Kwamamaza

Perezida Kagame yatangaje intiti icyenda zizamufasha kuvugurura Komisiyo ya AU

Yanditswe kuya 22-10-2016 saa 14:26' na Ntakirutimana Deus


Perezida Paul Kagame yatangaje izindi ntiti ebyiri ziyongera kuri zirindwi yatoranyije zizamufasha gutegura impinduka muri Komisiyo y’Umuryango wa Afurika Yunze Ubumwe, AU.

Perezida Paul Kagame yahawe inshingano zo gutegura impinduka muri iyi Komisiyo mu Nama ya 27 ya AU yabereye i Kigali muri Nyakanga 2016.

Umukuru w’Igihugu yabanje gutoranya abagabo bane barimo Dr.Donald Kaberuka wahoze ayobora Banki Nyafurika Itsura Amajyambere, Acha Leke, Umuhanga mu bukungu wanditse raporo yamamaye izwi nka ‘Lions on the move’ , akaba umufatanyabikorwa Mukuru w’Ikigo McKinsey & Co, Rwiyemezamirimo w’Umuherwe akaba n’Umugiraneza w’Umunya-Zimbabwe Strive Masiyiwa ndetse n’Umunya-Guinée-Bissau, Dr.Carlos Lopes w’imyaka 56 wari Umunyamabanga Mukuru Wungirije w’Umuryango w’Abibumbye akaba n’Umunyamabanga Nshingwabikorwa wa Komisiyo y’Ubukungu ya Afurika.

Nyuma yo gutangaza aya mazina, uwitwa Ndagire Gladys yifashishije urubuga rwa Twitter yamubajije impamvu muri iri tsinda hatagaragaramo umugore.

Icyo gihe Perezida Kagame yamusubije ko ikipe itaruzura kandi ko hari abagore bazayijyamo bagafatanya kuvugurura Komisiyo ya AU.

Ati “Ikipe ntiruzura. Dutegereje ko abagore babiri batwemerera kujya mu ikipe. Turateganya batatu.”

Ubu ku rutonde rw’abari mu bagize iyo Komisiyo harimo abagore bane; bivuze ko hongerewemo benshi ugereranyije n’abo Umukuru w’Igihugu yari yatangaje, byatumye umubare w’abo wenda kungana n’uw’abagabo.

Abagore bongewemo bagizwe na Cristina Duarte, wahoze ari Minisitiri ushinzwe Imari n’Igenamigambi muri Cap Vert, akaba ari no mu bagize inama y’Abaguverineri ba Banki Nyafurika Itsura Amajyambere ndetse n’Ikigega Mpuzamahanga cy’Isi.

Barimo kandi Mariam Mahamat Nour, Minisitiri ushinzwe Ubukungu, Igenamigambi ndetse n’Ubutwererane Mpuzamahanga muri Tchad.

Yatoranyije kandi Vera Songwe, Umuyobozi Mukuru w’Ishami rya Banki y’Isi rishinzwe ubukungu muri Afurika y’Iburengerazuba n’iyo hagati na Amina J. Mohammed wabaye Umujyanama udasanzwe w’Umunyamabanga Mukuru wa Loni ku bijyanye n’intego z’ikinyagihumbi.

Umugabo umwe wongewemo ni Tito Mboweni, wahoze ari Guverineri Mukuru wa Banki Nkuru ya Afurika y’Epfo, akaba yarabaye n’umwirabura wa mbere wahawe umwanya mu buyobozi bw’Afurika y’Epfo nyuma y’itotezwa ry’abirabura(Apartheid) ryayogoje icyo gihugu, nk’uko The New Times yabyanditse.

Kuvugurura imikorere ya Komisiyo ya AU n’izindi nzego, byemejwe mu nama yo muri Mutarama 2016, kugira ngo imikorere yayo ijyane n’ibiteganywa mu cyerekezo 2063 Afurika yihaye.

Amavugurura azakorwa mu miyoborere n’imikorere ya AU, azasobanura neza inshingano n’imikorere z’umuryango, ku buryo hagendewe kuri gahunda zihari n’abakozi bawo bashobora kwiyongera.

Hazavugururwa kandi amabwiriza agenga abakozi ba Komisiyo ya AU, uburyo bwo gupima uko inzego zigera ku byo ziyemeje, igenzura ry’imbere no hanze y’uru rwego [audit], kunoza gahunda y’uburyo abayobozi bakora ingendo, uburyo bwo gutanga amasoko n’andi mabwiriza ngenderwaho, hagamijwe ko ubushobozi buhari bukoreshwa neza.

Abatoranyijwe bose bagiye bakora mu nzego z’ibyerekeranye n’ubukungu ndetse no mu by’iterambere.

Raporo y’iri tsinda izatangarizwa mu nama y’abakuru b’ibihugu bigize AU izabera muri Ethiopia muri Mutarama 2017.

Inkuru bifitanye isano:

- Perezida Kagame yahawe gukurikirana amavugurura ya komisiyo ya AU

- Kaberuka na Lopes mu ntiti ziri gufasha Perezida Kagame kuvugurura Komisiyo ya AU

- Kagame agiye kongera abagore batatu mu ntiti zizamufasha kuvugurura Komisiyo ya AU

Perezida Kagame yashyizeho intiti zizamufasha gukora ivugurura muri Komisiyo y'Umuryango wa Afurika Yunze Ubumwe
Uhereye hejuru ibumoso, Dr Acha Leke, Cristina Duarte, Dr Donald Kaberuka, Dr Carlos Lopes, Mariam Mahamat Nour, Amina J. Mohammed, Strive Masiyiwa, Tito Mboweni, Vera Songwe bashyizwe ku rutonde rwo kuvugura Komisiyo ya AU

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved