Perezida Kagame yasangiye akababaro n’abagore bafashwe ku ngufu muri Jenoside

Yanditswe na

Rabbi malo Umucunguzi

Kuya 18 Kamena 2015 saa 08:13
Yasuwe :
0 0

Perezida wa Repubulika Paul Kagame yavuze ko asangiye akababaro n’abagore bahohotewe muri Jenoside yakorewe Abatutsi mu Rwanda, kuko ahuje amateka n’aba Banyarwanda kandi akaba yumva akababaro bagize.

Perezida Kagame yabitangaje ubwo we na Madamu Jeannette Kagame bitabiraga igikorwa cyo kwerekana bwa mbere filimi mbarankuru“The Uncondamned”, igaragaza uburyo abagore bagiye bafatwa ku ngufu mu bihe by’intambara, ariko iki cyaha ntigihite gikurikiranwa.

Mu ijambo rye rigufi cyane, Umukuru w’igihugu yavuze ko bitewe n’amateka agaragazwa muri iyi filimi, asanga nawe ari umwe mu bayigaragaramo.

Yagize ati “Ndi umwe mu bagize iyi filimi, kuko nagezweho n’ibyabaye muri iki gihugu, ibyabaye kuri aba bagore, ngerwaho n’aya mateka. Numva kandi nsangiye nabo akababaro bafite. Ariko mwakoze abakoze iyi filimi n’abandi bose babigizemo uruhare, kuko ni igice cy’ubutabera kigomba kubaho.”

Perezida Kagame yari yitabiriye igikorwa cyo kwerekana iyi filimi

Umukuru w’igihugu yavuze ko iyi filimi yerekana neza ukugongana kubaho ku bucamanza na Politiki z’igihugu na mpuzamahanga, abayikoze bafatanyije n’aba bagore nyuma y’akababaro banyuzemo, bagamije kurangurura amajwi y’abadashobora kwivugira.

Perezida Kagame yakomeje agira ati “Ndashimira buri wese watumye ibi bibaho, ndatekereza ko ari urumuri rushobora kugeza ku rundi rubonesha cyane, nk’ uko byagenze mu Rwanda, ku buryo ibintu nk’ibi byo kudatanga ubutabera bishobora kuba n’ahandi bizakurikiranwa bigashyirwa ahabona.”

Umwe mu bagize uruhare runini muri iyi filimi, Pierre Prosper, wari Umushinjacyaha mu rubanza rwa Jean Paul Akayesu waburaniraga mu Rukiko Mpuzamahanga Mpanabyaha rwashyiriweho u Rwanda rukorera i Arusha, avuga ko icyaha cyo guhohoterwa kw’abagore mu ntambara cyamenyekanishijwe ku ruhando mpuzamahanga n’abagore bo muri Taba, aho Akayesu yari abereye Burugumesitiri.

Icyo gihe ngo cyahise gitangira kwandikwa mu buryo buzwi, ku buryo ugejejwe mu rukiko ku byaha by’intambara hasuzumwa ko nta byaha byo gufata abagore ku ngufu yakoze.

Kuba iki cyaha cyaravugwaga no mu ntambara ya mbere y’Isi mu mwaka wa 1919, kigatangira gukurikiranwa mu 1997, Prosper yibaza impamvu bitakozwe mbere.

Yagize ati “Ntituzi impamvu abantu bakirengagizaga mbere imyaka myinshi ishize, mbere y’urubanza rwa Akayesu. Ndatekereza ko hari abantu benshi birengagizaga uburemere bw’ iki cyaha.”

Yakomeje agira ati “Akenshi iyo umuntu yahohotewe, ntabwo aba ashaka kuvuga ibyamubayeho. Na none biragora kubona abatangabuhamya bizewe. Ni ibintu bifata inzira ndende ngo umuntu akubwire ngo noneho niteguye ko Isi yamenya ibyambayeho, reka dushake ubutabera.”

Michelle Mitchel wayoboye iyi filimi mbarankuru “The Unncondamned”, avuga ko gufata ku ngufu n’ihohoterwa rishingiye ku gitsina ari ibyaha bifatwa nk’intwaro z’intambara, ku buryo bigomba kujya bikurikiranwa cyane.

Mukasarasi Godelive uyobora umwe mu miryango ifasha abagore bahohotewe muri Jenoside, SEVOTA, avuga ko mbere abagore batinyaga kugaragaza ibyababayeho kubera kwanga kwiha rubanda.

Yagize ati “ Muri Gacaca […] urumva kujya kuburana ahantu wari utuye, twe twaravugaga tuti ntacyo abantu bose bazi ko wafashwe ku ngufu. Bivuge bimenyekane kuko nibitamenyekana nta wundi uzabivuga.”

Iyi filimi “The uncondamned” imaze imyaka ibiri itunganywa igaragaza bumwe mu buhamya bw’Abanyarwanda bafashwe ku ngufu muri Jenoside, na zimwe mu ngaruka bagiye bahura nazo.

Igaragaramo abagore bafashwe ku ngufu mu gihe cya Jenoside yakorewe Abatutsi batanga ubuhamya bw’ibyabayeho n’uko bakiriye ibyo bikomere.

Hagaragaramo umunyamategeko Pierre Prosper n’abashakashatsi batandukanye.
Gufatwa ku ngufu bigira ingaruka ku mubiri n’umutima by’ubikorewe, bityo umuryango mugari nawo ngo ugomba kumva ko abahohotewe ari abant nk’abandi ukirinda kubavangura.

"The uncondamned” yari imaze imyaka ibiri itunganywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza