Perezida Kagame yasuye Mushikiwabo mu biro bye muri OIF

Yanditswe na IGIHE
Kuya 17 Gicurasi 2019 saa 05:43
Yasuwe :
0 0

Perezida Kagame uri i Paris mu Bufaransa aho yitabiriye igikorwa kigaragarizwamo imishinga n’ibiganiro bigaruka ku ikoranabuhanga, VivaTech, yasuye Umunyamabanga w’Umuryango w’Ibihugu bivuga Igifaransa, Louise Mushikiwabo, mu biro bye.

Ku ya 12 Ukwakira 2018 nibwo Mushikiwabo Louise yemejwe n’abakuru b’ibihugu bigize Umuryango w’Ibihugu bikoresha Ururimi rw’Igifaransa, OIF, nk’Umunyamabanga Mukuru wawo muri manda y’imyaka ine ariko ishobora kongerwa.

Yasimbuye kuri uyu mwanya Umunya-Canada, Michaëlle Jean, atangira inshingano ku wa 3 Mutarama 2019. Ubu hashize iminsi 134 (amezi ane n’iminsi 14) ari muri izi nshingano.

Perezida Kagame wamutanze nk’umukandida ndetse akamushyigikira kuva urugendo rwo guhatanira uyu mwanya rwatangira, yamusuye mu biro bye ndetse bagirana ibiganiro nubwo hatatangajwe ibyo bunguranyeho ibitekerezo.

Ibiro by’Umukuru w’Igihugu, Village Urugwiro, bibinyujije kuri Twitter, byatangaje amafoto ya Perezida Kagame ari kuganira na Mushikiwabo ndetse binagaragaza ifoto y’urwibutso yafatanye n’abakozi bose ba OIF.

Icyicaro gikuru cya OIF giherereye ku muhanda wa 19-21 avenue Bosquet mu Mujyi wa Paris. Uyu muryango ugizwe n’ibihugu 84 birimo ibinyamuryango byuzuye 54, ibihugu bine byiyunze n’ibihugu 26 by’indorerezi.

Ibihugu binyamuryango biba bifite uburenganzira bwo kwitabira inama za OIF, gutanga kandidatire ku myanya ihatanirwa, gusaba kwakira inama za OIF n’ibindi.

Perezida Kagame yasuye Louise Mushikiwabo ku cyicaro gikuru cya OIF
Perezida Kagame yagiranye ibiganiro n'Umunyamabanga Mukuru wa OIF, Louise Mushikiwabo
Ibiganiro bya Perezida Kagame na Mushikiwabo byitabiriwe n'abandi bayobozi barimo Minisitiri w'Ubucuruzi n'Inganda, Soraya Hakuziyaremye; Ambasaderi w'u Rwanda, Jacques Kabale na Ines Mpambara uyobora Ibiro by'Umukuru w'Igihugu
Perezida Kagame ubwo yari mu nyubako ikoreramo OIF
Perezida Kagame ubwo yandikaga mu gitabo cy'abashyitsi basuye icyicaro gikuru cya OIF
Perezida Kagame asezera Mushikiwabo wamuherekeje akamugeza ku modoka ye
Perezida Kagame yafashe ifoto y'urwibutso hamwe n'abakozi ba OIF bose

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza