Kwamamaza

Kagame yashimye akazi gakomeye ibihugu byakoze mu kuvugurura amasezerano ya Montreal

Yanditswe kuya 16-10-2016 saa 10:31' na Rabbi Malo Umucunguzi


Mu museso wo kuwa Gatandatu tariki 15 Ukwakira, nibwo ibihugu hafi 200 byari bimaze icyumweru i Kigali byemeranyijwe ku masezerano y’amateka mu kurwanya ihindagurika ry’ibihe, nyuma y’andi yemerejwe i Paris mu 2015.

Ni amasezerano agamije icibwa ry’imyuka ya “hydrofluorocarbons” (HFCs) yoherezwa mu kirere n’ibyuma bikonjesha nka za firigo cyangwa ibyuma bitanga ubuhehere bw’umuka mu nzu, ariko bikagira ingaruka zikomeye mu gutuma ikirere gishyuha.

Mbere y’uko aya masezerano yatangiye gukoreshwa kuwa 01 Mutarama 1989 avugurirwa i Kigali, Perezida Kagame yavuze ko guhagurukira kuyigabanya byatuma n’ikiguzi bizatangwaho kiba gito.

Icyo gihe yagize ati “Ntabwo tugomba kunyurwa n’iterambere ricagase kandi dufite imbaraga zo gukemura ibibazo byose […] Uko dukora vuba, niko ikiguzi cy’ibikorwa byacu kigabanuka, ni nako umutwaro w’ibidukikije uzagabanuka ku bana bacu.’’

Nyuma y’ivugururwa, Umukuru w’Igihugu yifashishije Twitter ashimira Ibihugu bihurira kuri aya masezerano ya Montreal, Ishami ry’Umuryango w’Abibumbye rirengera ibidukikije, Minisitiri w’Umutungo Kamere, Dr Vncent Biruta wari uyoboye iyi nama n’Umunyamabanga wa Leta Zunze Ubumwe za Amerika Ushinzwe Ububanyi n’Amahanga,John Kerry, kubw “akazi gakomeye kagejeje ku masezerano y’ingirakamaro.’’

Perezida Kagame yashimye akazi gakomeye ibihugu byakoze mu kuvugurura amasezerano ya Montreal

Abahanga mu bya siyansi bagaragaza ko kugabanya HFCs bizanagabanya 0.5°C ku bushyuhe bw’Isi, ari nako bikomeza kurengera akayunguruzo k’imirasire y’Izuba. Biteganywa ko ibihugu byateye imbere bigomba kuba byagabanyije iyi myuka mu 2019 igacibwa burundu mu 2024, mu gihe mu bihugu bikiri mu nzira y’amajyambere ho bizacibwa mu 2028.

Umuyobozi w’Ishami ry’Umuryango w’Abibumbye rishinzwe kurengera ibidukikije, Erik Solheim, yavuze ko aya mavugurura ari intambwe itewe mu gushyigikira amasezerano yemerejwe i Paris, ko iki kinyejana kigomba kurangira ubushyuhe bw’Isi bwagabanutseho 20°C.

Ati “Ibi birenze akayunguruzo k’Izuba cyangwa HFCs. Ni ikimenyetso gikomeye gitanzwe n’abayobozi ko impinduka zisigasira ibidukikije zatangirijwe i Paris zidateze gusubira inyuma cyangwa ngo zihagararikwe. Birerekana ko ishoramari rikenewe ari iririmo ikoranabuhanga risukuye kandi ribyara umusaruro.’’

Aya masezerano arafatwa nk’ayaziye igihe kuko uko iterambere riri kwiyongera, ari nako ibyuma bikonjesha biba byinshi ku buryo iyo myuka yabyo (HFCs) yiyongeraho hagati ya 10 na 15 % buri mwaka, uburyo ishyushya Isi bugakuba inshuro ibihumbi ugereranyije na CO2 (Carbon dioxide)’.

Mbere y’aya mavugurura, John Kerry, yari yavuze ko ibihugu byagenze buhoro mu kurwanya ihinduka z’ibihe, none ibihugu biri guhura n’ingaruka zikomeye, harimo impunzi zishingiye kuri izo mpinduka cyangwa inkongi za hato na hato kandi zimara igihe kirekire.

Biteganyijwe ko mu 2040, ibihugu bikize byose byazaba bigeze munsi ya 15% ya za HFCs na 20% za HFCs ku bikennye, ugereranyije n’iyo birekura uyu munsi.

Biteganyijwe ko iki gikorwa kizatwara miliyari z’amadolari ku Isi yose, mu nama izabera i Montreal muri Canada mu 2017, aribwo ibihugu bizemeranya ku mafaranga azayitangwamo, haherewe ku yazashyirwa mu bushakashatsi n’imyuka izasimbura “hydro fluorocarbons”.

Muri iyo myuka itangiza akayunguruzo ka Ozone ikagira ingaruka nke ku ihindagurika ry’ibihe, harimo nka Ammonia cyangwa ‘Carbon dioxide’ (CO2), hakaba hanageragezwa ikoranabuhanga rishya ryakwifashishwa mu gukonjesha kandi rikenera ingufu nke z’amashanyarazi.

Umuyobozi w’Ikigo Gishinzwe Umuyobozi w’Ikigo gishinzwe kwita ku bidukikije cya Amerika Gina McCarthy, nyuma y’ivugururwa ry’aya masezerano yavuze ko igihugu cye cyiteguye kugendana n’amabwiriza mashya mu gukonjesha no gutanga ubuhehere bw’umwuka.

Ati “Iyi myuka ishobora kwangiza ikirere inshuro ibihumbi kurusha CO2. Muri make, izi HFCs zihehereza inzu zacu, zigatuma tubika ibiribwa byacu, ariko birazamura ubushyuhe bw’umubumbe wacu.’’

Perezida Kagame ubwo yafunguraga iyi nama
Abantu baturutse mu bihugu 197
Umunyamabanga wa Leta Zunze Ubumwe za Amerika, John Kerry, ni umwe mu bitabiriye iyi nama
Umuyobozi w'Ikigo cy'Igihugu gishinzwe kurengera ibidukikije, Collette Ruhamya

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved