Perezida w’u Busuwisi yacyeje Muhire ku gashya mu mushinga w’ikoranabuhanga

Yanditswe na Ishimwe Israel
Kuya 12 Ukwakira 2016 saa 12:44
Yasuwe :
0 0

Perezida w’u Busuwisi, Johann Schneider-Ammann yakiriye ba rwiyemezamirimo bakizamuka bafite imishinga itandukanye barimo n’Umunyarwanda uyobora Sosiyete Market Merger Ltd yakoze porogaramu yitwa MERGIMS, Louis-Antoine Muhire, wari uhagarariye umugabane wa Afurika muri aya marushanwa.

Uyu muhango wabereye mu Mujyi wa Zurich, kuri uyu wa 11 Ukwakira 2016, ubwo Perezida w’u Busuwisi yaganiraga na ba rwiyemezamirimo 30 bahize abandi mu ikoranabuhanga ryiswe Kickstart Accelerator hagamijwe kubateza imbere mu bukungu (Financial IT start-ups).

Muhire yagize amahirwe yo kuba umushinga we waratoranijwe muri 850 yari iri mu irushanwa, agahagararira umugabane wa Afurika, ahita abona amahirwe yo kuba muri 30 babashije guhura na Perezida w’u Busuwisi ndetse n’Abayobozi b’ibigo bikomeye muri iki gihugu ngo babagire inama ndetse banafashe guteza imbere imishinga yabo.

Perezida Johann Schneider-Ammann yashimiye byimazeyo Muhire kubera igitekerezo cye cy’agashya mu ikoranabuhanga ndetse anavuga ko yifuza ko urubyiruko rwinshi mu Busuwisi rwagira ukwitanga no kwirundurira mu byo rukora kuko abona ko ari bwo buryo ibigo bikomeye bijya bivukamo.

Muri uwo muhango Muhire yabonye umwanya mwiza wo kugaragaza ibyo umushinga we w’ikoranabuhanga ukora, ndetse no kwereka amahanga ko u Rwanda ruha ikaze abashoramari kandi ko rukomeje gukataza mu ikoranabuhanga.

Sosiyete Market Merger Ltd ya Muhire ifite porogaramu yitwa MERGIMS ifasha abanyarwanda bari mu mahanga kwishyurira ababo baba mu Rwanda serivisi zitandukanye zirimo umuriro w’amashanyarazi, ibikoresho by’ikoranabuhanga, amafaranga yo guhamagara n’amafaranga y’ishuri, imiti, no kwishyura izindi serivisi hakoreshejwe ikoranabuhanga rya telefoni zigezweho cyangwa mudasobwa binyuze ku rubuga www.mergims.com.

Muhire avuga ko yatangiye kugirana ibiganiro n’abashoramari kandi bashora imari yabo mu Rwanda mu ikoranabuhanga byaba ari ibintu by’agaciro.

Iki gikorwa cy’Umuryango w’Ibihugu by’Ubumwe bw’u Burayi cyo gutera inkunga ibigo by’ikoranabuhanga bikizamuka bifite imishinga myiza (European Union FinTech accelerator) cyatewe inkunga n’ibigo bikomeye mu Busuwisi nka UBS, CREDIT SWISS, PWC, EY na MIGROS.

Ibi bigo ngo birimo kurambagiza ahari uburyo hirya no hino ku Isi bishobora kuba byashora imari bikaba ari amahirwe ku Munyarwanda Muhire ndetse n’igihugu cyose kuko muri iryo shoramari havamo akazi k’urubyiruko.

Ubu buryo buzafasha ba rwiyemezamirimo kwiyubaka, kuzamura ishorami ryabo ndetse no kugirana ubufatanye n’ibigo bikomeye mu Busuwisi.

Muhire Antoine yavukiye mu Karere ka Bugesera. Ku myaka 12 y’amavuko nibwo yagiye muri Canada aho yigiye amashuri ye yisumbuye.

Kuva mu mwaka wa 2005 kugeza muri 2008, yize mu ishami rya Kaminuza ya Otawa aho yakuye ubumenyi mu bijyanye n’ubugeni ndetse n’ikoranabuhanga. Yakomereje amashuri ye muri kaminuza ya Otawa aho yakuye impamyabumenyi ebyiri z’icyiciro cya kabiri muri 2011, mu by’ubukungu ndetse n’iyamamazabikorwa rusange.

Nyuma yo kurangiza amashuri ye, Louis-Antoine Muhire yagumye muri Canada aho yahise atangira gukora mu gashami k’ubuvugizi muri Polisi y’i Montréal aho yakoze imyaka itatu.

Muri 2014 nibwo yagarutse mu Rwanda gutangiza sosiyete ye ya Market Merger Ltd.

Inkuru bifitanye isano: Muhire yatsindiye miliyoni 19 mu marushanwa ya ba rwiyemezamirimo bakizamuka

Perezida w’u Busuwisi, Johann Schneider-Ammann na rwiyemezamirimo Muhire Antoine
Abitabiriye ibiganiro byahuje Perezida w’u Busuwisi, Johann Schneider-Ammann na ba rwiyemezamirimo bakizamuka
Muhire Antoine(uwa kabiri iburyo) akomeje kwegukana ibihembo bitandukanye kubera umushinga mwiza w'ikoranabuhanga
Muhire Antoine amurika umushinga we w'ikoranabuhanga
Perezida w’u Busuwisi, Johann Schneider-Ammann akurikira ba rwiyemezamirimo mu gikorwa cyo kumurika imishinga yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza