Perezida Kagame yashimiye Valens Ndayisenga wegukanye ‘Tour Du Rwanda 2016’

Yanditswe na Kanamugire Emmanuel
Kuya 20 Ugushyingo 2016 saa 07:13
81 44

Perezida Paul Kagame yashimiye Valens Ndayisenga wegukanye Tour du Rwanda 2016, anashimira abakinnyi n’Abanyarwanda bitabiriye iri rushanwa ryahuje ibihugu byinshi ariko bikarangira ryegukanwe n’Umunyarwanda.

Ku nshuro ya Kabiri Ndayisenga Valens yegukanye isiganwa ry’amagare rizenguruka u Rwanda ku nshuro ya munani, nyuma yo kuryegukana mu 2014.

Ndayisenga Valens ukinira ikipe ya Dimension Data yo muri Afurika y’Epfo, yabanje kwegukana agace ka Kigali-Karongi muri Tour du Rwanda 2016, kakinwe ku wa 15 Ugushyingo 2016, yegukanye kandi agace ka gatandatu ka Tour du Rwanda kavaga i Musanze kerekeza i Kigali, bituma ashyiramo ikinyuranyo gikomeye n’abo bari bahanganye, kugeza ubwo yaryegukanye kuri iki Cyumweru nubwo yaje ku mwanya wa gatatu.

Ndayisenga yegukanye Tour du Rwanda 2016 ayambuye Jean Bosco Nsengimana wayegukanye mu 2015, atahana igihembo n’amadorali ya Amerika 1900, ni ukuvuga agera kuri miliyoni 1.5Frw.

Mu magambo yanditse kuri Twitter, Perezida Kagame yashimiye “Valens Ndayisenga, wegukanye ‘Tour du Rwanda 2016’ yari ishimishije cyane.” Ati “Mwagize neza ku bakinnyi bose n’Abanyarwanda baje kureba iri rushanwa.’’

Perezida Kagame ni umukunzi ukomeye w’Umukino w’amagare

Nyuma yo kwegukana Tour du Rwanda 2014, Perezida Paul Kagame yakiriye Team Rwanda abashimira ubwitange bagize bahesha ishema igihugu, abasezeranya kubafasha ngo inzozi zabo zibe impamo.

Mu Ukuboza 2014, Perezida Kagame yakiriye Team Rwanda, abwira abo bakinnyi 15 bari bagize Team Kalisimbi, Muhabura n’Akagera ko ibyo bakoze byahesheje ishema igihugu ariyo mpamvu bagomba gushimirwa ibyiza bagezeho, bahabwa amagare 18 yaguzwe miliyoni FRW 49 n’ibikapu byo kuyatwaramo bya miliyoni zisaga eshatu.

Ayo magare yaguzwe ni ayo mu bwoko bwa Pinarello Dogma F8, agezweho yakoreshejwe na Team Sky ya Chris Froome yatwaye Tour de France mu 2015.

Ayo magare yakorewe mu Butaliyani arimo ayo gusiganwa ku muhanda (road race) n’ayo gukoreshwa basiganwa umuntu ku giti cye (individual time trial) yaguzwe ibihumbi 63 by’ama Euro, icyo gihe yasagaga miliyoni 49 n’ibihumbi 200 by’amanyarwanda.

Ndayisenga Valens yongeye kwegukana Tour du Rwanda y'uyu mwaka nyuma yo gutwara iya 2014
Ndayisenga Valens yishimira intsinzi ya kabiri muri Tour du Rwanda
Perezida Kagame yakira Ndayisenga Valens na bagenzi be mu 2014 nyuma yo kwegukana Tour du Rwanda
Perezida Kagame ni umuterankunga ukomeye w'Umukino w'amagare mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE