Perezida Kagame yasubije abibwira ko u Bushinwa buri gukoloniza Afurika

Yanditswe na Philbert Girinema
Kuya 23 Kanama 2018 saa 06:53
Yasuwe :
0 0

Perezida Kagame yavuze ko Afurika itaragera aho yavuga ko ubutunzi bwayo mu ishoramari bwihariwe n’abanyamahanga, ahubwo ko n’amahirwe menshi ifite itayabyaza umusaruro.

Yabigarutseho mu kiganiro yagiranye na Televiziyo ya CNBC Africa ifite icyicaro mu Rwanda.

Cyibanze ku ngingo zitandukanye zirimo ishoramari n’ubucuruzi ku mugabane, ibikorwa by’Umuryango wa Afurika yunze Ubumwe n’ibindi.

Perezida Kagame yabajijwe ku mikoranire ya Afurika n’u Bushinwa niba itaba iri mu Bukoloni bushya kuri uyu mugabane, asubiza ko yaba ubushya n’ubushaje byose ari bibi.

Yavuze ko u Bushinwa butajya mu gihugu ngo bwigabize ibyacyo, n’aho byaba yaba ari amakosa y’icyo gihugu.

Ati “Ntabwo nzi ahantu aho u Bushinwa bwagiye mu gihugu bugatangira gufata ibintu. Niba byarabayeho ntabwo ari ikibazo cy’u Bushinwa. Ni ikibazo cy’aho byabaye.”

Imibare igaragaza ko agaciro k’ibikorwa by’ubucuruzi hagati y’u Bushinwa na Afurika mu 2016 kari miliyari 128 z’amadolari, avuye kuri miliyari 215 mu 2014.
Kuri we, ibyo Abashinwa bari gukora muri Afurika ni imikoranire aho kuba ubugiraneza.

Ati “Hari u Bushinwa buri gukora ishoramari muri Afurika, ntabwo ukora ishoramari ku busa. Ntabwo ari igikorwa cy’urukundo. Afurika ikeneye ishoramari. Ese Afurika izi ibyo ikeneye mu gukorana n’abandi bantu n’ibindi bice by’Isi?”

Yongeyeho ati “Niba u Bushinwa buduhaye amahirwe, ni ko njye mpitamo kubireba; ni iki u Rwanda rukeneye ku Bushinwa? Cyangwa se ni iki twakura ku Bushinwa aho turunguka n’u Bushinwa bukunguka? Kuko ntabwo ari umubano ushingiye ku bugiraneza.”

Mu bihugu bya Afurika u Bushinwa bufitemo ishoramari rinini harimo Afurika y’Epfo aho rifite agaciro ka miliyari 4.72 z’amadolari, Repubulika Iharanira Demokarasi ya Congo bufitemo miliyari 3.24.

Bufite miliyari 2.53 muri Algeria, miliyari 2.34 muri Zambia na miliyari 2.38 muri Nigeria.

Mu myaka 12 ishize, imishinga 61 y’ishoramari ifite agaciro ka miliyoni 419.556 z’amadolari ni yo yinjiye mu Rwanda iturutse mu Bushinwa.

Ni mu gihe ishoramari risanzwe ry’iki gihugu mu Rwanda ringana na miliyoni 352.581 z’amadolari aho riri mu ngeri z’ubukerarugendo, ubucukuzi bw’amabuye y’agaciro n’ubwubatsi.

Kagame yavuze ko Afurika ikwiye kubanza ikareba niba ikeneye u Bushinwa n’icyo ibukeneyeho mbere ya byose.

Ati “Baravuze bati bagiye kutwubakira urugomero kuko ni rwo dukeneye, hanyuma tukavuga tuti harashorwamo aya, uku ni ko twemeranyije mu kwishyura umwenda, ni gute icyo cyaba ikibazo?”

Muri iyi mikoranire, ngo ibihugu biba bikwiye kuba maso ku buryo bitisanga byagiye mu myenda myinshi.

Perezida w’u Bushinwa aherutse mu ngendo ku mugabane wa Afurika aho yagendereye n’u Rwanda mu ruzinduko rwasize imikoranire mishya hagati y’ibihugu.

Imibare igaragaza uko ubuhahirane rwa Afurika n'u Bushinwa buhagaze
Perezida Kagame ubwo yakiraga Xi Jinping w’u Bushinwa muri Village Urugwiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza