Perezida Kagame yavugiye ijambo mu Nteko Ishinga Amategeko ya Djibouti

Yanditswe na Rabbi Malo Umucunguzi
Kuya 19 Mata 2017 saa 12:46
Yasuwe :
0 0

Perezida Kagame yagejeje ijambo ku Nteko Ishinga Amategeko n’abagize Guverinoma ya Djibouti, mu ruzinduko rw’akazi rw’iminsi ibiri yarimo mu gihugu cya Djibouti.

Mu ijambo rye Perezida Kagame yashimangiye ko Afurika ikeneye kuvuga rumwe kugira ngo ibashe kugera ku iterambere, kandi ibihugu bigafatanya mu kurenga imbogamizi bihura nabyo.

Yavuze ko u Rwanda na Djibouti badahuje umupaka, ariko intera itandukanya ibihugu itabuza ko ubucuti bwakomera. Yashimye iterambere rya Djibouti riri kwihuta, ndetse avuga ko umusaruro waryo utagarukira ku mbibi z’igihugu gusa.

Perezida Kagame yavuze ko u Rwanda na Djibouti bisangiye ibyifuzo ku baturage, haba mu burezi, ubuzima, ubumenyi n’iterambere, bikanasangira ubushake mu kugira umugabane ushyize hamwe nk’ikintu cyatuma n’ibindi byifuzwa bishoboka.

Yakomeje agira ati “Ikintu cy’ingenzi u Rwanda rushyize imbere mu iterambere ni ukwishyira hamwe n’ibindi bihugu, haba mu birebana n’ubukungu cyangwa politiki.”

Perezida Kagame yavuze ko “Afurika ifite ibikenewe byose ngo yubake amahirwe arema icyizere cy’uyu munsi n’ahazaza heza kuri twe twese”, aho abantu bose bahuriye ku ndangagaciro n’ubwo imbogamizi zigenda zigira umwihariko kuri buri gihugu.

Yavuze ko ibihugu bibasha gutera imbere ari ibikora bishingiye ku myumvire ituruka ku miterere y’ikibazo bifite, amateka y’ibihugu ubwabyo ndetse n’ibyifuzo by’abaturage.

Yakomeje agira ati “Tugomba guhuza imvugo nk’umugabane. Ingorane izo arizo zose twaba duhura nazo muri rusange cyangwa se mu bihugu byacu by’umwihariko.”

Perezida Kagame yagarutse no ku mavugurura arangaje imbere mu Muryango wa Afurika Yunze Ubumwe (AU) avuga ko ari kugenda neza kandi azatuma umuryango urushaho gutanga umusaruro, ukagera ku ntego zawo kandi ukishakamo ubushobozi aho gutegereza abaterankunga.

Ku mubano uri imbere w’u Rwanda na Djibouti, Perezida Kagame yagize ati “Turashaka ko Abanyarwanda n’Abanya-Djibouti barushaho gusurana, bakigiranaho, kandi abo mu gihugu kimwe bagashora imari mu kindi.”

“Turi gukora ibishoboka byose kugira ngo ubufatanye bw’ibihugu byombi butange umusaruro ufatika ku baturage bacu.”

Umukuru w’Igihugu yasoje ijambo agaragaza ubushake bwo kurushaho kwagura umubano mu myaka iri imbere.

Yavuye mu ngoro y’Inteko Ishinga Amategeko, aho we na Madamu Jeannette Kagame bakomereje ku gusura icyambu cya Doraleh, ari nako basoza uruzinduko rw’iminsi ibiri muri Djibouti.

Muri urwo ruzinduko hasinywe n’amasezerano ajyanye n’ingendo zo mu kirere, ishoramari, ubufatanye mu ikoranabuhanga, gukuriraho ikiguzi cya visa abadipolomate n’abafite pasiporo za serivisi, hamwe no gushyiraho komisiyo ihuriweho n’ibihugu byombi.

Amafoto: Village Urugwiro


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza