agiye kwagura ishoramari rye mu rwego rwo guteza imbere ubuhinzi bw’icyayi by’umwihariko abagihinga.

Yagize ati “Bitewe n’ubunararibyonye tumaze gukura mu gukorana n’abaturage bo hasi bahinga icyayi, turateganya kugera ku bahinzi 1000 ba Shagasha. Hari umushinga mushya wa Kibeho-Munini, tuzubakayo uruganda runini dukorane n’abahinzi bagera ku bihumbi bitanu, yaba mu gutera icyayi n’ibindi. Bizatanga umusanzu ukomeye mu bukungu bwa hariya hantu.”

U Rwanda rwiteze byinshi ku muherwe Wood

Uretse gushora imari mu nganda zitunganya icyayi, Umuryango Wood Foundation utanga ubufasha mu guhugura abahinzi b’icyayi ukanabatera inkunga bigatuma icyayi cy’u Rwanda cyigarurira isoko ry’amahanga kandi umuhinzi akaba ariwe ubanza gutera imbere.

Minisitiri w’Ubuhinzi n’Ubworozi, Dr.Gerardine Mukeshimana, yashimye umusanzu w’umuryango avuga ko urimo kwigaragaza cyane cyane mu mikorere y’inganda za Shagasha n’urwa Mulindi rucuruza 15% by’icyayi cyose cy’u Rwanda rwonyine.

Yagize ati “Icyo tubona ni uko ariya mahugurwa ahabwa abahinzi, kubana na bo buri munsi bifite icyo byongera kuko nka ziriya nganda za Shagasha na Mulindi, muri iyi myaka ibiri zirimo gukora neza kandi turizera ko bikomeza.”

The Wood Foundation ikomeje gushora imari mu buhinzi bw’icyayi, mu gihe muri uyu mwaka u Rwanda rwasinyanye amasezerano na Kompanyi yitwa Unilever Tea Rwanda Limited yo kubyaza umusaruro ubuhinzi bw’icyayi buherereye ku Munini na Kibeho mu Karere ka Nyaruguru. Aka gace gahinzeho icyayi ku buso bungana na hegitari 4000.

Minisitiri Mukeshimana yasobanuye ko Wood Foundation uzanakorana na Unilever mu bijyanye no gutera icyayi no guhugura abahinzi. Yahishuye ko hari undi mushinga w’icyayi ukomeye wa Rugabano muri Karongi uri ku buso bwa hegitari 4000 z’icyayi, aho umuherwe azahubaka uruganda ku buryo Nyaruguru na Karongi buri hose hazagira uruganda.

Ati “Ibi bizatuma icyayi cyiyongera ku buryo umusaruro wacyo ushobora kwikuba kabiri mu myaka itanu izaza.”

Akomeza avuga ko Wood Foundation uzafasha gukemura amadeni akunda kuremerera amakoperative y’icyayi, aho uzabafasha gutera ingemwe, kubahugura no kubaha amafumbire hanyuma bakazishyura icyayi kimaze kwera kandi bishyure nta nyungu.

Ibi bizorohereza abahinzi b’icyayi cyane ko abenshi baba ari abahinzi bato, kubona uburyo bwo kwinjira mu buhinzi bitabavunnye cyane nkuko byajyaga bibavuna.

Wood yijeje Perezida Kagame gukomeza ibikorwa bye by'ishoramari mu Rwanda
Wood wakiriwe na Perezida Kagame afite umutungo ubarirwa muri miliyari 1.6 z’amadolari
Perezida Kagame yakiriye uyu muherwe muri Village Urugwiro kuri uyu wa Kane tariki 10 Ugushyingo 2016
Perezida Kagame asuhuza bamwe mu bari baherekeje Wood
Sir Ian Wood yabwiye itangazamakuru ko uru rugendo rwari rugamije kwagura umubano ubyara inyungu hagati ye na Guverinoma y’u Rwanda
Wood asanzwe ashora imari mu buhinzi bw'icyayi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved