Kwamamaza

Philip Cotton wa UR, Mutakwasuku na Sheikh Bahame mu bahawe inshingano nshya

Yanditswe kuya 12-11-2016 saa 10:48' na Philbert Hagengimana


Inama y’Abaminisitiri yateranye kuri uyu wa Gatanu tariki ya 11 Ugushyingo yahaye inshingano nshya bamwe mu bayobozi barimo Philip Cotton Usanzwe ari Umuyobozi wungirije wa Kaminuza, Sheikh Bahame Hassan, Mufurukye Fred bo muri MINALOC n’abandi nka Caritas Mukandasira na Yvonne Mutakwasuku wahoze ari Umuyobozi w’Akarere ka Muhanga.

Kimwe mu byemezo by’iyo nama y’Abaminisitiri yari iyobowe na Perezida Kagame, ni ugushyira abayobozi mu myanya itari ifite abayirimo cyangwa gusimbuza abari bayirimo, no kuzuza inama z’Ubuyobozi z’ubutegetsi mu bigo bitandukanye bya Leta.

Bamwe mu bashyizwe muri iyo myanya, harimo Mukandasira Caritas wahoze ari Guverineri w’Intara y’Iburengerazuba, wagizwe Umuyobozi wungirije ushinzwe Uburinganire n’ubwuzuzanye mu kigo cy’igihugu cyita ku kugenzura iyubahirizwa ry’ihame ry’Uburinganire (GMO) aho uwo mwanya awusangiye na Kabera Jean Paul.

Iyo nama y’Abaminisitiri kandi yashyize Mukeshimana Béata mu mwanya w’Umuyobozi wungirije wa Komisiyo ishinzwe kuvugurura Amategeko (RLRC), wahozemo Evode Uwizeyimana wahawe izindi nshingano muri Minisiteri y’Ubutabera.

Abandi bahawe inshingano ziyongera ku zo bari basanganywe barimo Sheikh Bahame Hassan wahoze ari Umuyobozi w’Akarere ka Rubavu, ubu akaba ari Umuyobozi Mukuru ushinzwe Amajyambere Rusange n’Imibereho Myiza y’Abaturage muri Minisiteri y’Ubutegetsi bw’Igihugu (MINALOC), wagizwe Umuyobozi wungirije w’Inama y’Ubutegetsi y’ikigega gifasha abarokotse Jenoside (FARG).

Mufurukye Fred usanzwe ari Umuyobozi Mukuru muri Minisiteri y’Ubutegetsi bw’Igihugu ushinzwe imiyoborere n’imikorere y’inzego z’ibanze muri MINALOC yongerewe inshingano, aho yashyizwe mu nama y’ubutegetsi mu Kigo cy’igihugu cy’Umushinga w’Indangamuntu (NIDA).

Inama y’Abaminisitiri kandi yongerereye inshingano Sano James usanzwe ari Umuyobozi w’Ikigo cy’igihugu gishinzwe amazi n’isukura, WASAC, yashyizwe mu nama y’Ubutegetsi y’Ikigo cy’igihugu cy’umutungo kamere (RNRA).

Undi wahawe inshingano nshya mu basanzwe bazwi mu buyobozi bwite bwa Leta, ni Yvonne Mutakwasuku wahoze ari Umuyobozi w’Akarere ka Muhanga, ubu akaba nta mirimo izwi yari afite nyuma y’aho asoreje manda ye mu ntangiriro z’uyu mwaka.

Mutakwasuku yagizwe Umuyobozi wungirije w’inama y’Ubutegetsi ya Komisiyo y’Igihugu yo kurwanya Jenoside (CNLG).

Nyuma y’imyaka yari ishize Ikigo cy’Igihugu gishinzwe ubuzima (RBC) kitagira Umuyobozi w’Inama y’Ubutegetsi, Inama y’Abaminisitiri yo kuri uyu wa 11 Ugushyingo yashyize kuri uwo mwanya Prof. Philip Cotton, usanzwe ari Umuyobozi mukuru wungirije wa Kaminuza y’u Rwanda.

Dr. Habumuremyi Pierre Damien yagizwe Umuyobozi Mukuru(Chancellor) w’Urwego rw’Igihugu rushinzwe Intwari z’Igihugu, Imidari n’Impeta by’Ishimwe (CHENO), akaba yari asanzwe ari Umukuru w’uru Rwego, na ho Dr. Nkaka Raphael usanzwe ari Umwarimu muri Kaminuza, Ndahiro Tom na Milenge Immaculée bashyizwe mu nama y’Ubutegetsi y’urwo rwego.

Philip Cotton Usanzwe ari Umuyobozi wungirije wa Kaminuza
Dr. Habumuremyi Pierre Damien yagizwe Umuyobozi mukuru w’Urwego rw’Igihugu rushinzwe Intwari z’Igihugu, Imidari n’Impeta by’Ishimwe (CHENO)
Mutakwasuku yagizwe Umuyobozi wungirije w’inama y’Ubutegetsi ya Komisiyo y’Igihugu yo kurwanya Jenoside (CNLG)
Sheikh Bahame, yagizwe Umuyobozi wungirije w’Inama y’Ubutegetsi y’ikigega gifasha abarokotse Jenoside (FARG)

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved