Kwamamaza

Perezida Kagame yijejwe ko nta wuzahungabanya u Rwanda aturutse Mozambique

Yanditswe kuya 25-10-2016 saa 10:38' na Ntakirutimana Deus


Perezida wa Mozambique, Filipe Nyusi yasezeranyije mugenzi we w’u Rwanda Paul Kagame ko nta Munyarwanda uzava muri Mozambique ngo ahungabanye umutekano w’u Rwanda.

Ibi abakuru b’ibihugu byombi babiganiriye ku wa Mbere tariki ya 24 Ukwakira 2016, mu ruzinduko rw’iminsi ibiri Perezida Kagame yagiriye muri Mozambique.

Abakuru b’ibihugu byombi bagiranye ikiganiro gifitiye inyungu abaturage b’ibihugu byombi, cyibanze ku bufatanye mu nzego zitandukanye zirimo ubwikorezi, ubuhinzi na serivisi.

Mu kiganiro Minisitiri w’Ububanyi n’Amahanga w’u Rwanda, Louise Mushikiwabo yahaye itangazamakuru, yagarutse ku byaganiriwe n’abakuru b’ibihugu byombi.

Mushikiwabo yavuze ko Perezida Nyusi yijeje mugenzi we ko nta wuzava muri Mozambique ngo abe yahungabanya ubusugire bw’u Rwanda.

Ati “Dufashe aka kanya ngo dushimire umukuru w’iki gihugu cy’inshuti, ku byo yavuze ko atazemera ko hari igikorwa na kimwe gihungabanya umutekano w’u Rwanda, kizakorwa n’Abanyarwanda baba hano muri Mozambique.”

Minisiteri z’Ububanyi n’amahanga z’ibihugu byombi n’inzego z’umutekano ngo zizakomeza gufatanya mu gutanga ubufasha ku Banyarwanda baba muri icyo gihugu hagendewe ku byangombwa byabo, mu buryo bwemewe n’amategeko.

Ku bijyanye n’ubwikorezi, abakuru b’ibihugu byombi barebeye hamwe uko indege ya RwandAir yazatangira mu gihe cya vuba ingendo ziva i Kigali zerekeza i Maputo mu murwa mukuru wa Mozambique. Ibyo bizakorwa muri gahunda ya RwandAir yo kwagura ingendo zayo mu karere ka Afurika y’Amajyepfo.

Impande zombi kandi zumvikanye ko Minisitiri w’Ubuhinzi wa Mozambique azasura mugenzi we w’u Rwanda mu rwego rwo guhanahana ubunararibonye ibi bihugu bifite muri urwo rwego ndetse no kurebera hamwe uko habaho ubuhahirane ibicuruzwa bikajyanwa ku masoko y’ibi bihugu byombi.

Mu bijyanye no gukomeza gutsura umubano, Minisitiri Mushikiwabo yavuze ko hashyizweho itsinda rizakurikiranira hafi ishyirwa mu bikorwa ry’ibyemeranyijwe n’impande zombi.

Ati “Abakuru b’ibihugu byombi bumvikanye ko binyujijwe muri Minisiteri z’Ububanyi n’Amahanga z’ibihugu byombi, hashyirwaho komisiyo igomba gukurikirana no kwihutisha ishyirwa mu bikorwa ry’imyanzuro ibihugu byombi byumvikanyeho.”

Minisitiri w’Ububanyi n’Amahanga wa Mozambique, Oldemiro Marques Júlio Baloi, yashimye umubano w’igihugu cye n’u Rwanda agaragaza ko ari n’uw’ubuvandimwe hagati y’ibihugu byombi.

Yashimye kandi iterambere ry’u Rwanda, igihugu cyateye imbere mu buryo budasanzwe, ku buryo ngo nubwo ari igihugu gito, cyabaye igikomeye ku mugabane wa Afurika ku bwo kwiyubaka nyuma y’igihe gishegeshwe na Jenoside yakorewe abatutsi mu 1994.

Muri uru ruzinduko kandi Perezida Kagame yabonanye na Perezida w’Inteko Ishinga Amategeko ya Mozambique, Veronica Macamo Dlhovo.

Bitegamyijwe ko Perezida Kagame aza kugirana ibiganiro n’abikorera batandukanye bo muri Mozambique, abashakashatsi, abanyamakuru, abarimu ba za kaminuza n’abandi, ku ruhare rw’abikorera mu Rwanda mu iterambere ry’igihugu.

Perezida Kagame yaherukaga muri Mozambique muri 2004, ariko yahuye na mugenzi we ubwo yari mu nama y’Umuryango wa Afurika Yunze Ubumwe iheruka kubera mu Rwanda muri Nyakanga uyu mwaka.

Perezida Kagame yakiriwe na mugenzi we wa Mozambique Filipe Nyusi
Perezida Nyusi yijeje Kagame ko nta munyarwanda uba muri Mozambique uzahungabanya umudendezo w'u Rwanda
Ibihugu byombi bizashyiraho komisiyo ihuriweho n'impande zombi izakurikirana ishyirwa mu bikorwa ry'ibyo byiyemeje

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved