Prof. Shyaka asanga ibihugu bya Afurika bikwiye gufashanya kunoza imiyoborere

Yanditswe na Ndayishimye Jean Claude
Kuya 13 Werurwe 2018 saa 08:05
Yasuwe :
0 0

Umukuru w’Urwego rw’Igihugu rw’Imiyoborere, Prof. Shyaka Anastase, yavuze ko gufatanya kw’ibihugu bya Afurika ari byo bizatuma izamuka mu miyoborere igamije iterambere kandi ni byo bihanzwe amaso.

Prof. Shyaka yabwiye itangazamakuru ko bahanze amaso izamuka ry’Afurika ubwo yari mu nama y’Urwego rw’Umuryango wa Afurika yunze Ubumwe rushinzwe kugenzura imiterere y’imiyoborere mu bihugu bitandukanye bya Afurika (APRM).

Ni inama iteraniye i Kigali iri muri gahunda yo kwizihiza imyaka 15 uru rwego ruhuriyemo ibihugu 37 rugiyeho, aho rwishimira ibyo rwakoze ndetse rushaka n’uburyo rwanoza uburyo rugenzura imiyoborere muri ibyo bihugu.

Prof. Shyaka avuga ko u Rwanda rwinjiye muri uru rwego rugishigwa mu 2003.

U Rwanda rwaragenzuwe imiyoborere yarwo, ruhabwa raporo igaragaza Prof Shyaka yemeza ko yarusigiye isomo.

Yagize ati ”Icyo gihe byaduhaye no gukomeza kwitekerezaho ari imyanzuro yari yatanzwe icyo gihe, ari ibitekerezo byari byatanzwe, twakomeje kubyubakiraho ndetse nababwira ko twanihuse kuko nk’igihugu nyuma gato twashyizeho urwego ngishwanama mu miyoborere ‘Rwanda Governance Advisory Council’ hanyuma dutangira no gushyiraho uburyo buhoraho bwo kwigenzura ubwacu.”

Yakomeje agira ati “Twishimiye nk’igihugu gukorana n’ibindi bihugu kugira ngo uyu muryango utere imbere no kugira ngo uburyo bwawo ukoresha usuzuma ibihugu bugire ireme kandi abanyafurika bose tubyumve kimwe, tubyakire, hanyuma dukoze twigiranaho, dufashanye; hari ibyo u Rwanda rwavana ku bindi bihugu, hari ibyo ibindi bihugu byavana aha […] Kuko ukuzamuka kwa Afurika ni yo mizero yacu kandi gukorana no gufatanya ni ikintu cy’ingenzi.”

Umuyobozi Mukuru wa APRM, Eddy Maloka, yavuze ko impamvu iyi nama yabereye mu Rwanda ni uko Perezida Kagame Paul ari we muri iki gihe uyobora AU ndetse yaranayoboye akanama kari kagamije gukora amavugurura y’uyu muryango.

Yakomeje avuga ko muri Afurika ikintu cyitwa imiyoborere cyakunze kugirwa ubwiru, aho ngo abantu bakunze kudatinyuka ngo bagaragaze ibigenda n’ibitagenda.

Uru rwego runagamije ko ibihugu byagenda bihana ubunanararibonye n’amasomo mu guteza imbere imiyoborere myiza.

APRM ntibereyeho gutanga ibihano, ahubwo igamije ko abayobozi bagirana na yo ibiganiro kugira ngo imiyoborere ibe ibereye umunyafurika. Ivuga ko iri gukora ibishoboka byose kugira ngo ibihugu bitarayinjiramo biyinjiremo.

Biteganyijwe ko ku wa 15 Werurwe 2018 ari bwo isabukuru ya APRM izaba.

Umukuru w’Urwego rw’Igihugu rw’Imiyoborere, Prof. Shyaka Anastase
Bamwe mu bitabiriye inama ya APRM
Umuyobozi Mukuru wa APRM, Eddy Maloka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza