Perezida Nyusi wa Mozambique yageze mu Rwanda yitabiriye inama ya ICASA

Yanditswe na Habimana James
Kuya 2 Ukuboza 2019 saa 01:45
Yasuwe :
0 0

Perezida wa Mozambique, Filipe Jacinto Nyusi, yageze mu Rwanda aho yitabiriye Inama Mpuzamahanga yiga ku cyorezo cya Sida n’Indwara zandurira mu mibonano mpuzabitsina muri Afurika izwi nka ICASA.

Akigera mu Rwanda, Perezida Nyusi yakiriwe na Minisitiri w’Ububanyi n’Amahanga, Dr Vincent Biruta.

Iyi nama Perezida Nyusi yitabiriye yatangiye kuri uyu wa Mbere muri Kigali Convention Centre. Yitabiriwe n’abantu bo mu bihugu 150 byo ku Isi bagera ku bihumbi 10 barimo abashakashatsi, abanyeshuri, abarimu muri za kaminuza, abaganga, abakora mu by’imiti n’abarimo abakuru b’ibihugu bitanu n’abafasha b’abakuru b’ibihugu byo muri Afurika biga ku ngamba zo kurwanya Sida.

Iyi ni inama iba buri myaka ibiri ikaba ari nayo nini kurusha izindi muri Afurika kuko ihuza abantu ibihumbi, ibihugu byinshi biba bishaka kuyakira ariko bica mu mapiganwa. Ni inama ihuza abakuru b’ibihugu na za guverinoma n’abandi bahagarariye ibyiciro bitandukanye.

Kugeza ubu ubushakashatsi bushya bwerekanye ko umubare w’abantu bashya bandura Virusi itera Sida mu Rwanda, ugabanuka uko imyaka ishira, by’umwihariko ukaba waravuye kuri 3/1000 (barenga ibihumbi 10) mu 2014 ukagera kuri 1/1000 (barenga 5400) mu 2019.

U Rwanda kandi rwarenze zimwe mu ntego Ishami ry’Umuryango w’Abibumbye rishinzwe kurwanya SIDA (UNAIDs) ryihaye yo kugeza ubuvuzi ku bafite virusi itera Sida mu 2020.

Ni intego (90-90-90) isobanura ko mu 2020 abafite virusi itera Sida bazaba bazi uko bahagaze ari 90%, abafata imiti 90% naho kugabanuka kwa virusi itera Sida bikaba 90%.

UNAIDS igaragaza ko ku Isi mu bantu barenga miliyoni 39 bafite virusi itera Sida, 79% aribo bazi uko bahagaze, batatu muri batanu bayirwaye bafata imiti igabanya ubukana gusa naho 53% by’abafite virusi itera Sida ntabwo bipimisha ngo bamenye uko bahagaze.

Perezida wa Mozambique, Filipe Jacinto Nyusi, yageze mu Rwanda aho yitabiriye Inama Mpuzamahanga yiga ku cyorezo cya Sida n’Indwara zandurira mu mibonano mpuzabitsina muri Afurika izwi nka ICASA. Aha yari yakiriwe na Minisitiri w’Ububanyi n’Amahanga, Dr Vincent Biruta ku wa 2 Ukuboza 2019
Perezida Nyusi yakiriwe na Dr Biruta akigera mu Rwanda
Perezida Nyusi yakiriwe na Minisitiri w'Ububanyi n'Amahanga, Dr Vincent Biruta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza