Perezida Kagame yunamiye intwari za Mozambique

Yanditswe na Philbert Girinema
Kuya 25 Ukwakira 2016 saa 01:02
Yasuwe :
0 0

Perezida wa Repubulika y’u Rwanda, Paul Kagame, mu gitondo cyo kuri uyu wa Kabiri tariki 25 Ukwakira 2016, yunamiye intwari za Mozambique zirimo uwaharaniye ubwigenge bw’icyo gihugu, Eduardo Chivambo Mondlane.

Nkuko Perezidansi y’u Rwanda yabitangaje ibinyujije kuri Twitter, Perezida Kagame yahaye icyubahiro intwari za Mozambique zaguye ku rugamba rwo guharanira ubwigenge rwabaye hagati ya 1961–1974.

Umunsi w’intwari muri Mozambique wizihizwa buri wa 3 Gashyantare. Ni umunsi bibukaho abasirikare baguye mu rugamba rwo kurwanira ubwigenge bw’igihugu bwabonetse mu 1975, by’umwihariko bibuka iyicwa ry’uwashinze ishyaka rya politiki ryaharaniye ubwigenge, Eduardo Chivambo Mondlane.

Eduardo Mondlane yavutse kuwa 20 Kamena 1920 yicwa kuwa 3 Gashyantare 1969. Mu 1962 muri Tanzania yahashingiye ishyaka FRELIMO (Front for the Liberation of Mozambique) ryaharaniye ubwigenge bwa Mozambique mu ntambara yo kurwanya ubukoloni bw’Abanya-Portugal yabaye mu 1961–1974.

Yemeraga cyane uburyo bwo guhirimbanira icyiza bwakoreshejwe na Mahatma Ghandi na Martin Luther King, kandi akemera ko igikorwa icyo aricyo cyose kitarimo urwango ari uburyo bwiza bwo guhirimbanira ukwishyira ukizana kw’Abanya-Mozambique.

Mu 1969 Eduardo Mondlane nibwo yiciwe mu biro bye i Dar es Salaam n’umupolisi w’Umunya-Portugal, wamuteze igisasu cyari mu ishusho y’igitabo.

Afatwa nk’umubyeyi waharaniye ubwigenge bwa Mozambique. Yapfuye asize abana batatu n’umugore.

Kuri uyu wa kabiri Perezida Kagame arasoza uruzinduko rw’iminsi ibiri agirira muri Mozambique. Ku munsi wa mbere ibiganiro na mugenzi we Filipe Nyusi byibanze ku bufatanye mu nzego zitandukanye zirimo ubwikorezi, ubuhinzi na serivisi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244