Perezida Kagame yasabye Abanyafurika gukoresha ikoranabuhanga mu guhanga ibishya aho gufata iby’abandi

Yanditswe na Rabbi Malo Umucunguzi
Kuya 15 Gicurasi 2019 saa 03:04
Yasuwe :
0 0

Perezida Kagame yasabye ko Abanyafurika bakoresha iterambere ry’ikoranabuhanga mu guhanga ibishya no kuvumbura, kuko muri iki gihe Isi iri mu gihe cyo kubaka ubukungu bushingiye ku ikoranabuhanga, ku buryo gusigara inyuma atari amahitamo kuri Afurika.

Ni ku munsi wa kabiri wa Transform Africa Summit, witabiriwe n’abakuru b’ibihugu barimo Perezida Paul Kagame, Uhuru Kenyatta wa Kenya na Ibrahim Boubacar Keita wa Mali.

Ati “Iterambere ry’ubukungu n’uburumbuke bisaba ikoranabuhanga. Igihe ni iki kugira ngo twubake ibikorwa remezo n’ubumenyi bikenewe muri Afurika. Hari amahirwe akomeye ku mugabane wacu, ari nayo mpamvu guverinoma za Afurika zishyize hamwe zigatangiza Smart Africa, n’abikorera bakaba ari abafatanyabikorwa b’ingenzi kugira ngo intego igerweho.”

Yavuze ko intego za Smart Africa ari ugutuma ibihugu biguma hamwe mu bijyanye n’iterambere ry’ikoranabuhanga kuko gufatanya ari bwo buryo bwatuma ibihugu bigera ku ntego zabyo.

Yakomeje ati “Kuba hariho gahunda ihuriweho ya Afurika mu ikoranabuhanga ntawe bikwiye gutera ubwoba, ahubwo bikwiye gutera imbaraga. Byari bikenewe kandi ukwishyira hamwe kwa Afurika kuzatanga inyungu kuri Afurika n’abafatanyabikorwa bayo ku rwego rw’Isi.”

“Isoko rusange rya Afurika ryatangiye gushyiwa mu bikorwa, tugomba guhuza gahunda y’iterambere ry’inganda n’ikoranabuhanga. Ikoranabuhanga rihuza Isi kurusha uko byahoze mbere, kugera ku bumenyi ubu byaroroshye. Ariko nanone twe kuvuga gusa ngo dukoreshe umurongo mugari wa internet mu gufata gusa ibintu n’ibitekerezo byaturutse ku bandi. Turi abantu bashobora guhanga udushya no gutekereza, dufite ibyacu twaha abandi, dufite inkuru zacu twabwira abandi.”

Agiye gusoza ijambo rye, Perezida Kagame yavuze ko inama itaha ya Transform Africa mu 2020 izaba ibaye ku nshuro ya gatandatu, izabera muri Repubulika ya Guinea.

Umuyobozi Mukuru wa Smart Africa, Lacina Koné, yashimiye abitabiriye iyi nama ya 2019 biteganyijwe ko itangarizwamo ingamba zigamije ubukungu bwubakiye ku ikoranabuhanga, “digital economy blueprint’ ku bufatanye na Guverinoma ya Kenya.

Yavuze ko iyi nama irimo kuba ku nsanganyamatsiko yo guteza imbere ubukungu bwa Afurika bushingiye ku ikoranabuhanga (Boosting Africa’s Digital Economy’, ibereye igihe kuko abaturage ba Afurika benshi bakiri urubyiruko ndetse uyu mugabane uri mu rugendo rwo gushyiraho isoko rusange rihuriweho.

Yavuze ko ibihugu ariko bidakwiye kuzarira mu gukemura ibibazo bijyanye n’ibikorwa remezo, nka internet ituma ikoranabuhanga ribasha kuba umusingi wa serivisi zinyuranye.

Yakomeje ati “Ni ngombwa no kwibuka ko ikoranabuhanga rigezweho ridasigana n’ingorane zinyuranye, dukeneye gufatanya no gukorera hamwe, bitari ku rwego rw’ibihugu gusa ahubwo no ku rwego rw’umugabane, hamwe n’abikorera, mu gushakira umuti ibibazo bigenda bivuka nk’ibyaha byifashisha ikoranabuhanga, ikwirakwizwa ry’amakuru y’ibinyoma n’icyuho mu gukoresha ikoranabuhanga gikomeza gutera ubusumbane.”

Minisitiri w’Ikoranabuhanga, Ingabire Paula, yavuze ko hakenewe gushyirwaho uburyo buhamye bufasha mu guhanga udushya no kwihangira imirimo, nk’uburyo bwafasha ibihugu guhanga imirimo ikenewe no kugera ku iterambere rirambye.

Yanasabye ko ibihugu kongera ishoramari rishyirwa mu rwego rw’ikoranabuhanga, ariko bigakorwa hanagabanywa ingorane zishobora kujyana nabyo muri uru rugendo.

Iyi nama itegurwa n’ihuriro rya Smart Africa rikomeje kwaguka rigamije guteza imbere ikoranabuhanga muri Afurika, kuva mu 2016 rikaba ryaravuye ku bihugu 16 bikaba bigeze kuri 26.

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza