Polisi yaganirije urubyiruko rw’abayisilamu ku iterabwoba, rwiyemeza gukumira ubutagondwa

Yanditswe na Thamimu Hakizimana
Kuya 17 Gashyantare 2017 saa 11:22
Yasuwe :
0 0

Abayobozi b’urubyiruko rw’idini ya Islam mu Rwanda rwiyemeje kuba abafatanyabikorwa ba Polisi y’u Rwanda mu gukumira ingengabitekerezo y’ubutagondwa n’ubuhezanguni.

Ibi byemejwe kuri uyu wa Kane, tariki ya 16 Gashyantare 2017, mu mahugurwa y’abayobozi b’urubyiruko rw’abayisilamu mu Rwanda yabereye ku cyicaro cya Polisi y’u Rwanda ku Kacyiru.

Muri aya mahugurwa yateguwe n’umuryango w’abayisilamu mu Rwanda (RMC) na Polisi y’u Rwanda, urwo rubyiruko rurenga 70 rwemeje ko rugiye guhita rushyiraho amatsinda yo gukangurira abanyarwanda kwirinda no kurwanya ingengabitekerezo z’ubutagondwa.

Umuyobozi w’urwo rubyiruko mu Rwanda, Ishimwe Saidi, yabwiye IGIHE ko yizeye ko ayo matsinda azabafasha cyane kwihuriza hamwe nk’urubyiruko rw’abayisilamu ku buryo bizabafasha kudashorwa mu bitekerezo by’ubutagondwa.

Ati “Azadukemurira (amatsinda) ikibazo cyo gutatana twari dufite kuko azatuma tumenya aho urubyiruko rwose rwa’abayisilamu ruri cyane urutiga n’urutagira akazi, bityo bitworohere kurukusanyiriza hamwe ku buryo nta uzapfa kuducengezamo izo nyogisho mbi.”

Yakomeje ashimangira ko ayo matsinda azanabafasha kwibumbira mu makoperative mu rwego rwo kwiteza imbere kubera ko byagiye bigaragara ko hari n’urubyiruko rujya mu mitwe y’iterabwoba kubera ikibazo cy’ubukene.

Mufti w’u Rwanda, Sheikh Hitimana Salim, yemeza ko aya matsinda azafasha abayisilamu batandukanye kuva mu myumvire y’ubutagondwa.

Ati “ Aya matsinda ndakeka ari imwe mu nzira ikomeye kandi y’ihame ishobora kudufasha kugira ngo byibuze abantu bave muri iyo myumvire y’ubutagondwa kuko atari imyumvire y’abayisilamu, kuko azabafasha gusobanukirwa n’ibijyanye n’ubutagondwa n’ibisobanuro byabwo kugira ngo babwirinde cyane ko azajya anifashishwa mu biganiro bitandukanye by’imbwirwaruhame.”

Umuyobozi w’ishami rya Polisi rishinzwe kurwanya iterabwoba, ACP Denis Basabose, avuga ko aya matsinda azaba ijisho ry’abayisilamu n’abanyarwanda mu kureba abantu bose bafite iyo myumvire y’ubuhezanguni.

Ati “ Twizeye ko ayo matsinda namara kujyaho azaba ijijo ry’abaturage, ry’abayisilamu mu kuturebera no kubarebera ndetse no kurebera igihugu abantu bose bashobora kuba bagiye muri iyo myemerere hakiri kare, bityo agakumira ubutagondwa, ubuhezanguni n’iterabwoba muri rusange.”

Yakomeje avuga ko bahaye inshingano uru rubyiruko ruzahagarira ayo matsinda kugenzura niba hari abafite iyo myemerere cyangwa iyo ngengabitekerezo n’abayikwirakwiza ndetse no gufasha abamaze kuyandura bakagerageza kumuhindura, hagira ubananira bakamugeza mu nzego zibifitiye ubundi bumenyi buhambaye.

Aya matsinda azahuriramo urubyiruko rwo mu idini ya Islam n’abandi batari abayoboke baryo, aho bazajya baganirira hamwe ibijyanye n’ubutagondwa n’uko babyirinda ari nako babikangurira abandi baturage.

Urubyiruko ruhagarariye urundi mu idini ya Islam rwiyemeje gushyiraho amatsinda azarufasha guhangana n'ibitekerezo by'ubutagondwa
Abayobozi b'abayisilamu mu Rwanda bari bitabiriye aya mahugurwa
Sheikh Hitimana Salim yemeza ko aya matsinda azafasha abaturage kwigobotora ingengabitekerezo y'ubutagondwa
ACP Basabose avuga ko uru rubyiruko ari nk'ijisho ry'igihugu rizajya ribasha kuvumbura abafite ibitekerezo by'ubuhezanguni
IGP Emmanuel Gasana yasabye uru rubyiruko gushyira mu bikorwa ibyo rwiyemeje ntibihere mu magambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244