Polisi y’u Rwanda yungutse Abofisiye bashya 415 (Yavuguruwe)

Yanditswe na Philbert Girinema
Kuya 29 Nyakanga 2016 saa 11:07
Yasuwe :
0 0

Polisi y’u Rwanda yungutse abofisiye bato bashya 415 barimo abakobwa 55, babashije gutsinda amasomo bari bamazemo umwaka n’amezi atatu, bakaba bahawe ipeti rya AIP (Assistant Inspector of Police).

Kuri uyu wa Gatanu tariki ya 29 Nyakanga, Polisi y’u Rwanda yungutse abofiye bato bashya 415, basoje amasomo hamwe na bagenzi babo 14 bakomoka mu bindi bihugu, barimo 10 bo muri Sudani y’Epfo, babiri bo muri Uganda na babiri bo muri Namibia.

Umuhango wo gusoza ku mugaragaro amasomo kuri abo bapolisi wayobowe na Minisitiri w’umutekano Sheikh Musa Fazil Harerimana, mu bubasha yahawe na Perezida Kagame nk’uko Amategeko abiteganya.

Mu ijambo rye, Minisitiri Harerimana yibukije abo ba Ofisiye bato ko urwego bashyizwemo runajyana n’inshingano ziremereye, aho biba ari igihango bagiranye n’igihugu ndetse n’abagituye.

Minisitiri Harerimana yagize ati “Kuba Ofisiye mu nzego z’umutekano bijyana n’inshingano ziremereye, ofisiye agomba kuba ikimenyetso cyo gukunda igihugu, kugikundisha abo ayobora n’abamugana bose, baba Abanyarwanda ndetse n’abanyamahanga."

Yakomeje asobanura akamaro k’amasomo abo bapolisi baba bahawe, ati “Amahugurwa nk’aya ashimangira amahitamo Abanyarwanda twakoze, yo gushyira umutekano ku isonga rya byose. Ibi twabitewe no kuba tuzi neza ikiguzi cyo kutawugira, urugero rwa hafi ni inzirakarengane zirenga miliyoni zazize Jenoside yakorewe Abatutsi.”

Minisitiri Harerimana yanibukije Abanyarwanda bose ko kwimakaza umutekano no kuwugiramo uruhare ari inshingano ya buri wese, yibutsa ko ari na cyo Perezida Kagame ahora abakangurira, aho agira ati “Tugomba gukora tutizigama kugirango tubashe guha buri Munyarwanda wese umutekano, kugirango abashe kwishyira yizane, ni yo nshingano yacu, nta n’undi twayishinga nta n’uwo twayisiganira."

Uyu muhango wabereye mu ishuri rya Polisi i Gishari mu Karere ka Rwamagana, witabiriwe na Minisitiri w’ingabo Gen James Kabarebe, wari kumwe n’abandi bayobozi batandukanye muri Polisi y’u Rwanda, ndetse n’ intumwa za Polisi ya Uganda.

Abapolisi 429 basoje amasomo abagira abofisiye bato, ni icyiciro cya munani kuva amasomo nk’ayo yatangira gutanga mu mwaka w’2000, ubwo hashyirwagaho Polisi y’igihugu.Aba basoje amasomo bayatangiye kuwa 4 Gicurasi 2015.

Umuhango wo gusoza icyiciro cya karindwi cyabanjirije iki, wabaye tariki ya 12 Gicurasi 2015, abapolisi 462 barimo ab’igitsina gore 51 bakaba ari bo bashoje amasomo yo ku rwego rw’abofisiye bato.

Abarangije basabwe gukundisha igihugu ababagana n'abo bakorana
Mu barangije harimo abakobwa 55

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza