Perezida Kagame yasabye abakuru b’ibihugu bya Afurika kudacogora mu guteza imbere abaturage

Yanditswe na Kanamugire Emmanuel
Kuya 16 Ugushyingo 2016 saa 10:30
Yasuwe : XX
0

Perezida Kagame yasabye abayobozi b’ibihugu bya Afurika kudacogora mu ngamba bakomeje gufata zigamije guteza imbere abaturage, ahamagarira abakuru b’ibihugu gusenyera umugozi umwe mu kuzishyira mu bikorwa.

Ibi yabivugiye mu nama yiswe “Africa Action Summit” yabaye kuri uyu wa Gatatu tariki ya 16 Ugushyingo 2016, ikaba yari iyobowe n’Umwami Mohamed VI w’icyo gihugu, iyo ikaba imwe mu bice bigize inama mpuzamahanga yiga ku mihindagurikire y’ibihe, Perezida Kagame yitabiriye muri Moroc.

Umwami wa Maroc, Mohamed VI yavuze ko ubwitabire bw’abakuru b’ibihugu bya Afurika muri iyo nama, ari ikimenyetso cy’ubushake bwimbitse ku ntego ya Afurika yo guharanira ejo hazaza heza h’uwo mugabane.

Mu ijambo yagejeje ku bitabiriye iyo nama, Perezida Kagame yavuze ko ibihugu bya Afurika ari byo bifite inshingano y’ibanze, kuzamura abaturage babyo, bidatezuka ku ngamba z’ubukungu n’Iterambere bikomeje gushyiraho.

Yakomeje kandi ashishikariza ibihugu bya Afurika gukorera hamwe mu gushyira mu bikorwa izo ntego, nk’uko RBA yabitangaje.

Yagize ati “Reka dukorere hamwe dushyira mu bikorwa ingamba zacu ndetse n’ubufatanye mu mishinga migari y’iterambere.”

Yongeyeho ko ubushake bwo kwishyira hamwe, mu gushakira hamwe ibisubizo ku mugabane wa Afurika, bigaragarira mu bwitabire bw’abakuru b’ibihugu muri iyo nama.

Ati “Ntabwo ari impanuka kubona uburyo Umugabane wa Afurika uhagarariwe byo ku rwego rwo hejuru muri iyi nama. Imihindagurikire y’ibihe igira ingaruka zikomeye ku mugabane wacu, kandi twiteguye guhindura no guhanga n’izo ngaruka. Icyangombwa ni ugushimangira ubudacogora bwacu, cyane mu bigendanye n’iterambere ry’ubukungu n’imibereho y’abaturage bacu.”

Ubushake bw’ubufatanye mu guhangana n’ingaruka z’imihindagurikire y’ibihe bigaragarira mu masezerano u Rwanda rwasinyanye n’ibindi bihugu nk’uko byasobanuwe n’Umuyobozi w’Ikigocy’igihugu gishinzwe kurengera ibidukikije, Eng.Colette Ruhamya.

Ati “Twaje muri iyi nama ku masezerano mpuzamahanga y’imihindagurikire y’ibihe, impamvu twaje nk’u Rwanda ni uko kimwe n’ibindi bihugu, natwe twashyize umukono kuri ayo masezerano kandi twemera ko adufasha. Twaje rero kureba amasezerano twasinyiye i Paris (mu Bufaransa) umwaka ushize, ubu noneho ni gute yava mu mpapuro akajya mu bikorwa.”

Inama Mpuzamahanga yiga ku mihindagurikire y’ibihe, yateguwe n’Umuryango w’Abibumbye, ikaba yaratangiye kuwa 7 igomba gusozwa kuwa 18 Ugushyingo.

Perezida Kagame yageze i Marrakhech muri Maroc kuwa Mbare tariki ya 14 Ugushyingo, aho yitabiriye inama ya mbere yari igenewe abakuru b’ibihugu kuri uyu wa 15 Ugushyingo, ikaba yakurikiwe n’iyo ya “Africa Action Summit” yabaye kuri uyu wa 16 Ugushyingo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza