Perezida Kagame yasubije amahanga yanenze uburyo amatora yagenze mu Rwanda

Yanditswe na Rabbi Malo Umucunguzi
Kuya 13 Kanama 2017 saa 10:26
Yasuwe :
0 0

Perezida watowe Paul Kagame yavuze ko nubwo hari abanyamahanga bavuga ko batashimishijwe n’uburyo amatora ya Perezida yo kuwa 4 Kanama yagenze, igikomeye ari uko Abanyarwanda bagaragaje amahitamo yabo kandi bazi neza ibibabereye.

Kagame yabigarutseho kuwa Gatanu, ubwo hizihizwaga isabukuru y’imyaka 10 umushinga ‘Umubano Project’ umaze wimakaza ubufatanye bw’u Rwanda n’u Bwongereza, watangijwe n’umunyapolitiki w’Umwongereza, Andrew Mitchell, mu 2007.

Andrew John Bower Mitchell w’imyaka 61 ni umudepite wo mu ishyaka Conservative winjiye mu Nteko Ishinga amategeko mu 1987, yanabaye Umunyamabanga ushinzwe iterambere mpuzamahanga kugeza mu 2012.

Komisiyo y’Igihugu y’Amatora yemeje ko Paul Kagame watanzwe n’umuryango FPR Inkotanyi ari we watsinze amatora ku majwi 98,79 %, umukandida wigenga Mpayimana Philippe agira 0.73% naho Frank Habineza abona 0.48%.

Mitchell yavuze ko amatora yo mu Rwanda yagenze neza kurusha aheruka mu Bwongereza nubwo hari ibihugu bitandukanye birimo na Leta Zunze Ubumwe za Amerika byanenze uburyo yagenze.

Yagize ati “Hari abantu banenga ibyavuye mu matora ariko biragaragara mu matora aheruka mu Rwanda yagenze neza kurusha ayo mu Bwongereza. Hanabayeho kunenga bikozwe n’Abanyamerika. Mbibarize! Kunenga biturutse kuri Donald Trump n’Abanyamerika ku birebana n’amatora?”

Perezida Trump yatangiye kuyobora Amerika muri Mutarama ariko iperereza rirakomeje ku buryo yatowemo, aho bivugwa ko u Burusiya bwinjiye mu matora bugatuma abasha gutsinda Hillary Clinton bari bahanganye.

Perezida Kagame yavuze ko nubwo hari abanenze uburyo ayo matora yagenze atari ikibazo gikomeye ahubwo u Rwanda rubitega amatwi, rukavanamo amasomo yarwo.

Yagize ati “Turumva, tukabihuza n’ibyo dukora mu buzima bwa buri munsi, tugakuramo amasomo yacu, ariko tukabwira umuntu wese ko tuzi neza imibereho yacu, aho tuvuye, aho tugana kandi tuzakomeza guhitamo ibitubereye, biri mu nyungu zacu, ntawe tubangamiye.”

Yavuze ko hari aho bigera ugasanga abantu bibaza uburyo mu Rwanda umuntu ashobora gutsinda amatora hafi 100% ariko ngo biterwa n’uko u Rwanda rwihariye.

Yakomeje agira ati “Ntabwo turi ibitangaza ariko dutandukanye n’abandi. Biba mu buryo bwubahirije ibitekerezo bya buri wese. Igikomeye ni uko Abanyarwanda bavuze kandi mu ijwi riranguruye kandi bishimiye ibyo bari gukora, ibyo bari kubona, bazi ingorane bagomba guhangana nazo kandi dushyize hamwe mu gushakira abana bacu n’abuzukuru ahazaza heza tubifuriza.”

Mitchell yavuze ko u Bwongereza nk’umufatanyabikorwa w’u Rwanda bishimiye imiyoborere ya Perezida Kagame ndetse gahunda z’iterambere igihugu gifite zitanga umusaruro. Yatanze urugero ku buryo igihugu cyabashije kuvana mu bukene abaturage basaga miliyoni mu myaka itatu ishize.

Mu itangazo Umuvugizi wa Minisiteri Ministerial ububanyi n’amahanga ya Amerika, Heather Nauert, yashyize ahagaragara nyuma y’amatora mu Rwanda, yabanje gushima uburyo Abanyarwanda bitabiriye itora mu ituze, ariko avuga ko igihugu cye “kitishimiye ibintu bitaboneye byabaye hagati mu matora ku buryo byashimangiye impungenge ku migendekere myiza yayo.” Iri tangazo ntiryatuye ibyo bintu.

Indorerezi zose, yaba iz’imbere mu gihugu n’izaturutse mu mahanga, zashimye imigendekere y’amatora y’Umukuru w’Igihugu yabaye mu mutuzo. N’abakandida batsinzwe bahise bemera ko batsinzwe, bashimira Kagame wizewe n’Abanyarwanda.

Perezida Kagame hagati ya Andrew Mitchell (ibumoso) na Ambasaderi w'u Bwongereza mu Rwanda, William Gelling (iburyo)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza