Kwamamaza

Polisi yerekanye batatu bacyekwaho kwiyita abakozi b’Urwego rw’Umuvunyi n’abacamanza

Yanditswe kuya 10-11-2016 saa 17:20' na Thamimu Hakizimana


Polisi y’u Rwanda yerekanye abantu batatu barimo abagabo babiri n’umukobwa bo mu Karere ka Rusizi mu Ntara y’Iburengerazuba bakurikiranyweho icyaha cyo kwiyita abakozi b’Urwego rw’Umuvunyi n’abacamanza bagamije kuyobya abantu kugira ngo babone indonke.

Aba bantu bagaragarijwe itangazamakuru kuri uyu wa Kane tariki 10 Ugushyingo 2016, igikorwa cyabereye ku cyicaro gikuru cya Polisi giherereye ku Kacyiru.

Polisi y’u Rwanda ivuga ko aba bantu batawe muri yombi ku wa Mbere tariki 8 Ugushyingo 2016 nyuma y’uko batse uwitwa Fulgence ruswa y’amafaranga ibihumbi 300 kugira ngo bamukemurire ikibazo cy’urubanza yari yagejeje mu Rwego rw’Umuvunyi.

Umukobwa wakoreshaga izina rya Aline (Mamy) yiyitaga umukozi w’Urwego rw’Umuvunyi ari we wari ukuriye iri tsinda, mu gihe umwe muri aba bagabo yiyitaga umucamanza, na ho undi akiyita umunyamabanga we.

Polisi yasobanuiye kandi ko aba bantu bafashwe ari batanu kuko hari bagenzi babo bari bafashwe bamaze guhabwa ruswa na Fulgence bamubeshya ko ari abakozi b’Urwego rw’Umuvunyi bari bumukurikiranire iby’urubanza rw’inzu yari yaguze ariko itamwanditseho, yari yatsinzwe.

Umuvugizi wa Polisi y’u Rwanda, ACP Theos Badege yaboneyeho gusaba abaturage kumenya ko hari inzego zabashyiriweho zanabegerejwe ngo kuko hari na telefone y’ubuntu yashyizweho ku buryo badakwiye umuntu n’umwe ubababeshya ko yigerera mu nzego z’ubuyobozi yigize umusirimu cyangwa umuhanga ngo arabakemurira ibibazo.

Umuvugizi w’Urwego rw’Umuvunyi, Kajangana Jean Aimé we avuga ko bifuza ko abantu bamenya ibi bikorwa bibi abantu bamaze iminsi bakora kuko bamaze iminsi bafite amakuru y’uko hari abantu basigaye biyita abakozi b’uru rwego kugira ngo bibe abaturage.

Yagize ati “ Twari dufite amakuru y’uko hari abantu biyitirira ko ari abakozi b’urwego rw’umuvunyi bagakora uko bashoboye bakamenya ko hari abantu bafite ibibazo bakabahamagara bakababwira ko babahaye ruswa yakwihutisha ibibazo byabo.”

Umwe mu batawe muri yombi yemeye icyaha cy’uko yiyise umucamanza kugira ngo Fulgence amuhe amafaranga ariko avuga ko yashutswe n’uwo mukobwa Aline (Mamy).

Yagize ati “ Ndi hano kubera ko nabeshye, niyise ko ndi umucamanza ntariwe kugira ngo Fulgence aduhe amafaranga ibihumbi 300.”

Yakomeje avuga ko Polisi y’i Rusizi yabataye muri yombi ubwo yarimo kwigisha mugenzi we uko ari bwigire umunyamabanga we kugira ngo bahabwe ayo mafaranga.

Aba bantu nibaramuka bahamwe n’icyaha bazahanishwa ingingo ya 616 iteganya igihano kuva ku myaka itatu n’ihazabu ishobora kugera ku ibihumbi 500 cyangwa kimwe muri byo.

Abagabo babiri bacyekwaho kwiyita abacamanza batawe muri yombi
Umuvugizi w’Urwego rw’Umuvunyi, Kajangana Jean Aimé we avuga ko hari abantu basigaye biyita abakozi b’uru rwego kugira ngo bibe abaturage
Umuvugizi wa Polisi y’u Rwanda, ACP Theos Badege yasabye abaturage kumenya ko hari inzego zabashyiriweho zikurikirana ibibazo byabo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved