Perezida Kagame yasoje uruzinduko muri Senegal

Yanditswe na IGIHE
Kuya 14 Ugushyingo 2017 saa 04:25
Yasuwe :
0 0

Perezida Paul Kagame yasoje uruzinduko yagiriraga muri Senegal, ahaberaga inama y’ihuriro mpuzamahanga rya kane ryiga ku mahoro n’umutekano muri Afurika.

Ni inama yabaye kuwa 13-14 Ugushyingo, yitabirwa n’abandi bayobozi barimo Perezida Ibrahima Boubacar Keita wa Mali; Perezida wa Komisiyo y’Umuryango wa Afurika yunze Ubumwe (AU), Moussa Faki Mahamat; Minisitiri w’Intebe wa Chad, Albert Pahimi Padaké; Minisitiri w’Ingabo w’u Bufaransa, Florence Parli, na Perezida wa Senegal, Macky Sall, wakiriye inama.

Abo bayobozi bareberaga hamwe ibibazo by’umutekano byugarije Afurika n’uburyo byashakirwa ibisubizo, mu nama yitabiriwe n’abagera kuri 400 baturutse mu nzego z’ibihugu, imiryango y’uturere na mpuzamahanga, impuguke n’abarimu muri za kaminuza.

Perezida Kagame yabwiye abandi bayobozi ko ibibazo by’umutekano muke byiyongera kuko Abanyafurika bananiwe gushyira hamwe uko bikwiye ngo bubakire ku bushobozi bafite mu kubikemura, bityo bakwiye guhuza imbaraga aho gutegereza ko hari abandi bazabibamenyera.

Yagize ati “Nitwemerera abandi kumenya ibibazo byacu no gufata inshingano zo kubikemura, tugomba kwinenga ubwacu.”

Yakomeje agira ati “Tugomba kumva ko dufite inshingano zacu tudashyiramo abafatanyabikorwa ahubwo bakaza batwunganira. Tugomba kugira inshingano zo kumenya ibibazo byacu no kwishakamo ubushobozi bwo kubikemura. Gukorera hamwe ni ingenzi.”

Kunga ubumwe mu guhangana n’ibibazo by’umutekano Afurika igenda ihura nabyo, hashimangiwe ko bikwiye gukorwa mu buryo niba hari ikibazo cyugarije igihugu kimwe gishakirwa umuti ngo hato kitazagera ku kindi gihugu.

Umuyobozi wa Komisiyo ya AU, Moussa Faki Mahamat, yavuze ko iyo nama ari intambwe ikomeye mu mitekerereze ikwiye Afurika no kubyaza umusaruro amahirwe ashingiye ku bushakashatsi, iterambere no gusangira ubunararibonye.

Yagize ati “Mu guhangana n’ibibazo bishya bigenda bivuka, hakenewe icyerekezo gishya hagati y’Umuryango w’Abibumbye na AU. Ibyo bibazo bishya bikeneye ko ibihugu byacu bifatanya mu gushakisha amahoro no guhanahana amakuru.”

Inkuru yindi wasoma :Perezida Kagame asanga Afurika ikwiye kwinenga kumenyerwa ibibazo no kubikemurirwa n’abandi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza